Арахислизибад пIялцIикI
Арахислизибад пIялцIикI
Арахислис ванзала хиви бикIули бирар. Илди дерцIибти яра зярхIти хивазибад бируси саби пIялцIикI.
Буралли, декIар-декIарти хиви дархаили барибсиличиб цадехI журала хивазибад барибсила пайда имцIаси саби. ИшбархIи нушани арахисла пIялцIикIла пайдаличила бурехIе:
- уркIила тумала цахIнабик чIумабирахъу;
- иммунитет цIакьбирахъу;
- гормонтала бузери гьунчибиркахъу;
- камла, никубала, гъезла даража ункъбирахъу;
- чимхъа-умхитIла бузери къулайбирахъу;
- клеткаби сагадирахъу.
Илкьяйдали илини вайси холестеринна кьадар камбирахъу ва иличибли халати туми мяхIкамдирахъу. Ил бизиси пастали нервабала ва эндокринная цахIнабикуначи гIяхIлашал асар биру. Арахисли излумазирад лига-кьякья мяхIкамдиру ва илдазир зе учихIедиркахъу. Илизир Е, К, РР, В - кьукьяла витаминти, кальций, натрий, магний, железо, цинк, фосфор, селен минералти ва халаси кьадарлизир омега - 3, 6 гIявадешла кислотаби лерти сари.
Арахисла пIялцIикI сецадла пайдаласи биалра, чакарла изала, хIила бертаби лертас, дулекI, чимхъа изутас ва кьаркьа чехIейсудеш лебтас асубируси ахIен.
