Тулкни
Ибрагьим Халилли урши гахъес тиладибариб
Аллагь ﷻ! Аллагь ﷻ! Я Раббанна я Аллагь ﷻ(3-йна)
Игъфирлана зунубана я Аллагь ﷻ.
Ибрагьим Халилли урши тиладивариб,
Аллагьличил ﷻ сунени вягIда бариб
БегIлара дигуси кьурбайс лугьас иб,
Наб Аллагьли ﷻ урши кьадарваралли.
Илис урши ИсмягIил кьадарвариб,
Дудешлис кумекбаресли халаваиб,
ГIур Ибрагьимли муэр чебаиб.
Илизи вягIда таманбара иб.
Азир маза-мас, хIябдарш хIяйван кьурбан дариб,
ВягIда таманхIебиуб или муэр чебаиб,
Даршал валри делгьун кьурбайс дутIиб,
«Гьанна кьалли вягIда, таманбиуб» - иб.
ГIурра Ибрагьимли муэр чебаиб,
«БегIла дигуси кьурбайс лугьадли,
Вахъ дигахъуси ИсмягIил – велгьен» иб,
ВерхIцайна ца муэр чебаиб.
Аллагьла ﷻ амрулис сай мутIигIвакIиб,
Гьажарлизи урши хIядурвара иб,
«НикIуби, гъез кьицIдара, бекI гIявабара,
Дузани аркьулра варх ил арукили».
ХIядурвариб нешли, дукла кIапIуциб,
«Жявли вакIи» - иб, хIулби уммайдариб,
Ибрагьимли дисра, гьаяра касиб,
Велгьес пикрибариб хIулбала шала.
Гьалавад умхIули дурхIя ватихьиб,
Илбисли Ибрагьимлис макру дехIдихьиб,
«Ихгъуна жагаси урши лугьаду», - иб,
«Лугьас, Аллагьла ﷻ амру архис», - иб.
ГIела чарбиубли нешличи бакIиб,
«Сен кариилру хIу, паргъатли», - иб,
«ХIела урши велгьес арукибгу», - иб,
«Дудешли дисра, гьаяра касиб», - иб.
«Къяна саби душман, сен лугьули?» - иб,
«Аллагьли ﷻ хъарбарили лугьули сай», - иб,
«Аллагьлис ﷻ нунира жан кьурбандирис», - иб,
«Уршила даралра селра хIебирар», - иб.
Илизибад умут бердили бакIиб,
ИсмягIиллизи, «ХIу велгьес аркулри», - иб,
«Гьаяра, дисра чехIедиулрив», - иб,
«ХIу велгьес архути, адани хIела?».
«Эй малгIун дудешли, урши лугьав?» - иб,
«Аллагьли ﷻ хъарбарили хIу лугьулри», - иб,
«Аллагьла ﷻ амрулис ну мутIигIлира», - иб,
Илис къаркъа игьуб, «гьарахъбики», - иб.
Илбисли халаси къиян кабихьиб,
Макру дарес хIебиубли жапа чебаиб,
Аллагьла ﷻ амру, чула хъябличи чесиб,
Илбис чарбухъун, бахъ мяхIрумбиуб.
Дудешра уршира ца мерла бакIиб,
Адала хIулбала нургъби чяхIдухъун,
Нешла гьала укьес вахъ шишимухъун,
«Урши хьарвиалли, се буриша?» - иб.
Дудешли, «муэр чебаира», - иб,
«Велгьахъес Аллагьли ﷻ амру бариб», - иб,
«ХIу се викIуда? Жан гес пикрибара», - иб.
Кьабуликиб урши, «хIед дигуси бара», - иб.
Адази уршини васият бариб,
«Нешлизи дила саламти дура», - иб,
Савгъатлис дила хIева буха», - иб
«Ну гьаниркахъули диги ахъахъес».
Уршини, «жан айсни къиянси саби», - иб,
«Дис бугабарили, цIакьли гьакIбара», - иб,
«Някъби-кьяшми дигьи, дебадара», - иб,
«Ну шикьулхъули хIед изихIеахъес», - иб.
Някъби кьяшми дигьун, муси кайкахъиб,
Кьиблала шайчидяхI, нурла дяхI далкIун,
Адани дисличил велгьес кьасбариб.
Дисличил кьакьурти кьисдарес хIейуб.
Малаикунази Аллагьли ﷻ гъайиб,
«МутIигIти лугърачи хIердикIена, - иб,
«Секьяйда дурхIя велхьес дигули?» – иб.
«Дила разидеш сархес дигухIели», - иб.
ИсмягIилли, «Кьяшми арза», - иб,
«Гужли ну лугьни гьанмабикаб», - иб,
«Жан лугни малаикуна багьаб», - иб,
«Аллагьла ﷻ амрулис мутIигIлира», - иб.
Някъбира арзили верхIцIайна гьакIбариб,
ХIелтIули дисла бехI, гIела чарбиуб,
«Къузбара, дяхIличи хIу хIермайкIуд», - иб
«АхIеравирули, цIакь каберхурлив?» - иб.
Лебил кьуватличил дисли кьисбариб,
ГIурра кьакьарлизи дис хъурсхIебикун,
Дис игьубли къаркъа, кIел бутIа бариб,
«Къаркъа кьисбарили, диъ хIебарри», - иб.
Ибрагьим Халилизи дисли гъайиб,
«ХIу кьакьари кьисбара викIулри», - иб,
«Аллагь ﷻ мабирид викIули сай», - иб.
«Бунагь чесишав хIу багьандан?» - иб.
Илди кIелра Аллагьлис ﷻ мутIигIбакIиб,
Жаниварти пашмай илдачи хIердикIи,
Дулгули, дисули, ахъли вявдикIи,
Дудешра уршира язихъбилзули.
Аллагьли ﷻ Халиллизи тIамадариб,
«ХIуни хIела муэр, марбаради», - иб,
«ХIела вягIда гьанна, таманбиуб», -иб,
Кьурбан бедиб белгьес, «Урши вати!», - иб.
Пякьир ХIяпиз-ХIяжичи ряхIму бара,
Аллагь ﷻ хIуни кIелра хъули вархьвара,
ХIу разити лугъразивадсили вара,
ШайтIа пишназивад верцахъеси бара.
