Газим-Бег БяхIяндов акIубхIейчирад – 85 дус

Газим-Бег Кьурбанович БяхIяндов акIубсири Лавашала районна МикIхIила шилизив. Школа белчIи гIергъи, 1967 ибил дуслизиб БяхIяндовли Москвала Литературный институт таманбариб. Илала бегI гьаларти назмурти дурадухъунтири районна ва республикала газетабазир, гIур урус мезличил улкала газетаби-журналтазирра.

Газим-Бег декIар-декIарти мераначив узули калун: газетализив, журналлизив, телерадиокомитетлизив, писательтала Союзлизивра. Илала 40 – лицад жуз дурадухъун. Сунела назмуртазир илини хала бегIтачила, дубурлантала гIядатуначила, адамдешличила, уркIила умудешличила, ВатIайс мардешличила темаби ахъдурцули сай. Илала творчество дигантас назмурти гьаладирхьулра.

ДУБУРТАЧИ МЕШУТАС

Чис хIейгахъалра, учIус

 Далуйта дудешунас,

Чуйна аслира, викIус

 Дубуртачи мешутас.

 Базла алапа касес

 ЦабехIтиван гьалакли,

Адамлис гIяхIдеш барес

 Арбашантас гьарахъли.

Дус пашманни башантас

Гьалмагъ алхнила децIлис,

Бархьли лишанхIейсантас,

Дурзам баталли, бецIлис.

ХIерхIеили кунбачи,

ХIербикIантас чIакначи.

ЛехIхIехъили къунбачи,

ЛехIихъантас чатIначи.

Лебил барх хIулбуркIантас

Хъу дузниличил ахъли,

ТIул гIявахIебарибтас

УрхIла бигIунси гIяшли.

ГIяхIгъабзаличила гъай

 ГIягIнихIели бургъантас,

Балагь лебхалли, гьала

ТIашбилзанти бурямтас.

 ХIулбазиб зегъ агартас,

ТIуйзиб занзи агартас,

 ТанбихIлизи биркантас

ТалихI гьанни адамтас.

Лебалли чархла ахъри,

УчIус виругIев ахъли

Далуйта дудешунас,

Дубуртачи мешути.

ХЬУНУЛ АДАМ РИГАХЪЕС

ЛямцIдикIути хIябкубта

 Ахъли учIес багьандан,

Чебси саби тяп жанван

Ригахъес хьунул адам.

КертIули нургъби забван,

ГIяшли висес багьандан,

Чебси саби тяп жанван

Ригахъес хьунул адам.

 ГIяламла байрумтачив

Къагъли улхъес багьандан,

 Чебси саби тяп жанван

Ригахъес хьунул адам.

Дургъбазив душмантачил

Дергъли ургъес багьандан,

Чебси саби тяп жанван

Ригахъес хьунул адам.

Душмантачивад гьаман

Чедииркес багьандан,

Чебси саби тяп жанван

Ригахъес хьунул адам.

ВебкIибхIелира хабар

ГIелаб батес багьандан,

Чебси саби тяп жанван

Ригахъес хьунул адам.

АГАРЛИ ХАЛАЛ ГIЯЙИБ…

Агь, адамла гIямрула

КъантIдеш иш дунъяличир,

Агарли хьалли гIяйиб

Ил шайчиб ванзаличиб.

Сайригу ну архIели

Суктуварибси нешли,

Хъули чариубхIели

ХIеркIла дублавад нясли.

 Гьалабванригу дубриб

Берта беркунси букIа,

Картошка дерцIес дукиб

Бикьурси декла цIукIа.

Баз бикилив чегьурла

Кабцла сагати дабри,

Ну висахъули, забли

Дитилив дила шабри?

 ЖумягI гьалав ахIенрив

ДалайикIуси ахъли,

ХIебалули хIебикIни

Дунъя шадбарес ахъри.

ХIерхуси дирниличи

ГIяламла бунагьуни,

Ишдицад дургниличи

Дунъяла балагьуни.

Дус бикилив акIубла,

Наб ургьаб бикIахъули?

Хъулчрачибад хъубзури

Заки пIянкьбикIахъули?

Бара гьалавригу ну

Ватихьибси вашули,

Пяхъиркули чIаплиу

ЖибхIназивад вебшили.

Даг ахIенрив вебкIибси

Дила масхуртар дудеш?

Гьанна дила бекIлизир

Гъудурли сари хIяндеш…

Агь, адамла гIямрула

КъантIдеш иш дунъяличир,

Агарли хьалли гIяйиб

Ил шайчиб ванзаличиб.