Сулайбан Рабадановлис – 90 дус

Рабаданов Сулайбан Рабаданович акIубси сай Дахадаевла районна Дибгашила шилизив. Шила школа таманаили гIергъи, Москвализибси М.Горькийла уличилси Литературный институт белчIун. Республикала «Ленинна байрахъ» газетализив литературный хIянчизарли узули калун. 1964-1992 дусмазив даргала мезличил дурабулхъуси «Литературный Дагъистан» альманахла редактор сайри. Илала цаибил жуз «ИмтихIян» дурабухъун 1958 ибил дуслизиб, илис гIергъи хIябцIалицад нешла ва урусла мезличил жузи дураибтири. Илала творчество дигантас чумал назму гьаладирхьулра.

Исламла ислала ас

Асилчебли калахъас!

Бусурмаван дилара

Лебсигу уркIила кьас.

Набзир уркIецIи-ряхIму

Ил кьасли дилкьахъути,

Ил диннис марси дила

РухIла хъу сабухъчерти.

Дагъистайс деза

Кьиблала берхIилиуб

Кьум някьиш кьурчла галга,

ХIу – жанра, хIу – алжанра,

ХIу – гьар бархIила балга,

ЗурхIябтала миршбауб

Ранг жагаси гулвава,

Балбиркур узидешла

ХIела умматлис гьава,

УркIи батси, хIер – сахъси

Сахаватси Дагъистан.

Кабизчебси Кавказла

Питат кулехаличиб,

Якьутла къаш къугъаси,

Някъ – кьуватси, кьяш – кункси.

Шадлихъра – хIу, мекъра – хIу,

Хъарихъра, хъяббурцра – хIу,

Уршби-рурсба хIела рухI

Асилчерлицун дихIу.

Азадти ахъанайта

КIапIни бекI ахъли диху,

МаслигIятлис асчебси,

Кьас бикьурси Дагъистан.

БукIунра – хIу, хъубзарра,

Ялчира – хIу, анхъчира.

Сабурлара гIяхIлара

Даршуси байрахъчира,

ХIурхъала хъуцIрумачиб

Уржибси варгьира хIу,

Азадти ахъанайта

КьапIни бекI ахъли диху,

УркIецIила, ряхIмула

МицIирси цIакь Дагъистан!

Шамилла гъабзадешла

ЛямцIли шалабируси,

Батирайла, МяхIмудла

Далуйта жагьбируси,

Анкъи – гьарзал, шанг – гIявал,

ГIилмула гIиниз мурхьси,

Ламуслара диннара

Нур дурусли дихIуси,

ГIярасай зант лусенна

Дебш гIяшул лес Дагъистан!

Дубуртира диркьара

КарцIси Каспи урхьула,

ДяхIимцIайчи хIербикIес

ДяхI гьаргси, хIял – малхIямси.

СяхIбат гьанни тIутIила

Бухъ сархушли бухъуси,

ЧIакнас чIалтIа бягIуси,

Марзла мукьрас кьар тухъси,

Гьайбатли гьанбушеси

Гьунарчебси Дагъистан.

ВатIанра – хIу, улкара,

Баракатчебси мулкра,

Мурадра – хIу, гIямрура,

Чархарара, амрура,

ХIу аринси кьисматла,

Леб хIезиб кьибламара,

ДихIес баладра ура

ХIела минала мера,

Хъялис мардешла мягIдан,

ДулекI – даргла Дагъистан!

===

Ну улгусира левси

Сайгу Аллагь ну вегIси.

Бархьдеш, бархьдеш – ил саби

Саби гьанни улгуси.

Саби гьанни ургъуси.

Гьар бархIи чевиргъуси.

Ил сархес хIебикалли,

Селра агу викIуси.

===

ХIу левхIели бирар ил

АхIерси нешли кьяйда

Милиги ихъахъуси,

Гьар адамла лебси саб

ВегIла ВатIан дурхъаси.

ВегI аринси ил ВатIан

Гьигьбируси гьавара,

ХIу акIубси минала

ХIечи дигира лявра.

Ил ВатIа бурхлиубси

ЧатIала хIеб далайра,

Сирира бархьбатурли,

ДурхIнала марзла ганзра.

ВатIан лебхIели хIура,

Хъубзарара, гъабзара,

ГIевдухьлизиб убзара,

Шадлихъла тIашкьянара.

ХIу левхIели бирар ил

ВатIан бягIу гьарзара.

Бургу ил гьарбизлира

ТалихIла зурхIяблира.

======

ХIечира хIера гIебшни

ГIяяркьяван гъамдиуб,

Ну галгалара кIари

Ванзаличи гIяшдиуб.

ТIабигIятла ил хIукму

Лебсигу мугьурчебси.

Дусма велсунсиличи

Левси сай гьаввикIуси.

ГьаввикIуси ил гIяхIяйс

ГIебшни викIесра вирар.

ГIебшнили хибти хIяндеш

Нуша лертира дикIар.

Илди хIяндешли хIура

Раргили, дила ашна.

ХIяндешли хIу ахIерси

Ретаахъурри даршна.

ХIела арила удив

ХIед дагичив имцIали,

Дигулра наб ишбархIи

ДайхIерейчиб шалали.