Аминат ГIябдулманаповас – 80 дус

ГIябдулманапова Аминат ГIябдулманаповна акIубси сари Дахадаевла районна Хъярбукла шилизир. Шила школа белчIи гIергъи, ил МяхIячкъалала ДГПУ-ла физикала-математикала факультетлизи карерхурсири ва таманбарили гIергъи сари акIубси шилизир мугIяллимли рузиб. ГIулухъахIелил кагибти назмурти цаладирхъуси рурсила гьуцI бетерхур, илини Москвала М.Горькийла уличилси Литературный институт шула кьиматуначил хъараахъур.

ИлхIели Аминатла поэзияличи диги гьатIира мурхьдиуб. Ил Дагъиста халкьла поэт ретаур. Цаибти назмурти илини шилис ва шантас хасдарибтири ва жуз дураибсири. Ил цаибси жузли имлис поэзияла рухIласи дунъялизи улкьай гьаргбариб. Аминат ГIябдулманаповани дураибти жузазирад цацадехIти: «Ванзала мицIирти дяхI», «Нешла анкъи», «Хъярбук», «Неш, наб дунъя гьаргбара», «Дила дигути адамти», «Уршилис васият», «Кьисмат урхIла хIебирар», «Назмурти» ва цархIилтира. Камли ахIен илала урус мезличил дурадухъунти жузира.

Ил Дагъиста телевидениелизир, «Гьалмагъдеш» журналла редакторли ва цархIилти мераначир рузули калун. Гьанна ил дурхIнас хасбарибси «Лачин» журналла редакторли рузули сари. А.ГIябдулманаповала поэзия дигантас илала сагаси жузлизирад назмурти гьаладирхьулра.

Нешлис далай

УркIи гъяриули гами гьайбирар

Дила уркIилизиб илцад цIакь алкIан.

Неш, хIед далайрикIес ахъри бургули

Далайла субхIянта дунъя бицIесцад.

Шурмала барглизиб шинна урунжван,

ХIези дурес дугьби набзир парчдикIар,

ХIела черяхIдешлис ва пасихIдешлис

ДалайбикIар дила гьарилра биркIан.

Иш халал дунъяра дяхI гьаргдарибси,

ХIулбала шалара наб хIела гибси

Зубразир зубарти дакIударибси

Ну русахъес хIела гьанкI бемцIахъурси.

ДецIла саби иш хIед дила дезара,

Черасни багьандан жагадеш хIела,

Бяхъибси арцанван цIумра рикIулра

ХIейрухIели ахъес, неш хIела чебла.

Гьанбиркур хIезирад дашар хIеб вавни,

ХIу хьулхIерухъадли хIедашар бурхIни.

ХIела сихIрулира ну акIахъубси

Аллагьли ﷻ риасра ну рубкIахъуси.

Аллагь ﷻ уркIецибара

Аллагь ﷻ, уркIецIибара

Дунъяла язихътачи,

Ванзаличи гIяхIладли

ХIуни бархьаибтачи.

УркIецIибара хIуни

УркIи кахIелунтачи,

Дунъяла мас-хазнали

Белкъес хIебирантачи.

Илдира хIела саби

Ца иткъи дугIкаибти,

УркIецIи хIебарили

Ца шайчи лайбакIибти.

Аллагь ﷻ, уркIецIибара

ХIу вагьес хIейгутачи,

Иша бакIницун ахIи

Аркьни хIебалантачи.

Тилади саб, чевверхи

Къардбухъунтачивадра,

ХIела уркIецIиличи

Хъарли саби илдира.

Кьудратла ВегI, иш балга

Дилара кьабулбара,

Дунъяла адамтачи

ХIуни уркIецIибара.

ХIу агарси сай или

Хъяма биркьантачира,

Аллагь ﷻ сукъурси или

Хъулкна биркьантачира,

Аллагь ﷻ, уркIецIибара.

Нешлис

УрхIла дурхIнала биса

Аргъадлири дурарарад,

ДуцIрулхъади хIу дура

Неш, баршахъес ургала.

ЦIуръаби хIяршбирули

Хъутри лугIяндиубси,

ДурхIни дуклабурцули

ХIевала хьар бурдибси.

Шанти даршубирули

Лебдеш харжкабируси,

УрхIла талихI калахъес

Дугурбазир рулгуси.

ДяхIили дурар улкни

Чилра ургахIеркули,

Рисулра, неш, иргъули

ЧяхIдухъи дурхIнала хIи.

Гьаннаван хIу хIяжатси

Замана хIебакIибгу,

Ва неш, ца дакIурухъи

Иш дунъя берцахъагу.

Хъубзар

Гьаргбарили зярхIси гъарш.

Назмула гье иргьулра,

Хъубзарра ну, хъубзарра

Рузулра дугелира.

УркIила дяхъурбазир

МурхьдикIули гъаршани,

АлкIахъули саби далай

Дунъяла азир дардли.

ХIебубкIар дила далай,

Дунъя бузули лебай,

Дунъяла шишимъули

Лералли улукьули.

Дила бемцIурси гьанкIли

ДугIиули дугурби,

Гьар шайчи шуррирхъули

Дамсурли сар шалуби.

Хъубзарра ну, хъубзарра,

ХIили хъуми иркулра,

ДегIи урхIла дардани

УркIили изахъулра

Дила даимси далай

Баргес чумлира гIурра,

УмцIули чумра даршдус

Баибсину набчира.

Уршилис аманат

ХIу букьурли виахъес

Мас-хазна хIедатурра,

ХIела хабардерхахъес

Я пагь гес хIериубра.

ХIела дудешунани

ХIяяван хIербарибси,

Бархьдеш калахъес хIедра

Лерил гIямру харждарра.

Кункти гIямру даргили,

Бетмайхъахъид хIунира

Ил давла хIебагьурти

ЦIумбухъунтину чумра.

Нешанани дихIибти,

Чула яхIван умули

ХIед нунира дихIира

Дубурла урунжуни.

Вари, урши, хIердара,

Илну адамла давла,

Илдазир гъудурти сар

Дила хIира нургъбира.

Улген нуван гьар дуги

Алкунти зубартасра,

ХIу гIяхIгъабза виадли,

Гъамдирахъид илдира.

Дила дудешли набра

Датуртири дубурти,

КъиянхIели чуйнара

Чучи хъарахъибсира.

Далтулра хIед лерилра

Рурхъути рамчанира,

Илдани яхI гибси саб

ГIяхIти гъубзнас чумлисра.

Дила хIер уббалтулра

ХIед икI берхIилизибра,

ДяхIла шала дургидра

Шаласи бацлизибра,

ГIяхIгъабзас баибси саб

ХIериэс илцад давла

Нуни кьяйда умули

Гьарил секIал хIердара.