“Дурашанра шан вирар…”
Гьалаб нушала шилизибси мижитлизи дехIибайчи башути ца-чумал гьести гIямрула адам бирутири. Илдира – имцIаливан базарличи чукурбикибтала лугIилизибад. Илис итхIели Аллагьла ﷻ дурхъаси хъали викIесра хIейри, сенахIенну илар гьаман жалтира тIама-гьамара камхIедири.
Илдигъунти тяхIяр-кьяйда анцIдукьи, динничи чIумали чекайзурси нушала узикьар - ГIябдуллагь БяхIяммадов МяхIячкъалализи, республикала динна Идарализи (вархьли ДУМД-ла муфтийличи) вякьи, нушачи динна гIялим вархьаахъес ибси тиладиличил дугьаизурсири. Илгъуна тилади хIясибли, республикала динна Идарализивад вархьибсири нушала шилизи, наб иш белкIлизиб сунечила бурес дигуси динна гIялим, Лавашала районна Кьакьамахьила шилизивадси жагьил урши МяхIяммадсалам МуртузагIялиев.
Ил Бурдекила шилизибси мижитлизив имамли узухIейчирад шел дус дикили сари. Сунела малхIямти хIял-тIабигIятличибли, МяхIяммадсаламли шила жагьилтала, школализибти дурхIнала пикри итмадан сунечи битIакIиб. Иличибли ишбархIила замана нушала мижит дехIибайчи башутани бирцIескабииб. ВиштIаси-халаси хIеили, шила шанти гьар жумягI бархIи дехIибайчи башули биъни – жамигIятлис дигеси анцIбукьли бетаур. Мижитлизир дехIибала дарес, Аллагьлис ﷻ булгес дурала мер-мусаличибад башутира бархли камхIебирар.
МяхIяммадсалам нушала шилизи вакIибси бархIиличибад школала гIямрула ва бара жагьилкабизурти дурхIни хIял-тIабигIятлизиб гIяхIла шайчибяхI тамай барсбиуб. ИшбархIи илдазивад цалра халасилис салам хIегили, гьести гIямрула адамтала някъ хIебуцили мякьлавад шалгIевхIелхъан.
МяхIяммадсалам МуртузагIя-лиевли школализибси белчIудили-зибад акьуси заманализир дурхIнас Кьуръа дурсрира кадирхьули сай. ГIярабла мезли делкIунти секIал ил мугIяллимли дарган мезличи шурдалтнилира чеалкIуси наслу багьудлумачил бегIбирнилизиб дебали багаласи ва мягIничебси мер бурцули саби.
Шилизибси школала директор ГIябдурашид Жамбулатовлира М.МуртузагIялиевличила гъайикIули, илгъуна пикри буриб. ГIямрулизиб багьурси адамличил даимлис барх кавлан, я диргалахIебулхъан.
ДехIиба замана баибхIели, МяхIяммадсаламли жагаси тIамаличил, уркIи кIантIибакIесли акбар бучIа. Шила жамигIят, диру-далтутира дархькатурли, акбар белчIайчи, тIашли лехIбилзан. МяхIяммадсалам шел дус МяхIяммадхIяжи Насировла хъалибаргличил варх хIерирули сай. Баркалла биаб МяхIяммадхIяжила хъалибарглис, илра кириличил цугси баркьуди саби!
Илгъуна кайзурси гъабза, лебтачилра валикибси, гIяхIти хIял-тIабигIятличилси, духуси урши айкьурти ва халаваахъибти МяхIяммадсаламла бегIтасра, Кьакьамахьила шила жамигIятлисра нушала шанти уркIи-уркIилабад баркалла бикIули саби. БикIуливан, «дурашанра шан вирар, варалли шантани шан». Бархьси пикри саби ил, халкьла айтулизиб буруси. МяхIяммадсалам ишхIели нушала шан сай!
ГIябдулхIяпиз ГIябдусаламов, “Бурдекила шила совет” СП-лизибси Халатала советла председатель
