Суалтас жавабти хlядурдарибти сари имам Шафигlла мазгьаб хlясибли
– Дубуцибсилис сивак пайдалабарес асубирару?
– Бирар, хIери баайчи, хIери баили гIергъи, хIебаралли гIяхIси саби. Шинничи гачбикахъи пайдалабаралли, дуббуцари дулъа.
– Асубирусив миск (духи) дуббуцарла базлизир пайдаладарес?
– Бируси саби, амма ил хIебаралли гIяхIсилизи халбируси саби. Илкьяйда илдала тIемличи сунтIхIейкIнира гIяхIси саби, амма ил баралли, дуббуцари дулъути ахIен.
– ЗягIипхIели балу-балули рабч дакIахъалли, дуббуцари дулъутив?
– Дулъути сари, амма илизиб бунагь агара, цархIилван гIяхIдеш хIебирули биалли.
– ХIила тумлизи яра гIемслизи укол яра капельница баралли дулъутив дуббуцари?
– АхIен, амма арадешлис чараагардеш лебхIели ахIи ил барес хIейгесилизи халбируси саби.
– Цула абитIалли, дуббуцари дулъутив?
– Дулъути ахIен. ХIи яра дарман дархти шутри варглизи даалли, илдани дулъа.
– Лезмила уди супIбируси дарман кабихьалли, дуббуцари дулъутив?
– Илала камси-биалра кесек варглизи баалли дулъа, мухIлилаб бацIили таманбиалли, хIедулъа.
– Папрус ва танбаку держали дулъутив дуббуцари?
– Дулъути сари, сенахIенну папрусла гавличил хургьрази никотинра кабиур.
– Хьунул адам гинекологличи рукьялли, илала дуббуцари дулъану?
– Эгер тухтурличи рякьунхIели, хьунул адамла кьаркьа биркIантазирти тIярхъубази се-биалра бухIна букьялли, дуббуцари дулъан.
– Дубуцибсилис асубирару цулби ицуси паста пайдалабирес?
– Бирар, амма пастабазир тIемдикIути секIал дарх дирни багьандан, кьакла гIелабил шайчи селра гъамхIебиахъес къайгъибарес чебиркур.
– Хургьри изухIели, илди сагъдарес кислород пайдалабарес асубирусив?
– Асубируси саби, сенахIенну кислородла я ранг, я тIем, я гягI агархIели, амма иличил дарх дармунтира даралли, дуббуцари дулъути сари.
– Дуббуцари дулъутив шутри кьяраалли?
– Дулъути ахIен илди умути диалли, шутразир хIи яра берка кесекуни хIедиалли.
– Дуббуцари дулъав узи яра цархIил аппаратунала кумекличил кьаркьа биркIанти ахтардидиралли?
– Дубуцибсила варгла духIна диути аппаратуначил ахтарди дурабуркIалли (чимхъаумхитI ва цархIилтира), дулъути сари.
– Дуббуцари се баралли дулъути?
– Балу-балули се-биалра беркалли, яра шин держалли; варглизи се-биалра бухIнабикалли (дарман), къянкъубази яра лихIила бухIна се-биалра букьялли; балу-балули рабчвиалли; шагьват дурадухъалли; мурул-хьуна ургаб гъамдеш биалли; хьунул адам хIилариалли (менструация) яра виштIаси варалли; держ, папрус бержалли; къагъвиалли, дагьрилизивад ухъалли; диннизивад дураухъалли (Аллагьли (с.т.) илизибад берцуди бараб).
– Дубуцибсилис асубирару хIулбази дарман кIантIдушес?
– Бируси саби, илдала тIем кьаклаб гьанараллира, дуббуцари дулъути ахIен.
– Дуббуцари дулъутив ахтури кьяраалли?
– Балу-балули ахтури кьяраалли, дулъути сари. Илди тударес валкьхIеурли, хабарагарли кьяраалли, дулъути ахIен.
– Дуббуцари дулъутив дазала дирухIели, кьакра къянкъубира даргарухIели, шин кьяраалли?
– Дубуцибсини халаси къайгъиличил кьак баргарухIели шин кьяраалли, дуббуцари дулъути сари. Къянкъуби даргарухIели шин илабси лигала чеди адааллира дулъути сари.
– Дуббуцари дулъав сурскьакьари изухIели дарман диралли?
– Дарман сурс-кьакьарла (гIярабла хIярп гIайн бетаруси) мерла шайчи бетаили хIебиалли, дулъути ахIен.
– ХIила тумлизирад яра тIуйзирад хIи адитIалли яра хIижама биралли дуббуцари дулъутив?
– Дулъути ахIен, амма ил бирни хIейгеси саби.
– Дугели дуббуцарлис нигет барес хъумарталли, се бируси?
– Или биалли, шафигIитунала мазгьаб хIясибли, дугели яра савлила акбар белчIайчи нигет барес валкьхIеалли, дуббуцари бетаруси ахIен. Амма сеналра дуббуцари дулъути гьар секIайзивад мяхIкамли виэс, ва уркалунти дуббуцари черахъес чебиркур.
