ТалихI

Гьачам ТалихI вацIализиб шадибгьуни бирули, жагаси тIабигIятличи хIербикIули лазат кайсули лебли, хапли курлизи кабикиб. Ил кабиили бисибииб. Мякьлавад ца шалгIевулхъуси адамла тIамала бакьили, курлизибад вявъиб: - Эй, гIяхIси адам! Дурасаба ну ишабад!

Адам курла дубличи гъамиубли хьарбаиб:

- Илис хIуни наб се лугада?

- Се диги хIед? - хьарбаиб ТалихIли.

- Наб диги урхьу дублаб халаси, жагаси хъали.

 ТалихIли илис хъали савгъатбариб. Адам биалли разивиубли, ТалихIличила хъумартурли, дуцIли арякьун. Курлабси ТалихI гьатIира ахъли бисибииб.

 КIинайсра адам мякьлавад аркьули бакьили, ТIалихIли вявъиб:

 - ГIяхIси адам, берцахъаба ну ишабад!

 - Илис хIуни се лугада? - суал бедиб адамли.

 - ХIед се дигулри? - хьарбаиб ТалихIли.

 - Наб диги жагаси, дурхъаси машина. ТалихIли илисра тиладибарибси бедиб. Разивиубли, адамли ТалихIличила хъумартурли, илавад вебшиб.

ТIалихIла тамай умут беткахъиб.

Илини бакьиб хIябэсилра адам аркьули.

- ГIяхIси адам, дурасаба ну ишабад! - вявъиб ТалихIли.

 Адамли курлизибад ТалихI дурасили, сунела гьуни буцили ватихьиб.

 Разибиубси ТалихI илис гIергъи дуцIбухъи хьарбаиб:

- Адам, се диги хIед наб кумекбарнилис?

- Баркалла, наб селра гIягIнили ахIен, - жаваб бедиб адамли.

 Илкьяйдали ТалихI илис гIергъи арбякьун ва даимлис иличил барх калун.

ПатIимат МяхIяммадова