Илдигу нушала Гьалжанала умхьни…
БегIтала хIурматбарес хIяжатси биъниличила лебтанилра балуси саби. Ил дурхIнала гьалабси се барили хьалли, ахъес хIейруси кIелра дунъялизибси (иш ва ахиратла) чебла саби. Чебла, ил сели-биалра чебицIахъес хIяжатси, ужра бедили ахIенси ахъес хIейруси ЧевяхIсила аманат саби. БегIтала ва дурхIнала цаличи ца дарсур чучи хъарти чеблуми лерти сари. ДурхIнала гIямрулизир бегIтала къел даимлис дарх кавлути сари.
БегIти илди атхIебла кIиликI вавнигъунти сабигу. Илди вавнира чIянкIли дяхIилизир вавалидирхъули дирар. Тяп илкьяйдали бегIтала нушачи дигира барсур селра тIалабхIедирутили, сабур-яхIличилти, се-дигара чекайсутили урдулхъули сари. БегIти – дурхIнала давла саби. Илди мицIирли ва арали биъниличила балули виадли, бегIлара талихIчевси адам сайри хIу. ДиштIахIейчирад нуша бегIтачи хъарихъес бурсидиубра, хIятта гIямру аркьуцад нуша илдачи хIяжатдиркутили кавлулра. БегIтала разидешлизиб саби нушала Гьалжанара. Илдала разидеш сахIерхили, нушаб ЧевяхIсила разидеш сархес имканбикIуси ахIен. ИлдикIун нушала Гьалжанала умхьни саби.
Буралли, бегIти чула дурхIначиб разили биалли, илдала балгнира ЧевяхIсиличи диути сари, ил анцIбукь биалли, Кьудратла ВегI нушачив разили виънила лишан саби. Адам мурт-дигара къияндешуначил, имтихIянтачил вяхIягес асубирар. ИлхIели адамла балга ЧевяхIсини кьабулбаралли, иличибра гIяхIси секIал биэс хIебирар адамлис. Иличи ургIебли, бегIтачи лехIхIейхъути дурхIнала балга-дугIяра кьабулдирути ахIен. Ил багьандан гьар секIал иш дунъяличир пасихIдешличил ва бухIнабуцибси дигIяндешличил (хIикмат) пикридарибти сари.
БегIтала хIурматбирнила дурабад, дурхIнани илдас гьар бархIи гIяхIдешуни дирес гIягIнити саби, цархIилван бегIтала гьалабси чебла ахъес хIейрар. Илизиб саби бегIтала гьалабси чебла ахънила мягIнара. Нешли дурхIни гьанкIагарти дуги-хIериличил, бамсри хIебалули, чебетаибси хIерудиличил гIеббуцили халабиахъули сари. ДурхIнани биалли нешлис дарсур хIурматра, дигира чедаахъес чебси саби. Кьуръа аятлизиб буруливан(мягIна), чили бегIтачи лехIирхъули, илдала хIурмат хIебулъули, бархIи бехIбихьалра, илала гьалар Гьалжанала унза ибхьути сари… Эгер неш ва дудеш мицIирли биалли, кIел унза ибхьути сари, илдазивад ца виалли – ца. ХIера, илгъуна баракат гьаргбирули саби дурхIнас. БегIтазирад дурхIначи диути лерилра гIяхIдешуначила ва баракатличила гьанбушалли, илди дебали дахъал сари. Ишар лерилра гьандушес имканхIебикIур. Ил багьандан мицIирли лебай дигахъеная, хIурматбиреная хIушала бегIтала, сенахIенну илди хIушала мургьила кьалми саби, чузибра кахIебурхуси давла бухIнабуцибти.
