ДурхIнас Идбагличила ﷺ хабурти
Валри биалри…
Нушала дурхъаси Идбагла ﷺ рурси ФатIимала ХIясан ва ХIусен уршбани валри чебаили, дебали валри дигиаур. Илди хала дудешлизи валри асахъес тиладибухъун. ИтхIели Идбагла ﷺ ахъри аги илдас валри асес. Амма хала дудешли дурхIнала уркIби хIедячи, жагали гьачамлис чус дигуси валриличила хъумартахъес кьасбариб. Ил кьукьубачи кайили викIар: «Даширая, адиая. Набзибад ит валриличиб гIяхIси бетаэс рахли?»
ДурхIни разибиубли хала дудешла къакъличи мурдабииб ва чули чебаибси валриличила хъумартурли хIязтани биркьес бехIихьиб. Мисаллис, илгъуна анцIбукь нушала дурхIначил кабикалли, нуша илдази: «БусягIят арц агара. ГIур исехIе», – или дикIулра. ХIушани бурибсини дурхIнала дагьрилизиб арцла кьадри лебгIеб имцIабирахъули, мискиндешличила пикри алкIахъули саби.
КIиибилра – илди бахъхIи хIерликабирахъули, гIямрулизир детхIерутачила пикрибикIахъули, хьулбикIахъули саби… БегIтани дурхIнала тиладиличила хъумартурли, гIямрулизиб бетерхахъес хIебиалли, илди дурхIнала гьалаб къунбарти бетарули саби. Нушала Идбагли ﷺ биалли, тилади хIязличи шурбатурли, дурхIнази дугIла гъай хIедури…
Хала дудеш
ХIясан ва ХIусен гьаман хала дудешличил хIязтани биркьутири. Акьуси замана хала дудешлисра илдала хIязани дигахъи. Илини дурхIнас анцIхIебукьахъес багьандан, жура-журала хIязани пикридирусири. Гьачамра, илини рурсила уршбира сунела къакъличи мурдабатурли, илди ита-иша бикули, разили дукаркIулри. Ил манзил чевакIибси ГIумар тамашавиубли, хIякизур.
– ХIушала пергер хIяз буилигу!
– ГIе, пергер мурдабира саби ишди. Иличибли нушала Идбагли ﷺ чебиахъули сай, камси биалра акьуси замана биубхIели, ил биштIатачил буркIес гIягIнили биъни. ИмцIатигъунти адамтани: «Дила замана агара», – или, дебали бархибтала гIердарили, дурхIни чучибад гьатIира гьарахъбиркахъули саби. Ил дудешуначи имцIали къячбилкуси саби, сенкIун нешанани итира дурхIначил халаси замана буркIули бирарну. Илдас багьес гIягIнибиркур дудешунани дурадуркIути хIязанани дурхIнала бяркъличи сецадла халаси асар бирарал.
Нушала дурхIни биштIахIели, илдачил уркIи гьаргти ва гъамти бархбасуни кадизахъес хIедиахIелли, халабаибхIели дахъал масъулти алкIули сари. ИлхIелира нушани дурхIни гIяйиблизи бурцулра ва илдачи хIеруди камбарили, нушани бяркълизиб уббатурси секIал чехIебиулра… ДурхIни биштIали лебалли, иличила хъуммартидая…
