ДурхIнас

Гьалабизуни агара

АхIерти дурхIни, нушани хIушази тамашала адамтачила хабар бурехIе. Цаибилла акIубхIйчибад алгъай кьяш 6 сантиметрла балуй кьяшличиб къантIсири. Тухтуртала бекIлил умут аги ил ара-сагъли вашес вирниличи. Амма халавибхIели, ил вашулицунра ахIи, спортлизи ахъили, машгьурси футболист ветаур ва дунъяла чемпионна уличи кIина лайикьикиб. Ил сай М.Гарринча. КIиибиллис, виштIахIели тухтуртани уркIила нукьсандеш (порок) кабизахъурсири ва даимлис ил физкультурала дурсрачивад акьуватурсири.

Амма илини лерилра къадагълумира къияндешунира дяхIяурли, хоккейла шайчивси дунъяла чемпион ветаур. ГехIна. Ил сай В.Харламов. ХIябъибил, 11 дус виубхIелира сунела зилантазивад халавикIнилизив ва битIакIлизив гIелаулхъулри. Илис багьана сабри кьаркьайзиб халавикIнила гормон камли биъни. Илич хIерхIеили, илини «Мургьила тап ФИФА» авна сархиб. Илала у саби Л.Месси. Авъибиллизи 21 дусла гIямруличиб багьахъурсири 23 дусличи бикайчи мицIирли калад или. Сунела гъираличивли ва къайгъиличивли ил 70 дусличи бикайчи хIериуб. Ил машгьурси гIялим ветаур ва жуз белкIун, cабира 10 миллион адамли белчIунси.

Лерилра илдачил дархдасунти анцIбукьуни гьарли-марти сари. Нушала диштIати дучIанти! ГьаладяхI даширая, нукьсандешуначи ва къияндешуначи хIерхIеили, гьар секIайзир бегIлара гIяхIтили диэс къайгъибарая. ХIушала хьул ва гъира лебли биалли, сегъунтилра гьалабизуни хIедирар. Гьар секIайзиб ЧевяхIсилис шукру биресра хъуммартидая.

Пача ва хIева

Гьачам ца пулан улкала пача зягIипикиб. Илини сунела пачалихъла пасихIкарти адамти сунечи жибарили викIар: «Чили ну сагъварасра, илис дила пачалихъла байхъала бедлугас». Лебил пасихIкарти учибикили пикрибикIесбяхIиб се барили пача сагъварес вирарал. Ил суай жаваб чилилра балули ахIенри. Илдазивад цали иб, пача сагъварес вирар чIянкIли талихIчевси адам варгили, иличибси хIева чеббатурли, пачачи чегьаллицун. Ил пикриличил кьабуликили, пачали пачалихъла лерилра мермусаличи сунела чехьрукьяби бархьиб талихIчевси адам варгахъес. Къуллукъчибани лебил пачалихъ лаг-кат ахъили, уди-чедибяхъили хьалли цалра адам хIергиб сунени сай талихIчевсилизи халируси.

Цалра адам хIергиб гьар секIайчи разиси ва кьабулси. ЦацабехIти давлачеблири, амма зягIиплири, цархIилти ара-сагълири, амма мискиннири, хIябэсти ара-сагълира давлачеблира биалра хьунрачи кьабулли ахIенри, итдилтала биалли, дурхIни вайтири. Лебилра селичи-биалра разиагарлири. Гьачам пачала урши бархIехъ хъули чарулхъухIели, ца улкьайлизибад тIамала аргъиб: «Шукру ЧевяхIсиличи, хIянчи тамандарили, уки велкъунра, гьанна усес аркьяс, гIур наб цархIил се гIягIнили?» Пачала урши разивиубли, иличи къуллукъчиби бархьиб ва сунес дигути арц дедили хIева хахъес буриб. Къаравашуни ил уршиличи бакIили хIербикалли, талихIчевси илцадра мискиннири, хIятта илала хIевара балли аги зибкьни ахIенси. ХIязлис ахIен духути гIялимтани буруси: «Гьарли-марли давлачевси ва талихIчевси сай, уркIилизивад давлачевси».

ПАТIИМАТ МЯХIЯММАДОВА