Мискин ва вачрукья
Ца шагьарлизиб мискинси хъалибарг хIербирулри. Дудеш биалли, хIянчи агарли вахъхIи калун. Хъалибаргла беркесил аберхурлири. Ил хIянчи баргес къяйцIикIули левли, ахирра илис цархIил шагьарлизиб хIянчи гьалабихьиб. Гьарахъли биалра, хъалибарг бахес гIягIнилири ва ил кьабуликиб.
ЦархIил шагьарлизив узули, камти арц цаладяхъибхIели, илини кьасбариб хъалибаргличи дархьес. Гьачам хIянчиличи укьес дуравхъунхIели, илис кьакьализив гьалав чехIеибси жагьси вачрукья къаршиикиб. Илди ихтилатбухъун. Вачрукьяни буриб сай шагьуртикад вашули, дибгIянти ваяхI дирцули вачар бирниличила. ИлхIели мискинни сунела хъалибаргличила буриб, ва хьарбаиб сунела хьунуйс 100 арцла къуруш духес вирарал. Вачрукья кьабуликиб, амма вягIда бариб хьунуйзи илди арцлизирад сунес дигутицад дедлугниличила. Мискин хIейгу-хIейгули иличил кьабуликиб. Вачрукьяни хьунуйчи вягIдала шуртIрачила кагъар белкIахъес тиладибариб. Мискинни белкIунси кагъарра арцра дедиб.
Вачрукья архIяличи дуравхъун ва чумал бархIила гIергъи, баягъи шагьарлизи ваили, мискинна хъалибаргла унзализи кьутIдяхъиб. Унза абхьибси хьунуйзи илини муруйчирад кагъарра арцла 1 къурушра дедиб.
Кагъар белчIи, ил рикIар:
- Иш кагъарлизибкIун 100 арцла къурушличила белкIи саби…
- Нуни ил вягIда хIясибли сари хIед арц дедлугути.
- Илди арцкIун камли сари, нушала селра беркеси агарану, дайхъалалра диха.
- ВягIда хIясибли, наб дигутачир имцIали хIелугас!
- ГIяхIси хIебиалли, хIу викIуси биаб, амма дила ца тилади леб. Нушала суал бекIбарахъес, насихIят бурахъес, шагьарла кьадичи аркьехIену ваши.
Сай вархьли виъниличи вирхуси жагьил адам кьабуликиб. Илди кьадичи бакIили, илизи кагъар бедиб.
- Нуни бархьли аргъили виасли 100 арцла къуруш хIунира иш хьунул адамлира дутIес гIягIнили саби.
- ГIе, бархьси саби.
- Нуни бархьли аргъилрав, хIезибад саби дигахъуси иш хьунул адамли чум къуруш арцла кайсутил?
- ГIе, бархьли аргъилри.
- ХIебиалли бура гьари, чум къуруш дигулри хIед?
- Наб дигулра 99 къуруш, ишис биалли 1 бедес дигулра.
- Дебали гIяхIси саби! Деда илис 99 арцла къуруш, хIед биалли, 1 бати.
- Сен?! – вачавархиб вачрукья.
- СенахIенну, вягIда хIясибли, хIуни илис дедес гIягIнити сари хIед сецад арц дигулрил илдицад, хIед биалли 99 арцла къуруш дигулри.
Аъвяхъибси вачрукьяс цархIил бареси кахIелун, вягIда дураберкIни ахIенси.
