Супнала хабурти
Супнала хабурти
Кьиркьирдешличила
Марван абу Хафсли бахъ сай кьиркьир виъни багьандан диъ букуси ахIенри, мяхIкамдарибти арц дедили сунела къуллукъчи масла бекI асахъес урхьусири. Сен хIуни масла бекI гьалаб чебиусири или хьарбаибхIели, илини бурибсири:
"АнцIбукь нуни базарличир дирцути масла бургала багьа балнилизиб саби ва къуллукъчи ну виргIявиргес бажардихIеркур. Беркес бекI хIядурбаресра дахъал авара гIягIнити ахIен, диъ балкьарахъухIеликIун къуллукъчили илала бутIа сунени беркес вири. Масла бекIлизи, иличирти лихIбачи яра хIулбачи ил къячикалли, нуни итмадан хIясиббарес вирус. Илала дурабадра, нуни диъла декIар-декIарти жураби дукулра: хIули диъла ца сорт саби, лихIи--цархIил сорт, лезми--диъла хIябъибил сорт, кьакьари яра мехIе--илдира цархIилти журала сари. Илала дурабад, ну беркеси барес багьандан дирути аварализивадра акьуулхъулра. Илкьяйда, масла бекIлизир наб дахъал гIяхIдешуни лерли урдулхъули сари.
Васият
Имам Гъазалини лукIули сай, Египетлизив вебкIесли зягIипикибхIели имам ШафигIли ишкьяйда иб или: "Пулан адамлизи бурая дила кьаркьала бирцес вакIахъес". Ва имам вебкIибхIели, ит пулан адамлизи имамла хъарбаркьличила бурили буили саби. Имам вебкIибси хъули вакIибхIели, ил адамли имамли датурти белкIаначилси жуз хахъили сай ва илизи хIеризурхIели багьурли сай имамличиб верхIцIали азир дирхемла чебла лебли биъни. Илини чебла сунечи чебкабелкIи сай ва илкьяйда имамла хъарбаркь таманбарили сай. Ил викIули уили сай: "ХIера илкьяйда вирцахъес сайра ну имамли сунечи живарибси".
Унра
Ахмашла ца унра леври ил сунечи гьаман жиируси ва ишкьяйда викIуси: " Агь, хIу ца набчи ацIадри ва кьацIра зера халдарадри". Амма Ахмаш иличи укьес кьабулиркули ахIенри.
Ца гьачамра, гушиубси замана, Ахмаш сунела унрала гъайличи лехIахъиб ва иличи укьес кьабуликиб. Хъули абацIибхIели, унрани чула гьала кьацIра зера кадихьиб. Ил замана ца садакьачи музавхъун ва беркеси бедахъес тиладибариб, амма хъа вегIли илизи иб: " ХIела балагь хIезиб саби". Къарциндеш гIердаибсили гIурра тилади тикрарбариб. Хъа вегIлира гьалар дурибти дугьби илис тикрардариб. Садакьачи тиладиличил хIяйнайсра дугьайзурхIели, хъа вегIли хъя бариб садакьачи гIяхIъулали архIявкьялли ил тIерхьаличил витес.
ИлхIели Ахмашли садакьачи сунечи гъамиахъуб ва иб: "Арукьен яра хIед дебали вайтIа диркур, сенкIун сунени барибси хъя таманбирниличи иличив чекайзурси адам нуни хIелас. СецадхIи тиладиикIули калунал ил набзи сунечи ацIахъес кьацIра зера халдарес. Аллагьличил ﷻ хъя бирулра илдала дурабад наб илини селра кьумурлизи кахIебихьиб".
Сахаватдешличила
Кайс Ибад декIли зягIипи-кибхIели, иличи гьаббакIес илала узби бахъхIи бакIили буили ахIен или, хабар бурули бирар. Илизи сен хIечи узби гьабхIебикIути или хьарбаибхIели, ил викIули уили сай, сенкIун илди дила чеблалиубхIели музахIебулхъути саби. Ва илини бурили сай Аллагьли цIахсилизи халбируси саби зягIипси узиличи гьавхIекIни или. ГIур илини манкъушличи хъарбарили сай Кайслис чеблалиубти гьанна чеблумазибад азадбатурли саби или бурахъес. Илала хъули айцIуси ганзухъ бячахъи буили саби иличи музабулхъути адамтала бахъдешли.
Юлдаш
Ца адамличи илала гьалмагъ вакIили уили сай. Хъа вегIли: "ХIу сели набчи кири?", - или хьарбаибхIели, ил викIули сай: "Набчиб хIела авдарш диргьемла чебла лебси саби. Ну илини дебали кьакьавакIахъилра". ИлхIели илини дакIахъили авдарш диргьем дейгIи сай ва илизи дедили сай. Ил адам хIулбазир нургъбачил сунела хъули хьунуйчи чарухъи сай. Хьунул се бетаурли рикIухIели, илини жаваб бедили сай: "Ну висуси илини арц чардарни багьандан ахIенрану, ну сунечи музаухъайчи дила аги сен сабил хьархIебаъни багьандан сайра".
