Баракатла балбуц
Баракатла балбуц
Къизларлизиб ишди бурхIназиб Дурхъаси Кьуръайс хасбарибси балбуц бетерхур.
Иличи бакIибти хIурматла гIяхIли-ургав Дагъистаннизи бузерила архIяла дазурбазив вакIибси, лебил длунъяличив машгьурси вягIзачи, Идбагла ﷺ наслулизивадси шайх ХIябиб ХIусейн ГIябдулкьадир ас-Сакъаф леври. Илкьяйдали дунъяличиб машгьурти Кьуръан бучIанти, динна гIялимти, регионтала муфтийти, имамти, дагъистанланти ва бахъал гIяхIлира бархли. Балбуц гIядатлибиубливан Кьуръа аятуначил бехIбихьиб. ДехIиба замана баибхIели машгьурси Кьуръан бучIан Ремзи Ясин Эрли акбар белчIун ва лебилра цалабикибтани жамагIятла дехIибала дариб.
Балбуцличир зикруби, мавлидуни, нашидуни, ЧевяхIсилис ва илала бегIлара дигуси Расуллис ﷺ дезни зайдухъун.
Дагъистанничила сунела пикруми дурули ХIябиб ХIусейн Ас-Сакъаф викIар: «Дагъистанлантани гIилмуличи, гIялимтачи дурхъати белкIаначи хIурмат дакIубирни дебали дигеси анцIбукь саби».
Марлира дурала улкназибадти гIяхIлани нушала адамтани динничи ва динна гIялимтачи халаси хIурмат дакIубирни, гIилму руркъес дигни хIисаббирули гъайбикIули бирар. Дахъал далдуцуни дурадуркIули сари Дагъистаннизир бусурманти цабиахъес багьандан, уммат цIакьбиахъес ва балкIси гьунчи жагьилти кахIебизахъес багьандан.
Иличилара гъай детауртири балбуцлис гьалаб динна масъултала шайчиб дураберкIибси конференцияличиб. Илаб аргъбаибти суалти хIердирули гъайбухъун Дагъистанна Муфтиятла хIянчизарти, регионтала муфтийти, дурала улкназибад бакIибти динна гIялимти ва вягIзачиби.
Нушала республикализиб хIябал бархIи калунти гIяхIлани Дагъистанна чумал шагьарлизиб ва районтазиб гьунибаъниби дурадеркIиб ва вягIзаби делчIун. Илкьяйдали илди Дагъистанна муфтий шайх ГIяхIмад Афандичи гIяхIладли баиб.
«Дагъистаннизив ну 4 дус гьалавра калунсири, итхIейчиб гьанналис гьатIира гIяхIбизур. Дагъистан - шаригIятла кьяйдурти дузахъути, динна гIялимтала ахъси даражала хIурматбирути адамти хIербируси, урхIмешуахIенси мер саби », - викIар ХIябиб ХIусейн ас-Сакъаф.
Шайх ГIяхмад Афандини буриб, лебил дунъяличир митингуни ва цархIилтира низамагардешуни де-турхухIели, нушани лебилра исламла жагадешличил цабирехIе или.
Илдигъунти далдуцунани гьарли-марли лебилра бусурманти цабирули ва иман цIакьбирули саби. ЧевяхIси Аллагьли ﷻ имканти габ гIуррара илдигъунти мажлисуни дурадуркIахъес. Амин!
Наида Гъуруева
