Салаватла дурхъадеш
Салаватла дурхъадеш
Машрикьла хабурти
Гьачам машгьурси имам ХIясан аль-Басричи ца гьести гIямрула хьунул адам ракIили, пашманни рикIар: – ХIурматла шайх! Бара гьаларван дила цайли–цаси рурси ребкIиб, нура анцIкьила цIализир ратурли. Нуни илгъуна децI чекасес хIерирус. Бурсирарабагу ну балгаличи, наб муэрлизир рурси чераили, дила гIязабти камдиэсли. ХIясан аль-Басрини илала мурад бариб.
Хьунул адамли муэрлизир сунела рурси чераиб, амма илала шишимъала гьатIира имцIадиуб. СенкIун илала рурси кахти гIязабтазирри: цIализир, хъябличиб цIала рахаж лебри, кьяшмира някъбира дигьи, ил цIализибси къирлизи карихьири. ГIергъила бархIи хьунул адам рисули имамличи ракIиб.
– Наб муэрлизир рурси чераира, ил жагьаннаблизир сарри! Иличир цIали игути къирла палтар лерри, ил ралли цIализир сарри!
ХIясан аль-Басрила хIулбазир нургъби дакIудиуб ва селра эс хIейуб. Илала мякьлаб каршибикибти имцIатигъунти бисулри, чула ахир сегъуна бирарал пикрибарили.
Чумал бархIи ардякьи гIергъи имамлис сай вебкIили муэр чебаиб. Ил Алжанализив сайри. Илис жагаси хъали гьалабизур, илала гьалар жагьси хьунул адам лерри. Ил жагати палтарли регIриублири, бекIличиб шалабикуси таж лебри.
– Ва имам, ну ралулрав хIуни.
– АхIенри, чи сарри хIу?
– Ну ит хIечи тиладиличил ракIибси рухънала рурси сарра.
– Рурси, хIела нешли хIу цIали игули чераиригу. Секьяйда хIу ил даражаличи арикири?
– ХIурматла шайх, ну ва гIуррара азиртадли адамти хIябразир гIязабтазирхIели, ца адабчевси бусурман хIябрази вакIили, балга ва Расулуллагьлис ﷺ салават белчIи илис кири хIябразибти бусурмантала рухIличи бархьиб. ИлхIели нушани тIамала аргъира: «Ил салаватла хIурмат багьандан илди гIур гIязабмабуркIидая». Илала гIергъи нуша гIязабтазирад акьудатурра ва ишгъуна шабагъатличи лайикьдикира.
Ца адамли белчIунси салаватла гIяхIдешличибли илгъуна кири биули биалли, дусмадли гьар бархIи дахъал салаватуни дучIутас сецад кири бирарал пикридухъеная.
