Давлачевси ва мискинси мурул
Давлачевси ва мискинси мурул
Ца пулан хьунул адам давлачевси вачрукьяс шери рякьун. Илала халаси тукен лебри. Тукейзир жура-журала чIянкIи ва палтар-кьяш дирцулри. Амма илала мурул дебали кьиркьирсири. Ца бархIи муруй гIяргIя асили, хурег барахъес тиладибариб. Хьунуй хурег балкьаахъурли, букес хIядурбикIухIели, унзализи кьутIдяхъиб.
Вачрукьяни унза абхьибхIели илав мискин адам леври, сайра дебали гушиубли беркеси тиладибируси. «Аллагь чевверхаб хIечивад, агри-гаши хIедиалри ну хIечи дугьахIелзаси…» Вачрукьяни ил вяввариб, ва бурусиличи лехIхIейзурли илала къянкъубала гьалар унза кьяпIдариб. Илала тIамала бакьибси хьунул рикIар:
- Сен хIуни мискинна гьалар унза кьяпIдарири?
- ХIед нуни се барили дигулири? – викIар гIясили мурул.
- Илис камси-биалра гIяргIяла кесек бедес виригу, яра дукала гаши ахъахъес…
- Лебилра дукала?! ХIу абдалриублирив?!
- Илис гIяхIси девалра бурадри…
ГIяхIцад замана арбякьун. Гьачам мурул тукейзи вакIибхIели, илизи цIадикили чебаиб. Селра берцахъес бажардихIейкиб, чIянкIи, палтар, тукенра бархли цIали дигуб. Пашманни хъули чарухъи илини хьунуйзи бетаурсиличила буриб.
- Шишимъайзи маркуд дила мурул, ЧевяхIсила уркIецIиличи вирхен, Аллагьли ﷻ хIед гIяхIдешличил чарбиру…
- Эй, хьунул, лехIризи набчи… гьари рукьен хIела дудешла хъули, ил гIяхIдеш бакIайчи… хIед харжикIес хIейрусра ну!!
Илкьяйдали вачрукья хьунуйзивад декIарикиб.
Амма ЧевяхIси Аллагьли ﷻ илис гIяхIдеш гIеббаахъиб, ва ил цархIиллис шери рякьун. Ил мурул сахаватси, уркIецIичевси, гушти балхуси, сунечи дугьаизурсила мурад бируси сайри.
Ца бархIи мурул-хьунул хурегли букухIели, унзализи кьутIдяхъиб. Хьунул унза абхьес рякьи, чарриубли рикIар:
- Итав гушси мискин тев, ва камси беркеси тиладибирули сай.
- Беда илис ца гIяргIя, нушаб цара биурну… АллагьликIун нушаб гиб, нушачи дугьаизурси гушли чархIейрехIе…
- ХIечивра сахаватси агара! - или хьунуй мура ибси бариб.
ГIяргIяра мискиннис бедили чарриубхIели, илала хIулби нургъбани дицIилри. Муруй хьуна нургъби чедаили, хьарбаиб:
- Се бетаурли, дила ахIерси?
- Ну рисусира пашманти гьанбикуни чедакIили… Ит вакIибси адам, хIуни гIяргIя бедахъес бурибси, дила цаибил мурулли уввухъун..! ГIур илини иличила ва илала кьиркьирдешличила хабар буриб. Илкьяйдали хьунуй гьанбушиб чучи вакIибси мискин вявварили, селра хIебедили дугIаъниличилара.
- Марисуд, дила ахIерси! Ит вакIибси хIела цаибил мурул виалли, итини гьавяхъибси мискин иш ну сайра…
