Нешлис цIуба гIинтла вавни дигахъу…
Нешлис цIуба гIинтла вавни дигахъу…
Октябрь базла гIядатла бархIи сабри. Кухнялизиб буркьа чайник руржулри, унраличибси квартирализибад чила-сабрил берубси, бухъянси хъехIла чебихулри, дила хъулиб гьалабла телевизор гъайбикIулри. «Шагьарла ца кьакьалаб гьунчиб бехIемцI кабикили саби, лебси мерличиб шофер ва риштIаси рурси алхун, - селра хIебиубсиван, паргъатли бурулри телеведущаяни, - ребкIибси рурсила неш, декIси агилизир сари, больницализи караркьили сари».
БебкIиб, кабушиб, белгьун, баргбердиб ибти ва цархIилти такьсирла анцIбукьуначила бурути баянтани нушазирти адамдешла лишанти илцадра кьутадарили сари, даг гьигьрикIули, гIямруличи шадли лерси риштIаси жан ребкIили сари ибси хабарличи, гIур иш дунъяличир агниличи нуни сегъуналра пикри бяхIчихIеира.
«Тукейзи рукьес гIягIнили саби», - гьанбикиб наб, асес гIягIнити секIайчила пикрирумази ахъира.
ГIергъила бархIи савли тукейзи рякьунра. «Шампунь… шампунь гIягIнили саби. Юлдаш рурсилис савгъат, - багьласи къунзлизир пикририкIулри ну, - арц калалли, шала-манавша рангла хIулби-алав диканти исис».
Наб бегI гьалаб цугбикибси тукен илцад-декIар чебаэс жагаси ахIенри, биалра, илаб се бирцулил хIеръэс арацIира. КIантIити хIязла гIягIниахълуми, начурби ва дахъал цархIилти секIал чедиулра. ЦархIил шайчир диштIати бадрумазир удатурти вавни, голландияла гIинт вавни, лилияби (кьяца вава)…
Кассала мякьлав виштIа-си дурхIя тIашлири ва уркIецIидухъесли тукенчизи селичила сайрил гъайикIулри. «Иш начи асес хIела арц диули ахIен, гьай гIяйиб», - дурхIяла уркIи аргъибси тIамаличил буриб тукенчини, илала някъбазибад начи сайсули.
ИлхIели виштIаси урши набчи шурвяхъиб ва хьарбаиб: «Начи асес дила арц камли сари или гьанбиркулив хIедра?». Нуни илала арц дейгIунра ва ира: «АхIерси, марлира, хIела арц камли сари, хIед дигуси секIал асес хIейруд». ВиштIаси урши хIулби черхIевдули, начиличи хIерикIулри.
Нуни илизи хьарбаира, илини хасли ил начи сен декIарбарибсил, ва асес дигалли, нешличил тукейзи вакIахъес бурира.
«Иш начи асес дила рузис дебали дигусири. Ил акIубси бархIилис ил начи пешкешбарес дигусири наб! – иб дурхIяли пашмандешличил. – Наб ил начи нешлизи бедес дигахъаси, сари рузичи аррякьунхIели, илис пешкешбарахъес багьандан».
Уршила хIулби нургъба дицIиб. «Дила рузи Аллагьличи ﷻ аррякьи сари. Илкьяйда викIули сай дила дудеш. Гъамливан нешра Аллагьличи ﷻ аркьуси сари, илис сайра наб нешлизи начи бедес дигуси, рузис бедахъес». Дила уркIи хапли тIашбизурсиван бизур. ВиштIаси дурхIя набчи хIеризур ва иб: «Нуни дудешлизи ну чарухъайчи неш архIярукьяхъес тиладибарра… Рузис икI начи асес вирус или гьанбикибсири». ГIур набзи илини сунела сурат чебаахъиб. Суратлизив урши разилири ва дукаркIулри.
«Нешлизи дила суратра бедес дигулра, ну хъумхIертахъес. Наб неш дебали дигахъулра, амма дудеш ил рузичи аррукьес гIягIниси сари или викIули сай». Нуни къалабали дила кошелек касира ва уршиличи дугьаризурра: «ХIела арц сагали дуйгIехIену гьари, илди диур или гьанбиркули виадли». Илра шакхIейкахъили, нуни илди арцлизи дила арц чедихьира. Начи асес даари арц лерри, имцIатира калун. ВиштIаси уршили разидешличил тIамадариб: «Баркалла, Аллагь ﷻ, наб арц гибнилис! Дугели кайхьес гьалав, рузис начи асахъес наб арц гахъес Аллагьлизи ﷻ тиладибарибсири. Илини дила тилади бакьиб! Наб нешлис гIинтла вавнира асес дигусири. Амма иличила нуни селра хIеира, Аллагьли ﷻ биалли наб начира вавара асахъес арц гиб! Нешлис цIуба гIинтла вавни дебали дигахъу!»…
Ну тукейзирад тамашала хIяйзир дурарухъунра. Ил дурхIя хъумартес рирули ахIенри нуни. Дугели карихьес гьалаб бекIлизи ца пикри бакIиб: эгер ит бехIемцIлизир ребкIибси риштIаси рурси, ит дурхIяла рузи риэс?..
ГIергъила бархIи больницализи зянкъдяхъира ва бехIемцIлизи рикибси, декIси агилизирси хьунул адам сен сарил хьарбаира. Набзи хьунул адам гIергъила бархIи аргъайзи хIеракIили, таманриъниличила буриб. Нургъбани гIяндруршусиван нуни трубка кабихьира, гIямрулизиб серил барсбиубсиван бизур… Ит виштIаси уршила пашманти хIулби ва илала биштIаси някълизибси цIуба гIинтла вава нуни гьачамалра хъумартес хIерирус…
