МУСЛИМАТ

Ца жагьси рурси шери рякьи гIергъи, муруйчил ва илала нешличил рарх хIеррирулри. Илини муруйс ва илала нешлис къуллукъбирулри. Илис хъубеш неш сунечи гьими-кьясли рицIибсиван билзулри. Гьаланачи, илала гIяйибтачи пикри бяхIчихIейэс кьасбариб, амма бархIиличи-бархIи хъубеш нешла уркъбяхъуни чекайсес къияннири. Илини кьасбариб хъубеш неш чучирад тяйдирарес. Жагьси цIикури сунела дудешла тянишси вачрукьячи ракIиб ва рикIар: «Ну дила хъубеш нешличил гIур хIерриэс хIерирус. Ну илини инжитрирулра. Кумекбара наб, хIед гIяхIси багьара лугасрану, бица наб агъу». Вачрукья викIар: «Дила рурси, ракIи жагIял, нуни се-биалра пикрибирисну».

Ил гIурра чарриубхIели, вачрукья викIар: «Нуни хIед кумекбирисра, амма кIел секIал аргъа. Цаэсил, хIуни хъубеш неш цагьакIли агъуларарили ребкIахъес асухIебирар, сенкIун адамти шакбиркур ил секIал хIуни барниличи. ХIед нуни кьар лугасра, багьлали ил агъулариэсти, ва чилалра бекIлизи хIякьян ил хIуни ребкIахъни. КIиэсилра, тамай хIечи бирхауди бихьахъес ва хIечирад ташмишдеш черардукес багьандан, хIела гьимиличила хъумарта. ХIуни илала хIурматбирен, ил дигахъен, илини ибси бирен ва сабурчерсили рии. Или барадли, ил ребкIибхIели хIечи чилалра ташмишдеш ахIелкIан. Жагьси хьунул адам илини бурибсиличи кьабулрикиб, касили илини дедибти кьарра аррякьун. Хъули ракIили, илини хъубешлис бируси хуреглизи камкамли кьар гъудурдиресрииб. Илала дурабад цIикурли иличи гIясихIерикIули, къайгъи имцIабариб, мурталра пишряхъили гьунириули, хIурматбиранриуб.

Хъубешли ил сунечи секьяйда рарсриубал чераибхIели, уркIиуркIиларад цIикури дигахъескарииб, ва лебтазилра сунела цIикурили дарибти гIяхIдешуначила гаприкIесрииб. Байхъала дус дикили гIергъи, илдала бархбас нешлара рурсиларагъуна бетаур. Гьачамра рурси ракIили вачрукьячи тиладирухъун: «Аллагь ﷻ багьандан тиладибирулра, рерцахъа дила хъубеш нуни илис бедибси агъулизирад. Наб хIейги ил ребкIахъес, ил дунъяличир бегIлара гIяхIси хъубеш сари, наб ил дигахъисра». Вачрукья пишвяхъили викIар: «КьакьамарикIуд, нуни хIед сегъуналра агъу гибси ахIенри. ХIед гибти хуреглизи бизидешлис дархиути кьар сарри. Агъу ил хIела бекIлизиб сабри лебси, гьанна илабра агара…»

ХIЯДУРБАРИБСИ – НАИДА ГЪУРУЕВА

ДяхIла маска

Крахмалличилси маска

ГIяваси дяхIла камла бегIтас кумекбиру крахмал дархаили барибси маскали. Илини дяхIличирти дибгIянти тIярхъубира (поры) диштIадиру.

Илис гIягIнидиркур:

1 гидгарила цIуба;

2 чяйла кьулса варъала;

1 халаси кьулса крахмалла. Гидгарила цIуба хьулухьмадбикахъили, илизи варъа бархаая ва крахмалличил гъудурбарая.

20 минут батурли, гьала-гьала ванати шинничил, гIур дяргIибти шинничил бирцая.

Хурег балкьарахъни

Брокколила нергъ

Нушани гьалабра бурибсири брокколи букалли, кьаркьайзирти имцIати зе ва шин дурайути сари или. Гьанна хIушаб нергъла рецепт гьалабирхьулра.

ГIягIнидиркур (4 порциялис):

шин – 3 стакан;

картошка – 2;

жерши – 1;

капуста брокколи – 200 гр;

набадари – 1;

итан жерши – 1 цула;

зайтунна гIявадеш – 2 халати кьулса;

зе – 1 чяйла кьулса.

БибгIянбарибси жерши зайтунна гIявадешлизиб берцIая, кьунбадли набадури ва картошка дурсая. Калунти гьар секIал гъудурдарили, шин кертIая ва 20 минут руржахъеная. Илди дяргIибхIели, блендерлизир дибгIяндарая. КIинайсра шанглизи кертIили, гIягIниси кьадарла ванадарали держая. Беркала ашагьаб!

НасихIятуни

МакьлатIис

Умхьни, шпилькаби, бурбуни яра цархIилти дибгIянти мегьла гIягIниахъалуми детхIейхъахъес багьандан макьлатIисла мякьла кадирхьес вирар.

Дабри

Гьар дусла манзил арбякьунхIели, дабри умударили урисалли, шкафлизиб камси мер бурцу. ТIакьнази кадихьес гьалар, дабри духIна кагъурти кадихьили дицIахъес вирар, куц хIебуахъес багьандан, хаслира суранна дабрилизи.

Дис

Кухнялизир гьаман дузахъути дисби дугадарес багьандан 30 минут зеличилти шиннизи кадихьая. Дисбала бугадеш жявли бетихъуси саби дуцIарти шинничил ицалли.

Кьалтин

Дебали нясхIебиубси кьалтин умубарес вирар дибгIянти зе какьурли. Кьалтин тIинтIбарили, иличи дибгIянти зе писдарили, камси заманалис батирая. ГIур шинкIабарибси щеткаличил бушкалли, умубирар.

КьацI

КьацI чIумахIебиахъес багьандан ил кьачIализи ахIи, шишала яра урца тIалхIянализиб бихIес гIяхIси саби. ЛутIилизи камти зе писдаралли, ил жявли шянкIхIебирар.