Исламла тарихла закличир рурхIути урми

МухIяммад Идбагла ﷺ асхIябти хьунул адамти

Умм ХIарам бинт МильхIан

Ил Умм Сулаймала рузи сари, (иличила нушани 2023 ибил дусла 2 – ибил номерлизиб белкIунсири) ва Маликла урши, машгьурси асхIяб Анасла нешла рузи сари.

Ил Самитла урши ГIубадла хьунул сари ва Идбагла ﷺ ниъла нешла рузи сари. Илала урши МагIун къуюла мякьлабси дявилизиб шагьидла бебкIали алхун. Ил кьутIкьуси децIлизиб илини сабурбариб, ЧевяхIсила шабагъатличи хьулрикIули.

Умм ХIарам Идбагли ﷺ Мадинализи вакIибхIели тIашбатурси Къуба мижитла магърибла шайчир хIеррирусири. Ил ислам диннизиб бегI гьалаб тIашбатурси мижит саби. МухIяммад Идбаг ﷺ ил мижитлизи вашусири ва илис балгни дирутири, илала хIурматбирули, ва Аллагьличи ﷻ илис дугIяличил дугьаилзусири.

ГьархIели мижитла мякьлавад вашухIели Идбаг ﷺ иличи айцIусири, цацахIели илаб бамсриихъусири ва дехIибала дирутири. Ил ГIубад бинас-Самитла хьунул сарри. Цагьачам Идбаг ﷺ Умм ХIарам бинт МильхIанничи ацIибхIели, илини илис хурег гьалабихьиб ва илала бекI умубиресрииб. Аллагьла Расул ﷺ илхIели усаун ва дукаркIули чеваргъиб. Илини хьарбаиб сен дукаркIусил.

Идбагли ﷺ жаваб бедиб: «Муэрлизиб дила умматла цацабехIти адамти Аллагь ﷻ багьанданси дявилизиб набзи чебаахъиб. Илди ил урхьула дайлаб тахличибти пачни кьяйдали кабиилри».

Умм ХIарамли бурусири: «Нуни илизи тиладибарира: «Я Аллагьла Расул ﷺ, Аллагьличи ﷻ дугIяличил дугьавизи, нура илдала лугIилизирад риахъес!» Илини жаваб гиб: «ХIу – бегI гьаларти къяяназир сарри».

Халиф ГIусманна замана МугIавия бин Абу Суфьянни Кипр буцес ихтияр сасибсири. Илини цаибил бусурмантала урхьула флот акIахъубсири. Ил гамурбала гIяскарлизир Умм ХIарам сунела мурул ГIубада бин Самитличил лерсири. Кипрличи баибхIели, бусурманти душма мер-мусаличи баибтири дявила ахтарди дураберкIес. Умм ХIарам мерличи раэс эмхIеличи ариибхIели, ил селизибадрил урухбиубли, ил уряхIрушиб. КарикибхIели Умм ХIарамла хъяб бячун. Илкьяйдали илини гIязабти чедаиб ва Аллагьла Расулли ﷺ бурибси караматдеш бетаур. Умм ХIарам Кипрличир хIяририхьибси сари, илала хIяб гьаннара кали саби.

Ил бусурмантала цаибил урхьула архIя сабри. Ил дявилизиб римлянтачиб бусурманти чедибикибтири. Сунела рузи кьяйдали Умм ХIарам гIяхIси ва уркIецIичерси рирусири. Илини Идбагличирад ﷺ 5 хIядис даахъибтири. Иличирад биалли, илди чебяхIти асхIябтани ва табигIинтани даахъибтири. Аллагь ﷻ разили калаб cунечи, ва нушара иличил дарх ЧевяхIсила ГIяршлиур Кьиямала бархIи цаладяхъяба. Амин.

Исламла тарихла закличир рурхIути урми