Духуси хьунул лебил дунъяла маслизи рулхъан
Цагьачам, халаси гIибадат барниличил декIарухъунси Аллагьла ﷻ валичи малаик вакIиб. Малаик вализи викIар: «ХIуни халаси гIибадат бирни багьандан Аллагьу ТагIялани ну вархьибсира хIечи, хIед се дигадлира тиладибара набзи». Ил адам викIар: «Иш дунъяла маслизибад наб селра хIяжатли ахIен, дила гIямал бареси Аллагьли ﷻ наб камбирахъули ахIен. Ахиратла биалли, ну ЧевяхIси разивикниличив имцIали хьуликIуси селра агара». Малаикли илизи иб: «Аллагь ﷻ хIечи разили сай, хIела уркIилис гьатIи селра хIейгули хIебуарну, тиладибара се-биалра». ИлхIели ил адамли иб: «Наб гIяхIси, иманчерси хьунул риубли дигахъаси».
Малаик арякьун, илис дигусира бариб. Камси замана дикили гIергъи, валис мекъ барили хьунул киб. Илди балкабикили барх хIербирулри. Марлира, хьунул Аллагь валуси, иманчерсири. Ил секIайчи мурулра дебали разилири. Илдала мекъличи бакIибтани дихути савгъатуназирадли цакамти арцра учидикили лерри. Ца бархIи хьунул муруйзи рикIар: «Дила мурул, нушала арц лералли, ца кьял исехIегу. Ниъра дирар, къачара бирар, хIяжатбикалли, белгьи диъра касес дирехIе». Мурул ил секIайчи разивикиб, ва касили арцра базарличи арякьун. Илаб илини жагаси кьял баргили, асили илра хъули чарухъес вализурхIели, маза дирцуси адамличи къаршивикиб. Маза дирцусиличил илала ихтилат бетаур, ва илини буриб хьунуйчил барх кьял асес пикрибарили асибси саби иш кьял или. Маза дирцан илизи викIар: «Се бируси хIед кьял, гьачам белгьадли, гьатIи агарли кавлусири. Чарбарили ил кьял аса маза, илди имцIадикIар, дигухIели белгьи диъра бирар, хIенкьра имцIабикIуси саби». Ил пикриухъи, маза асес хьулухъун. Чарбарили кьялра, маза асиб. Ардукили мазара хъули чарулхъухIели, гIежни дирцан къаршивикиб. Иличилра ихтилат бетаурли, илизира сай базарличи вакIнила мурад буриб. ГIежни дирцан илизи викIар: «Дила узи, се дирутив хIед маза, илди имцIадиайчи укхIевкуду? Чардарили илдира, гIежни аса, илдала ниъ дирар, ниълизибад бурт, нуси барес вируд. ГIур гIежни имцIадиубхIели, хIяздухъунхIели белгьи диъра бирар». Ил гIурра пикриухъун, ва гIежни асес хьулухъун. Чардарили мазара, асили гIежнира хъуливяхI ватихьиб. ГIурра гьунчив кьапIни дирцан къаршивикиб. Иличилра ихтилат бетаур ва илизира сунечила хабар буриб. КьапIни дирцан илала хабарличи лехIизур, гIур викIар: «Дила узи, се дирутив хIед, хIяйвантира, мазнира, гIежнира? ХIуни ца гIяхIси кьапIа аса, илини хIела багьа ахъбурцу. Хьунулра разили рирар, сунела хIугъуна мурул левниличи». Ил пикрира илис гIяхIбизур. Чардарили гIежнира, асили дурхъаси кьапIара хъули гьайвиуб.
Лебил базарра умцIули, ца цалис барсбирули, замана арбякьун, бархIира ахъиб. Хъули чарулхъухIели, хIеркIличивад шалгIевухъес хIяжатлири. ХIеркIла дубла тIашбизурли сунес кьял, маза, гIежни ва кьапIа дицибтира лебри. Илди хъули чарбухъес бажардихIебикили тIашбизурлири. Валини илдира сунечи арбукес кьасбариб. ХIеркI ахъес балбизурхIели, сунела бекIличибси кьапIа кабикиб, ва хIеркIли арбухиб. Сайра дебали пашманвиуб, амма бархтира хъули кили вакIиб. Хъулир илдас разити дяхIличил хьунул гьунираиб. БакIибти гIяхIли чебаибхIели, гьатIира разириубли, декIардекIарти берклумани стол бицIахъиб. Мурулра, гIяхIлира букун, бамсрира ахъиб. ГIур кариили мура мякьла рикIар: «Дила мурул, се барри, бикибу нушаб кьял?». Мурул пашманси тIамаличил викIар: «Кьял бикиб, асира. Амма гIур пикриухъунхIели, кьяйчир маза гIяхIтигу или маза сасира». Хьунул рикIар: «ХIябра бекI хIебузуси лерра кьалли ну. Маза марлира гIяхIтигу кьяйчир, дигухIели диъра бирар, мазара имцIадикIар. ХIябра гIяхIси барили леври хIуни маза асни. Чинара маза?». Мурул викIар: «Маза сасибхIели, ну гIурра пикриухъунра, мазначир гIежни гIяхIтигу или, гIежни сасира». Хьунул рикIар: «Марлира, дила мурул, гIежни гIяхIти сари, ниъра дирар, ниълизибад нусира, цархIилра барес вирар. Илдира имцIадикIутину, диъра камхIебирар. ХIябра гIяхIси барили леври гIежни сасни. Чинара илди?». Мурул викIар: «ГIежни сасибхIели ну гIурра пикриухъи, илди лерил секIайчиб, вегI адамти-ургав багьа ахъли чейахъуси кьапIа гIяхIсигу или кьапIа сасира». Хьунул гъинчIряхъили рикIар: «Дила ахIерси, хIябра духуси барили леври, бугIярхIели дягIра чехIейгур. Арадеш биалли, гIурилти лерил дарес вирар. Чинаба кьапIа, чебаэс дигулра?». Мурул викIар: «Хъули чарулхъули, хIеркI ахъес вализурхIели, кабикили кьапIа хIеркIли арбухиб «. Ил бакьибхIели хьунул хъябруцрикили иличи, шукру биаб Аллагьличи (с.т.) хIу кахIейкили кьапIацун кабикнилис или, рикIар. Илди чебаибти гIяхIли тамашабиубли, хIякбизур. Илгъуна хьунул адам илдани гьалар чераибси ахIенри. Ит кьял бирцусини илдас кьялра батур, маза дирцусини мазара батур, гIежни дирцусини гIежара батур, кьапIни дирцусини бегIлара жагаси кьапIара бедили, арбякьун.
Гьанна нуша пикридухъахIелли, иш хабарлизибсиличи мешуси анцIбукь нушала гIямрулизиб бетааллири, мурул-хьуна ургар сецад къалмакъар детарил? Къалмакъар дирнилизибад се барсбируси? Бетаурси анцIбукь чарбарес вируси ахIенгу. Бетаурсиличи разили калалли, сецад жагали биэсара? Гьарил кабиркуси, гIяхIси биаб, вайси биаб ЧевяхIси Аллагьлизибадгу (с.т.), Илала амруличи сен разихIедиркутира? Сен нушала ургала белхъусира? Марлира, сабур Аллагьлизибад (с.т.) саби, гьалаквикIни -– шайтIайзибад.
