ГIянжила кьялши

ГIянжила кьялши

Ца Аллагьла ﷻ валини бурибсири: «Гьачам муэрлизив нуни вебкIибси адам чеира ва илизи хьарбаира: «Се бариба хIед ЧевяхIси Аллагьли I? Секьяйда гьуниваиба? ХIечиб се аги саби?» Илини жаваб чарбариб: «Нуни дарибти гIяхIтира вайтира баркьудлуми умцантачир дитIакIибхIели, дила бунагьуни имцIатили урдухъун. Ил манзил дила гIяхIти баркьудлумала шайчибси умцантачи чедибад тавра кабикиб, ва ил сабабли гIяхIти баркьудлумала шали бунагьуналайчиб декIбиуб. Ил тяхIярли ну верцира.

ГIур ил тавра абхьибхIели, илар кьялши бицIари гIянжи чедаира, муртрил нуни бусурман хIяриирхьухIели, хIябличи игьубти. РухIуль-Байан, 3/137. НасихIят: Дурхъаси Кьуръайзиб бурули саби: «Чили мискьалла заррацад гIяхIдеш баралра, ил чебаили бирар». Адамли цалра гIяхIси баркьуди камсилизи яра мягIничебдеш агарсилизи халбарес асухIебирар, ил камси биаб, халаси биаб. Адамли мурталра гIяхIдеш бирес кьасбирес гIягIниси саби ва илини илис шабагъат кайсу. Асубирар, сегъуна-биалра камсилизи халбарибси гIяхIдешлира адам жагьаннаблизивад верцахъили, Алжанализи айцIахъусили биэсра.

Бусурман адам хIяриирхьухIели, жаназала дехIибала дирнилизиб икьалабарни, бусурмантала цала гьалабси цархIилла чебла саби. Илис халаси шабагъат чебаахъибси саби. Мисаллис, бурули саби Аллагьла Расулли ﷺ бурибси: «Чили вирхули ва хьуликIули Аллагьла ﷻ шабагъатличи жаназала дехIибайчив ва хIяриирхьухIели бусурмайс икьалавиаллира, илини кIел карат кирила кайсуси сай. Жаназала дехIибала дарибсилис, шабагъат бирар ца каратла кьадар. Гьарил карат биалли, УхIуд дубурацад бируси саби.

МАШРИКЬЛА ХАБУРТИ