Юсуф Идбаг
Иш дунъяла жагадеш Зулайхас цIябкабиуб,
Хурегла тIягIям агу, я хIулбас гьанкI агара:
Аррякьи ил туснакъла къапулигIи тIашризур,
УркIилизиб дардличил хIулбазир бисаличил,
Руржуси тIамаличил Юсуфлизи гъайрухъун:
- Туснакълав сайра или вари хIед гьанмабикаб,
Иш дунъяла туснакъра, цIябдешра наб сарину.
ГIязабтазивра или, вари пикрира майкIуд,
ГIязабтира, цундешра, кьакьадешра наб сарну…
Юсуфлис туснакълизиб кIел адам юлдашбиуб,
ГIязизлис буку-бужан бирути сабри кIелра.
Ца дуги туснакъчиба муэрти чедаилри.
Чедаибти муэртас Юсуфли тягIбил буриб.
Ца кавшили ца ватес - тягIбилти дархьли дакIиб.
Азадвалтусиличи Юсуфли хъаркабариб:
ГIязизлизи набчила ца-чумал гъай дура, - иб,
Муэртас тягIбил барес балулри Юсуфли, а,
Ихини буриб тягIбил бархьли бакIиб нушаб, а.
Азадватурсини хъумкартур Юсуфла гъай,
ВерхIел дусла замана калун ил туснакълизив.
Туснакъла ухIнавадли ахъси тIярхъилавадли,
Халкь башуси гьунчивяхI хIерикIули калун сай…
Шамла улкализибад лябкьулри ца хIуреба.
Сунела улкала халкь биъни илис марбиуб.
Карвайзибад ца валри адам кьяйда, гъайбухъун:
- Ит хIела дудеш Якьуб панавиуб висули,
ЦIудар муцIур хIянбиуб, цIакьли хIялагарвиуб.
Валрила гъай аргъили, Юсуфли биса картIиб.
Валрила вегI хьарваиб чинавадсири или.
- Ну КIангIяннизивадра. Баладу хIуни галга,
Сунела вецIну кIира жагати кьяли лерси?
БегIла жагаси кьяли чеббяхъибси галгали,
ЧеббяхъибхIейчирадли биса картIули саби.
Мисал багьур Якьубла, Юсуф хIяйраниахъуб.
- ХIед чи бикIара или, - Юсуфлизи хьарбаиб,
ЦIакьдешли дард-шишимла, Юсуфли селра хIеиб.
- Туснакълавил гъарибла саламти дура хIуни.
Дила халал кьакьадеш Якьублизи марбара.
Валрила вегI базриган КIангIяннизи ветаиб,
Якьубла юртла гьала тIашизур, тIамадариб.
Юсуфла рузи Дина къалабали гьарракIиб,
ХIела мурад, хIед дигул бура или гъайрухъун.
- Мисрилав тев ца гъариб, набзи тиладибариб,
Якьублизи сунела саламти духагу, иб.
Дина къалабарикиб, дудешличи аррякьун:
- Нушала юртла гьалав саламикIуси лев, иб.
Дураухъун, хьарвиб. – Чинавад лявкьусири?
Жаваб бедиб малхIямли. – Ну Мисрилизивадра.
Мисрилизибил кьяйда гьар секIал баяндариб.
- Сунес чи бикIусири, сай хIуни чеваадив?
- Нуни сай чехIеира, я у багьхIебагьурра,
У багьес дигукъира, сунени бурхIебуриб.
Якьубли тIамадариб, Юсуф уркIила вакIиб,
- Я дила тIутIул урши, уркIила цIедеш дила!…
Дай дугила замана ГIязиз муэрлизиври;
ЦIакьли чIукьа кьулани, цIерхьти кьули дугулри.
Юсуфли туснакълизиб хъарбарибси юлдашли
Ил замана бикайчи хIебуриб хъумкартурли.
Ил хIяйзиб гьанбикили, ГIязизлизи багьахъур:
- ХIела муэрлис тягIбил Юсуфлицун биру,- иб.
Юсуфличи ил адам ГIязизли ватураиб.
Някъби-кьяшми байдариб, сунела такьсир буриб…
Ит нушала талхъанни чебаибси муэр леб,
Илис тягIбил барахъес ну хIечи вархьибсира.
- ВерхIелра цIерхьти кьули, хъу дерхъибти дусми сар,
ВерхIелра чIукьати кьял – гашала дусми сари.
ГIязизлис хIяжатбиркур ризкьи дашул дусмазиб
Халкь бузахъес гьирбарес, хала ванза гьайбарес,
ГIяхъибти лерил ризкьи мяхIкамли харжкадирес.
Муэрла тягIбил хили, ил ГIязизличи вакIиб.
ГIязиз цIакьли хIулукIиб, вазирличи хъарбариб:
Туснакълизивси Юсуф сунечи кахъес буриб.
Халал хIурматбарили тахличи Юсуф катур,
Улка бузахъен или, сунези ари бедиб.
БегI гьалабси яргалис арила вегI Юсуфли
ГIязизла туснакълабти лебилра акьубатур.
Ца кIел баз дикибхIели, Мисрила ГIязиз вебкIиб.
Юсуфли халкь багьандан халал пикри харжбариб:
Шими сагадирули, хъуми имцIадирули,
Дубурти ва къадурби сагадан гьайдирули.
Ризкьи калкьути мусни – курани хIядурдариб.
ВерхIел дус хъуми дерхъиб, ризкьи мяхIкамли дихIиб
Дегъбиубли верхIел дус ризкьи бекIлил хIедакIиб.
Алавчар улкначира гушдеш гъамдикIес дииб,
Асес ризкьи агарли бахъал халкь гIяжизбиуб.
Лерилра гушти дусми Юсуф гушли ардякьун,
Дебали ну велкъасли, халкь хъумкартисра или.
Гьар базлизив цагьачам, юлдашуни букили,
Шимачи чедиулхъи, амру, буюр дурули.
Ца бархIи Якьублизи сунна уршби гъайбухъун:
- Нушачи хIерхIейзурли авцIали дус ардякьун,
Нушала хатIаличи нуша мукIурли сарра,
ЦархIилтасван нушабра ризкьи кьакьали сари,
Аллагьлис ﷻ балга бара ризкьи тиладидара…
Илдази дудешли иб: - Нуни хабар аргъира
Ит Мисрила ГIязизла ризкьи тиладидарес
ЦархIилти улкнала халкь асес башниличила.
Дукьеная хIушара Мисрила ГIязизличи,
Иншааллагь, хьул саби, гIяхIдеш биэсгу или.
- Нушала дурхъал дудеш, нуша мискинни сарра,
Итис бухесигъуна нушала мас агара…
Сагали иб Якьубли: - Бурули саби халкьли,
Камси секIайчира ил кьабулиркан сай или.
Итичи дякьунхIели, абад имцIабарая,
Суайс жавабла дураб имцIаси гъай майрида,
Сунела тIабигIятра пикрилизи касая.
Ризкьи асес кьасличил дурабухъун, бяхIбиуб,
Мисрила улкализи бетаиб, хьурабиуб.
Юсуфли буркъахъили бару-алав лебсири…
Юсуфличи арукьес нагагь хIяжатбикалри
Барула къараулта кагъар лукIи сунечи,
ХIечи вакIес дигуси пулан адам лев, или.
БакIибти узбанира иличи кагъар белкIун,
Кагъарличи хIеръили, Юсуфли узби багьур.
Илда сунес дарибти гьандикиб, кIантIивиуб.
Белики ну сабабли бургар инжитбирути.
Юсуфли хъарбарили узби кахъиб сунечи,
ТIягIямси беркайчибли бариб хIурмат халаси.
Чус дигуси тIяхIярли гIяхIси къуллукъбарили,
Арбукиб кIинайс илди Юсуф кайруси хъули,
Юсуфли илди багьур, сай биалли вагьхIегьур,
Ягьуда чидил саял Юсуфлира вагьхIегьур,
Малаик хьуравиуб, Ягьудара вагьахъур.
Узби дура гьаббакIиб, цархIилтачи хIербизур.
Чусгъунти хIурмат-хатир цархIилтас агни багьур.
- Дудешла хIурмат саби ишаб нушаб бируси,
Яра илини тамай пякьиртази дейгIира…
Юсуфли суалбариб, чинарадтира или.
КIангIяннизирад сарра уршби Якьуб Идбагла.
ХIябал бархIи дикайчи илди сунечиб бихIиб.
- Чум лертира хIуша, - иб. – ВецIну кIира лертири,
Юсуф бикIуси узи, цархIил нешли варкьибси,
Дудешли чеввикIибси, вергунсири ил бецIли,
Ит багьандан висули, дудешра сай сукъурли…
- ХIушани бурулрая дудеш идбаг сай или.
ХIушани хIебалулрав идбаг илгъуна хIейрни.
Ца-декIар чула дурхIя идбагуна чевхIеркIни?
- ХIунира чеввиркIади, сипатла жагадешли,
ХIура уэс хIейради, ит декIарахIерили.
Арбукьес хIядурбиуб, чула духби дарили.
Ризкьилис дарсли хибти вачарла мас сахIесиб.
- ВегI виштIал узи кили, гIуррара дакIира, - иб,
Багьа агарли гIурра ризкьи дирар хIушаб, иб.
Чарбиубли бетаиб чула дудешла мякьла.
Дудешли хьаркабаиб, талхъан гIяхIсирив или,
Сунела вазир-вакил се динна сабри или.
- Нушала Юсуфличи хIябра мешуси теври,
Нушачила гьар секIал итизира дурира.
Ризкьилис бухибси мас гIелабяхIли чарбариб.
Буньямин вархли кахъес цIакьли тиладибариб.
КIиибил архIяличи илди хIядурбикIулри,
Буньямин варх ватаэс, Якьуб кьабулхIеркулри.
- Хиянат хIебарили Буньямин чарирехIе, -
Или тиладибариб. Дудеш разивикахъиб.
ЦадехI къапулизирад, вари, армякьядая,
ХIушачи хIули игур, - пашманни иб Якьубли.
Гьар цадехI къапукадли кIикIел хIясибли бякьун.
ЦадехI къапула гьалав сайцун хIерли кайили,
Буньямин калунсири, гьуни баргхIебаргили.
Малаик хьуравиуб, Юсуфлизи багьахъур:
- ХIела узи Буньямин къапула гьалав тев, - иб.
Ил гъайла аргъибхIели, Юсуфра висивииб,
КарцIли Буньяминничи иличивяхI ватихьиб.
Кабатахъес хъарбариб гьар хъули кIикIел узи,
Буньямин бикIул узи сунечил варх арукиб.
Юсуфличи хIеръили ил кайкиб къагъиубли.
- ХIед се биубли или, Юсуфли суалбариб:
- Юсуф или бикIуси дила узи левсири,
Итичи вахъ мешуси хIу наб гьанаурхIели,
УркIи кьакьабухъунну, гIяйиб мабирид набчи.
- Дила уркIила мурад, дила хIулбала шала,
Ну сайра хIела узи, вари хIу кьакьамайкIуд,
ДахъхIи чехIедаибти, даира мурадличи,
Шукру биаб халаси ЧевяхIси Аллагьличи ﷻ.
Бисули хъябруцбикиб, суалти имцIадариб:
- Сен сая гIязиз дудеш? – кьутIкьули висивииб.
- Дудешличибси аги нуни бурес вирхIейрус.
- ХIеркьибсилра виасри ну варкьиб дила нешли, -
УркIила кьакьадешли тIамадариб Юсуфли.
Нушала рузи Дина сен сари, се тяхIяра?
- Сари даим пашманни, хIечила цIумрикIули.
- Хьунулра кариира, кIел уршира леб дила…
- Набчил калес дигалли, гIямал пикрибирехIе,-
Иб малхIямли Юсуфли, Буньямин кIапуцили.
- ХIед дигуси бирехIе, - Буньямин разикайкиб.
Саберхур къуллукъчиба ризкьила духби дариб,
Буньяминна дехлизи мургьила сяхI кабихьиб.
Гьунчи дурабухъунну чусра хабарагарли,
ТIама-гьама адердиб сяхI бетахъили, или.
- Нагагьла гIяхIъулали, сяхI чили чарбаралра,
Лугас багьа агарли валрила дех ризкьила.
УмцIлаличил баргасли, хъулкис жазаъ бирисра.
Буньяминна дехлизиб мургьила сяхIра баргиб,
Лебил урузбиубли, бурги чули гIяшдуциб,
ГIур яргали гъайбухъун нуша цIахдарра, или…
- Узи леври ишала Юсуф или бикIуси,
Итра вири мурталра хъулкидеш дузахъуси…
- Хуша чардухъеная, иш туснакълизи калтас.
- Нушазивад ца вати Буньяминна мерличив:
Ил иш мерлав ватурли ардукьес хIедирехIе.-
ЦIакьли тиладибариб узбани талхъаннизи.
- Такьсир агарси адам катасли туснакълизи,
ГIядлу буъни бетарар, зулму саби ашкарси.
Ягьуда бикIул узи бегIлара халал сайри,
Узби цахIнабяхъили, гъайухъун гьимукIили:
- Туснакъла къапулигIи къараулли тIашилзас,
Узи туснакъварахъес нуни чилра ватхIелтас.
Нуша чархIедулхъехIе, узи ишав ватурли.
ГьимукIибси замана Ягьуда бикIусила,
Чархла лерилра гъезби бурбуниван тIашдилзи,
Чула агьлула адам иличи къячикалри,
Гьимира чебарбякьи, ряхIятвири илхIяйзив.
Юсуфли Бабил бикIул сунела уршилизи,
Хъарбарили ватаиб, иличи къячикахъес.
Юсуфла уршили някъ гачбушиб адавзичи.
Якьубла жинс леб ишаб, - Ягьудини вявбушиб, -
Се гIяламат биалра, гьими арбякьун дила.
(Хьарахъуд бирар)
