Пача Екатерина II – ибил ва ислам
Нушала тарихлизир динничил дархдасунти дахъал разитира пашмантира анцIбукьуни кадикибти сари. Дахъал къияндешуни чедаили гIергъи, ислам диннисра шаласи манзил бакIибсири. Ил манзил Екатеринала пачадешла замана, «мургьила даршдус» или бикIуси итхIели, Россияла империяла культурализи ва политикализи дахъал мягIничерти дарсдешуни хибтири.
Екатерина Пруссиялизир акIубсири, илала дудеш князьли ва неш герцогиняни илис гIяхIси бяркъ ва багьуди бедибсири. Рурсили дурала улкнала хIябдехI мез далутири, илала дурарад тарихлашалти, географияла ва динничила багьудлуми касибтири.
15 дус риубхIели, ил рурси (принцесса) Цербстская Елизавета I – ибилли пачала мер бурцуси Петр Федеровичлис гелешмешли черрикIибсири, челябкьлализив ил император Петр III – ибил ветаурсири. Рурсили урус мез, тарих ва православиела дин руркъес рехIрихьиб, сунела сагаси ВатIайчила имцIали багьес багьандан. ГIур илини православие кьабулбарили, Екатерина Алексеевна ретаур ва, сунес кьариганли вируси Петр Федоровичлис ураркьиб. Мекъ барили гIергъи, илдала гIямрулизиб халаси барсдеш хIебиуб, Екатеринани философия, юриспруденция ва машгьурти автортала белкIани руркъулири. Петрлис сунела хьуна авара аги. Илди-ургарти бархбасуни далгунтидекIар ахIенри. Илдала ургала тамай буунхIели, 9 дусла гIергъи, урши Павел акIуб, илхIелира нешлизивад кевасили илизи чехIейахъусири.
Хьунул адамла бекIлизиб пикри акIуб, Петр пачала тахличивад увяхIушили, илала мер буцес. Илкьяйда бетра бетаур, кумекчиби баргили, Екатеринани сунела пикри гIямрулизиб дураберкIиб. Петр IIIибилли пачала ихтиюрти урдатур, ил туснакъвариб ва вахъхIи агарли, гIячихъли ахIенси анцIбукьлизивад вебкIиб. КIел базла гIергъи София Фредерика Августа Анхальт-Цербстская тажларариб ва Россияла императрица Екатерина II – ибил ретаур.
1762 ибил дуслизир Екатерина II– ибилли Россияла пачалихъла гIямру лутIи-хьулчилизирад дарсдирули рехIрихьиб. Илини лерил жамигIятла кьукьнала жураби хIисаблизи касиб. Пачалихълис 34 дус бекIдешдирули илини улкала башри тамай барсбариб. Екатеринани хасти дарсдешуни дурадеркIиб пачалихъла бухIнабси ва динна шайчибси политикализир. «Просвещенный абсолютизм» бикIули бирар ил манзиллис, пачали («всеобщее благо») лебтасалра гIяхIдеш биахъес кьасли, дахъал дарсдешуни дурадеркIиб. Амма илини давлачебтачи имцIали пикри бяхIчиаънили, хъубзара халкь пунтбиубтири. ИлхIели пачалихъла гIярмияли пунтчиби бячIунтири, илдала гьавкья Емельян Пугачевла бекI чеббяхъибсири. Илкьяйда кавшнила анцIбукь цацун сабри, илини улкалис бекIдешдирнила манзиллизиб бетаурси.
Россияла дазурби гьарзадарибтири 11 губернияличил, илини бекIдешдируси манзил: Азов, Крым, Кубань ва Беларусьла, Польшала, Литвала бутIни Россияличи дархдяхъибтири. Баягъи Екатерина II – ибилла манзил сабри ислам дин марбарибси. Ил дин кьабулбарибтазиб ихтияр лебсири азадли лерилра тяхIяркьяйда, динна кьанунти ва гIядатуни дузахъес, мижитуни тIашдалтес.
1767 ибил дусла Екатеринала политикала хьулчилизиб «Наказ» бикIуси положение лебсири сунела 494 ибил статьялизиб белкIунси: «ЧебяхIси пачалихълизиб сунелара ари дахъал халкьаначи тIинтIбируси, сунела гражданинти мяхIкамбирниличила ва илдас урехи хIебиахъниличила пикрибикIули, декIар-декIарти динани къадагъадарни дебали балкIси ва цIахси секIал саби».
Мисаллис, илис гьалаб биалли, 1736 ибил дуслизиб Синодла хIукмулизиб белкIунсири Россияла мер-мусаличир мижитуни тIашдалтахъес къадагъабарниличила. 1649 ибил дусла «Уложение» бикIуси документ хIясибли «за совращение в бусурманство» бусурмандешличи живирнилис цIаличив игусири. Бусурмантас христиан дин кьабулбарибти-ургаб ислам дин тIинтIбирахъес къадагъабарибсири.
Россияла пачалихълизиб бусурмантала жамигIятличи Екатерина II – ибилла политика имцIали пикричебси сабри. Императрица хьулрикIулри динна кумекличил пачалихъ цIакьбарес. БегI гьалаб пачала буйрухъ хIясибли, пачалихъла арцлис Россиялизиб гIяраб мезличил Кьуръан дураибсири, матъал казахуни-ургаб бутIес багьандан. Санкт-Петербургла типографиялизир 1787 ибил дуслизир Дурхъаси жузла 20 экземпляр дурадухъунтири. ГIергъиси дус Уфализиб Магометанский законна Динна-адабдешла собрание акIахъубсири, гIурхIели Оренбургла динна-адабдешла Магометанское собрание ибси уличилси.
1794 ибил дуслизиб, Россияличил Крым бархбяхъибхIели, сунезибра итхIели имцIали бусурманти (крымла татарти) хIербируси, Симферопольлизиб Таврическое Магометанское Динна управление акIахъубсири. Екатеринани байхъуостровла бусурмантас чесибсири мурталра илди балтахъес, илдала мижитуни ва дин мяхIкамдирес, лерил дузахъути низам-кьяйдара дархли. Крым цахIнабяхънила Манифестлизиб илини бусурмантачила белкIунсири «…охранять и защищать их лица, храмы и веру, коей свободное отправление со всеми законными обрядами пребудет неприкосновенно».
НАИДА ГЪУРУЕВА
