НасихIят

НасихIят

Гьачам ГIиса Идбаг ﷺ давлачевси адамличи вакIиб ва ил мискинничи укили викIар: «Иш мискин – хIела динна узи сай. ЧевяхIси Аллагьли ﷻ хIу давлализив иличив ахъварибсири. Ил багьандан хIуни Алагьлис ﷻ шукрубирес чебиркур».

ГIур илини мискинси зягIипсиличи укиб ва илизи викIар: «ХIерикIен! ХIу мискиннири, амма зягIипли ахIенри. Сен-сен бирив, эгер хIу мискинсира зягIипсира виадри? Ил багьандан ЧевяхIси Аллагьлис ﷻ шукрубирес гIягIниси саби».

ГIурхIели илини зягIипсилизи бусурман ахIенси адам чеахъили викIар: «ХIерикIен, секьяйда бирив, эгер хIу мискинсира, зягIипсира, бусурманра хIейадри? Илис Аллагьлис ﷻ шукрубирен. («РухIуль – Байан»).

Шукрубирули, ЧевяхIси Кьудратла ВегIлис баркалла балахъни, лебтасалра чараагарси саби, сенкIун гьариллис ахирагарти лигIматуни гибти сари.

Аллагь ﷻ Кьуръайзив викIар: «Эгер хIушани Аллагьла ﷻ уркIецIи, лигIматуни, савгъатуни, дейгIес дехIдихьадалли, илди дейгIес хIедирудая.

Илдазибад бегIлара халаси иман саби – вирхни. Адамла бирхауди хIебиалли (илизибад берцуди бараб), амма илала лебил дунъя биалра илизибад сегъуналра пайда агара. Ил иш дунъяличибцун саби бируси, ахиратлизи биалли, ил дацI някъбачил аркьян. Эгер вирхуси адамли сунес гибти лигIматуни сабабли суждаличибад бекI ахъхIебурцалра, сеналра илра камси саби. Чарарагарси саби мурталра ЧевяхIсилис шукрубирес. Вирхнилис гIергъи бегIлара халаси гIяхIдешлизи халбируси саби Аллагьла Расулла ﷺ умматлизирти диъни. Мисаллис, лебилра идбагунани дугIя бирутири, илала умматлизи каберхахъес багьандан, амма ГIиса Идбагла дугIяцун сабри кьабулбарибси.

ЧевяхIсила лигIматуначила пикриикIули, хIисаблизи касес гIягIнити сари цивилизацияла лигIматунира, чулира нушала гIямру кункдирути, мисаллис адамти башуси транспорт. Шукрубирули баркалла балахъни, нушала лерти гIяхIдешуни мяхIкамдарни саби ва цархIилтира сархни. Баркалла балахънили, лерти гIяхIдешуни ва лигIматуни мяхIкамдарилицун ахIи илди гьатIира имцIадирути сари.

ЧевяхIси Аллагь ﷻ Кьуръайзив викIар: «ХIушала Аллагьли ﷻ буриб: «ХIушани шукрубирадалли, Нуни хIушаб шабагъатуни гьатIира имцIадирис».