Аллагьала ﷻ дурхъати уми
Аллагьала ﷻ дурхъати уми
34. Аль – ГIЯЗИМУ
БегIлара чевяхIси. Илала чебяхIдешлис я бехIбихьуд, я ахир лебси ахIен. Ахъдешлис дазу лебси ахIен. Иличи гIур мешуси левси ахIен. Илала чевяхIдешла даража чилилра багьес вируси ахIен, ил гьар секIайчив ЧевяхIси сай.
Ил ула мягIна аргъибси Аллагьла ﷻ лагъли ил мурталра чевяхIвиру, илала гьалав сай мутIигIли вирар. Илгъуна адамлис сай чевяхIварес ва Аллагьли ﷻ акIахъубти секIайчив ахъли халирес кьасхIебиру.
35. Аль – ГЪАФУРУ
Гьар секIайчивад чевурхуси, сунела лугърас халати гIяхIдешуни дируси. Лерилра дунъяла нигIматуни илини сунела лугърас дуртIули сай. Бунагьуни дигIяндирули, хатIабачивад чевурхули сай.
36. Аш – ШАКУРУ
Барибсила кьадри балуси. Сунес къуллукъ бирули биъни багьандан сунела лугърас дахъал гIяхIдешуни дируси. Илала диштIати баркьудлумира халали чедиуси ва имцIадируси. Аллагьла ﷻ ил ула мягIни багьурси адам АкIахъубсилис дунъяла нигIматуни дедни багьандан баркалла икIули вирар ва сегъуналра анцIбукьлизив илала гьунчивад чевхIелхъан.
37. Аль – ГIАЛИЮ
БегIлара ЧевяхIси, бегIлара ахъли кьиматла ируси. Сунела сипатуназиб ва баркьудлумазиб гьарли-марси чебяхIдеш лебси. Сунечил цугси агарси, сунела балликьянаби ва гьалмагъуни агарси. Лебтачивалра ЧевяхIси. Сунела кьудратличил цугбуцеси селра агарси.
38. Аль – КАБИРУ
Халаси. Зурбаси. Сунела баркьудлумазиб ва сипатуназиб чебяхIсицун багьарбулхъуси. Селичилра хIяжатхIеркуси. Ил сай чилилра зарал барес хIейруси, цIакьлизивад мяхIрумварес хIейруси. Ил сай сунечил цугси гIур агарси.
39. Аль – ХIЯФИЗУ
Гьар секIал далтахъуси, бегIлара биштIаси секIайчи бикайчи. Сунени акIахъубти бихIуси, Сунечи бирхутира хIебирхутира бархли. Ил сай сунела икьала адхIебурхуси, ахирагарси. Илини сари лерил секIал далтахъути, илдани дарибти гIяхIти баркьудлумас ва бунагьунас танбихI бихIуси.
40. Аль – МУКЬИТУ
ГIямрулис хIяжатти гьар секIал сунела вегIдешлизирси. Баркьудлуми хIясибли илди сунени акIахъубтачи диахъуси, илдала дазу кабилзахъуси. Кумекбируси, ризкьи лугуси Ил сай, Кьудратла ВегI ил сай.
41. Аль – ХIЯСИБУ
Гьар секIал хIисаблизи кайсули, сунела лугърас ваибси, сунечи шукру бикIути лебтасалра ваибси. Илини сунела лугъри гьарсекIайчил гIеббурцули сай ва илдачирад балагь-кьадар черардикули сай. Ил гIяхIдешуни сархес багьандан ваибси сай, Иличицун вирар шукрувикIес. ЦархIилличи хIяжатиркуси ахIен. Лебилра иличи саби хIяжатбиркути. СенкIун Илала гьар секIал лер. Кьудратла ВегIла гьар секIал дарес ахъри леб.
Илини нушази гьар секIал чедаахъиб ва илди пайдала дирахъес имкан гиб. Илала ула кьадри аргъибсили иргъу ил сунес ваибси виъни ва гьар секIал илизирад дигахъути диъни. Илини сай ил паргъатирахъусира.
42. Аль – ЖАЛИЛУ
Буресагарли чевяхIси, саркъибси. Илала саби гьарли-марси чебяхIдеш лебси. Илала лерилра сипатуни нукьсандешуни агарти сари, илди пергерти сари.
43. Аль – КАРИМУ
Сахаватси. Илала сари лерилра лерти. Илала давлуми дуртIули хьалли тамандирути ахIен. Лерилра дурхъати ибти секIал Илизир сари. Илала гьарил баркьуди гапличи лайикьси саби. Ил сай сунени чесибси таманбируси, сунела сахаватдешли чеб-чеббухъахъи гIяхIдеш бируси Ил сай.
Сунени акIахъубтас дигусиличиб имцIаси бируси Ил сай. Ил чис се бедибал кьакьаикIули хIейрар. Сунезибад дигIянбикибтира Илини къирхIебиру, сенкIун ил сахаватси сай. Илала ула цIакь багьурсили бала Аллагьли ﷻ сунес дигусилис се-дигара бедес вирни, сунези тиладиикIусилис Илини селра ахIерабирули хIейъни, амма илхIелира Илала хазна бацIбулхъуси ахIен. Илини бегIлара халаси нушаб гибси сай вагьахъес имкан саби, сунела уми дагьахъурли ва илдала мягIна аргъахъили. Илини сабри нушачи идбагуни бархьибти, Илини сарри нушаб Алжанала унхъри чесибти. Илдазиб Аллагьла ﷻ лугъри даимлис кавлути саби.
44. Ар – РАКЪИБУ
Сунела лугърачибси агиличи хIерикIуси, илдала баркьудлуми хIясибдируси, гьар секIал хIисаблизи кайсули. Илала хIерудилиубад селра уббетерхес бируси ахIен, Сунени акIахъубтала лерил дурути ва дирути далути сари. Гьар секIал Сунела хIерудилиур дихIуси Ил сай.
45. Аль – МУДЖИБУ
КьакьаикIуси, балгни ва тиладиби кьабулдируси, сунезибад тиладибируси лугуси Ил сай. Илизи саби тиладибарес асубирусира. ТиладибикIута лагъайличи лехIихъуси Ил сай. Булгутала тIалабуни тамандируси Ил сай. Илини сунелалугъри Сунечи дугьабизайчира къайгъиличил алавбурцули сай. Къиян-жапа гIердаайчи дугьаизурсилисра Ил кумекличи музаулхъули сай.
Илала ула мягIна аргъибсили Сунечи дугьаилзусилис Сунела имкантачи хIеръили, кумекбиру. Илдас кумекбарахъес сай акIахъубсиличира дугьаилзан. Чинаб гIяхIдеш биаллира, ил Аллагьли ﷻ биахъубси биъниличила бала Илини. Кьанни аргъаллира, илала тилади Аллагьли ﷻ хъумхIерту.
Ил багьандан саби иличи дугьабилзути, сенкIун Илини селра хъумуртуси ахIен, Ил лерилра иргъан сай.
46. Аль – ВАСИГIУ
Гьар секIал сунези духIнадуцибси. Ил сай сунени акIахъубтас дахъал гIяхIдешуни дарес вируси. Илала сахаватдеш сунени акIахъубси гьарилличи чедетиути сари. Илала ряхIму-уркIецIила, багьудила, чебиънила, бикьнила дурар селра хIедирар.
47. Аль – ХIЯКИМУ
ГIякьлукар. Ил сай гьар секIал духули хIердиран. Илала лерилра баркьудлуми дархьти сари. Гьар секIа бухIнабуц балуси Ил сай. Ил сай духуси хIукму дурасес балуси, сунени гьалахили гьар секIал белгидируси. Ил сай лерилра дархьти ва дузути хIукмурти дурайсуси.
48. Аль – ВАДУДУ
Сунела лугъри дигахъуси ва ил сай авлияунала уркIбазир диги адилкьуси. Ил сай бегIлара вархьси, дурхъаси.
49. Аль – МАЖИДУ
Асилси, бегIлара чевяхIси сунела дурхъадеш хIясибли. Ил сай бегIлара дахъал давлуми лерси. Ил сай бегIлара сахаватси, Илизибад асаби бегIлара халаси пайда биэс бируси.
50. Аль – БАГIИСУ
Кьиямала бархIи лебилра мицIирбирахъуси Ил сай. Илини саби адамтачи идбагуни бурхьути, Сунела лугърас кумек бурхьусира Ил сай.
51. Аш – ШАГЬИДУ
Бикьри. Гьар секIал чедиуси ва далуси Ил сай. Илизибад селра дигIянбарес вируси ахIен, илини чехIебаили селра кавлуси ахIен. Ил сай гьар секIал чедиан ва гьар секIал далан.
52. Аль – ХIАКЪКЪУ
Гьарли-марси. Ил сай бархьдеш кабилзахъан, ил иргъахъан. Сунечи хъартас бархьдешбиран Ил сай. ХIекьдеш илизиб саби.
53. Аль – ВАКИЛУ
ХIерудилиу кайсан. Ил сай сунечи хъарахъес асубируси. Хъарихъутасра Ил ваибси сай. Илини саби сунечи хъарихъути разибирахъути.
54. Аль – КЪАВИЙЮ
БегIлара халаси цIакьла вегI, Илизибсигъуна кьуват чизибалра лебси ахIен, лебтачивадра чедииркуси Ил сай. Ил сай чисалра удихIеркуси. Илала цIакьличиб халаси цIакь чилалра лебси ахIен. Иличи къаршили кайзурси удииркур, тиладиличил дугьаизурсини биалли, чедибдеш сарху. Илини дигуси секIал биру, Илала ахъри хIебиуси селра агара. Илала лугърас цIакьли ва гьунарли сегъуналра пайда хIеху, Сунени кумекбарес дигиаайчи.
55. Аль – МАТИНУ
Дебаси, чIумаси, сунела бируси бетурхахъес багьандан чичилра хIяжатхIеркуси Ил сай. Илала ари чилилра хIярхIбиахъес вирхIейрар. Сунела хIукму бетерхахъес багьандан Илис кумекчи хIяжатси ахIен. Илис балликьянаби хIяжатти ахIен, Ил сунес сай ваибси сай.
56. Аль – ВАЛИЙЮ
Сунела лугърала бегIлара лайикьси юлдаш, Сунечи хъарбарес вируси, сунела хIерудилиу кайсуси Ил сай. Вакилдеш диран, мутIигIтас икьалавируси Ил сай. Сай дигутас кумекличи музаулхъуси Ил сай. Душманти мутIигIбиран, акIахъубти балтахъуси Ил сай. Сунечи бирхутас ва Сунела хIукмурти дузахънилизиб мутигIтас кумекбиру ва мяхIкамбиру.
