Аллагьала ﷻ дурхъати уми
Аллагьала ﷻ дурхъати уми
18.Ар – РАЗЗАКЬУ
ЛигIматуни алкIахъуси. Сунени акIахъубти секIал хIердиэс хIяжаттачил гIердурцуси ва илдас дедлугуси. Илини илдас хIясибдирути секIал: хурег, шин, палтар, цархIилти секIал кьяйдали. РухIла шайчирти давлумира: гIякьлу, багьуди, уркIилизиб бирхауди вацархIилти дедиб. Илини сари мицIирти жан гIердурцути ва гьунчидуршути.
Ил ула манпагIятдеш Кьудратла ВегI сегъунасаял багьурси, илала лагъли сай хIяжатти гьарил секIайчил Аллагьли гIеввуцибси биъни бала. Ил Аллагьли ﷻ гибсиличи кьабулли сай.
19. Аль – ФАТТАХIУ
Чедиикибси. ДигIянси гьаргбарес вируси, къиянти кункдирахъуси, илди черардикуси. Илизир сари ГIяршла давлумала умхьни, Илизир сари лерилра багьудлумала умхьни. Илини бирхутала уркIби гьаргдирули сай Сунечи илдазир диги акIахъес. ХIяжатдешуни лертас илди ахъахъес кумекбирули сай.
Кьудратла ВегIла ил у багьурсили Аллагьли акIахъубтас икьалабирули сай балагь чебарбукахъес, илдачибад вайдеш гьарахъбирахъес, илдас гIяхIдешунала ГIяршличирти къапу ибхьули сай ва дин бедлугули сай.
20. Аль – ГIЯЛИМУ
Гьар секIал декIар-декIарли далуси, чула бутIни хIясибли. Илис дегIлара диштIати баркьудлуми далли гIячихъти сари. ДигIяндарибти пикрумира Илис гьаргти сари. Хьулани, умутуни гьаргти сари. Илала арилизивад ухъес вируси ахIен камси секIайзивалра. Илала багьудлумани гьар секIал алавдуцили сари. Халасира биштIасира. Цаибилра бегIла гIергъисира. Илис чеимцIати баянти даргес умцIес хIяжатдеш лебси ахIен, иличи ургIебли, лерилра баянти Иличирад сари дашути. Илизибад селра дигIянбарес вируси ахIен. Илини гьар секIал далули сай. Диэс дирутира хIедирутира далули сай.
Аллагьла ил у аргъибси багьудлумачи вегIиэс гъаргъли вирар, илдикIун Кьудратла ВегIли лугути сари. Илди багьудлуми цархIилтачира даахъес хIяжатти сари. Илала дин цархIилтачира баахъес ва илдас гьуни чебаахъес хIяжатли саби.
21. Аль – КЬАБИЗУ
ГъярцIдирахъуси, кьакьадирахъуси. Сунела бархьдеш хIясибли Илини сунес дигули кьяйдали гIяхIдешуни камдирули сай. Илини рухI хIерудилиур дихIули сай, илди бебкIалис мутIигIдакIахъили. Ил марти лугърала гIяхIти баркьудлумала ВегI сай ва илдани сунес бируси къуллукъ кьабулбиран сай. Илдала уркIби бунагьуназирад мяхIкамдирулисай, амма илди мутIигIли хIебиубси анцIбукьлизиб илди сунечи гъамбиахъес балтули ахIен, халабурхули биъни багьандан, хамдешлизи биркули биъни багьандан.
Ил ула мягIна аргъибси лагъли сунела уркIи ва кьаркьала алавчарти вайдешуназибад, бунагьуназибад, вайти баркьудлумазибад, зулмулизибад мяхкIамбирули ва урухбирули сай.
22. Аль – БАСИТУ
ТIинтIкадируси. Сунела сахаватдешличил ва ряхIмуличил Сунес дигутас давлуми гьаргдируси. Ил сай Сунени акIахъубтас гIямру луган, илдала кьаркьлумази рухI кертIан, ил зягIиптачира давлачебтачира цакьяйда гъамирули сай, лебтасалра сахаватли сай.
Ил у аргънила кьадри адамли сунела уркIи ва биркIанти гIяхIдешбирниличи дяхIчиаънилизиб саби, цархIилтира илдигъунти баркьудлумачи гьирбирнилизиб саби, маслигIятличил ва ил бирахъес муштарбирахъули.
23. Аль – ХIЯФИЗУ
УбяхIбиран. Илини Сунела хIукмулис мутIигIхIебикIутала даража убяхIбиру. Лерилра нясдешуни агардиран, къирдиран, Ил шаригIятличи къаршили дурабулхъутала душман сай.
24. Ар – РАФИГIУ
Ахъбиран. Сунечи бирхути чебяхIбиран, Аллагьлис ﷻ къуллукъличи кабизурти гIеббурцан сай. Cунес гIибадат бирути Алжанала даражаличи ахъбиру. Илини сари заклизир гъагултира дихIути.
25. Аль – МУГIИЗУ
ЧебяхIбиран. Сунес дигули ахъалли, кьуват, чедибдеш, цIакь, даража дедлугуси, Сунела нигIматуни пешкешдируси Ил сай. Лагъла ахъси даража цархIилтала баркьудлумачибли гIяшхIебиру, Аллагьла ﷻ ахъриличибли ахIи.
26. Аль – МУЗИЛЛУ
УбяхIбуршан. Сунес дигули ахъалли чи-дигара цIакьлизивад, кьуватлизивад ва арилизивад мяхIрумварили гIяширахъуси Ил сай. Аллагьли ﷻ увяхIварибсила аги чилилра ва селилра ахъбуцес хIейрар.
27. Ас – САМИГIУ
Лерилра дикьан. Илизибад я зубрачиб я ванзаличиб селра дигIянхIебиру. БегIлара дигIянбарибси булан бикьан Ил сай. Аллагьлис ﷻ «гьарахъси, гъамси, ахъси, гIяшси» ибси мягIна лебси ахIен. Илини аргъес вирусилизиб хIебикьуси селра лебси ахIен.
28. Аль – БАСИРУ
Гьар секIал чедиан. Ил сай гьаргтира дигIяндарибтира чедаэс вируси, гьаргсира дигIянсира багьес вируси Ил сай. Илини чебаэс хIейруси селра лебси ахIен. Аллагьлис ﷻ «гъамли, гьарахъли, шалали, цIябли» ибси мягIна лебси ахен. Илини цазаманализир, цагъунни лерилра, бегIлара диштIати секIал булан чедиути сари.
29. Аль – ХIАКИМУ
Диванчи. Бархьсира балкIсира декIарбиран. Сунени акIахъубти секIайс Сунес дигули кьяйда суд биран Ил сай. Ил бархьсилизибад декIарбируси, хIякьикьатличи балхIебикибси хIясиббиран сай. Илини гьалахили белгибарибси секIал чилилра барсбиахъес вируси ахIен, Илизивад увверхес, верцес вируси ахIен. Илала гIякьлу, багьудлуми чилилра аргъес ва кьиматладарес вируси ахIен.
Ил сай бегIлара чевяхIси диванчи. Илала хIукму чилилра уббяхъес вируси ахIен, яра ил бетурхнилис чилра диргалаухъес вируси ахIен. Илала хIукмурти дархьти сари, илди мурталра тамандирути сари. Илини гьарсекIал далути сари.
Ил ула мягIна багьурси адамли иргъу сай таманни Кьудратла ВегIла арилизивси виъни ва Илис мутигIси виъни. Аллагьла ﷻ лагъли бала Илала дин бегIлара бархьси биъни ва бегIлара мурхьси биъни. Сайра илизив хIерирар, селичилра къаршидеш хIедалахъули. Илини иргъу гьар секIал Аллагьлизирад ﷻ дигахъути диъни. Ва сай сегъуналра анцIбукьлизив иличи къаршили дурахIелхъан.
30. Аль – ГIЯДЛУ
Вархьси. Илала низам леб, баркьудлуми дархьти сари, хIукмурти дурусти сари. Илини бархьагарси хIебиру ва ил барахъес цархIилтасра къадагъабариб. Ил сайсунела баркьудлумазивра пикрумазивра умуси. Гьариллис сунела къуллукъуни хIясибли гIяхIдешуни диран Ил сай. БегIлара чебяхIси бархьдеш Илизибад саби дигахъуси. Сунела душмантачи булан Ил вархьли гъамирули сай, сунела мукIурти лугърачи ва кумекчибачи ил уркIецIичевси сай ва ряхIмучевси сай.
Ил уличил Аллагь ﷻ вагьурсини чIянкIли дархьти баркьудлумицун дурадуркIу. Илини чилалра къиян хIебука, чисалра зарал хIебиру. Ил Аллагьли ﷻ дирутачи кьабулли вирар ва къаршили дурахIелхъан.
31. Аль – ЛАТIИФУ
ХIясиббируси. Сунени акIахъубтачи гIяхIли вируси. Илдази гIяхIсиличи гьуни чебиахъуси ва вайдешлизибад мяхIкамбируси, саби иличила пикрихIебулхъухIелира. Илдачи уркIецIичевси, илдала гIямру гьамаддирахъан, илди хIербиран ва илдачи уркIецIила вегI сай. Ил сай илдас ризкьи лугуси, Сунела лугърази бареси хъарбируси, чус ил гIяхIбилзули хIебиалра, амма Илала пасихIти хъарбаркьуни – хIекьси гIяхIдеш саби ва илди тамандирути ахъси даражаличи ахъбирути саби.
32. Аль – ХАБИРУ
Ил сай гьаргси ва дигIянсира балан, чедибад багьарбухъниван Илини дигIянсила бухIнабуцра балуси сай. Илис селра дигIянси лебси ахIен. Илала багьудлумани белгихIебарибси селра биэс бируси ахIен, Илизибад селра гьарахъбикес бируси ахIен. Ил сай биубли арбякьунсира челябкьусира балуси.
Ил ула мягIна аргъибси мурталра сунела Аллагьлис ﷻ мутIигIливирар, сенкIун илини нушани дирутазибад хIебалуси агара, гьаргси биаб, дигIянсибиаб. Нушаб чебиркур лерилра баркьудлуми Илала хIерудилиу дедес, сенкIун илди сегъунти сарил Иличиб ункъли чилилра хIебала.
Ил барес вирар чIянкIли иличи лехIихъулицун ва ил викIуси бирулицун, Иличи уркIи-уркIилавад дугьаилзулицун.
33. Аль – ХIЯЛИМУ
МалхIямси. ДигIяндируси, бунагьуначивад чевурхуси, лехIбизуртачирти къиян-жапара черардикуси. Сунес мутIигIдеш дакIударибтас кьяйдали, лехIхIебизуртасра гIяхIдешуни дируси. Сунечи лехIхIебизурти чебиукъира ил гьимили вирцIули ахIен, чеббицIес къалабаикIули ахIен, сунела ил барес кьуват лебниличи хIерхIеили.
Ил ула мягIна аргъибси адам цархIилтачил малхIямси вирар, гьимхIеркIур, кункти вяшатIайзи хIейхъур.
