«Саудия къаршили саби законни асухIебирахъути хIяжликьянабачи»
«Саудия къаршили саби законни асухIебирахъути хIяжликьянабачи»
Мурталра азиртадли Россияла бусурманти Маккала ва Мадинала дурхъати ванзурбачи биути саби, чараагарси хIяжла рукнурти дурадеркIес багьандан. ХIяжликьянабала манзил бахъхIи агарли сабиъни багьандан, гIядатлибиубливан нушани исламла ил бутIаличил дархдасунти аргъбаибти суалти хIердирехIе.
2024 ибил дуслизир сегъунти дарсдешуни хIяжликьянабачи хIерлил ишбархIи нушази буру «Марва – тур» хIяж-компанияла генеральный директор Булат Кьурбановли.
Документуни ва замана
«ХIяж барес дугьабизуни ва гIярзаби дедлугуси замана барсбиубли саби. Ишдуслизиб нушани документуни самолетуни арцес баз байхъала гьалар кьабулдирути ахIен. Мартла ахирличир – апрельла бехIбихьудличир – илди бурхIназир сари дедлугути бегIлара гIергъити визаби, – бурули сай Булат Кьурбановли.
Гьалар нушани самолетуни урцухIелира цазаманализир визаби дедлугутири, гьанна биалли илди дедлугнила тяхIяр гьала хили, хIяж бехIбихьес гьалаб тIашиуси саби.
Ил Саудунала ГIярабияла пачалихъла тIалаб саби, ва ил бархбасунси саби илдала хIяжличи гIяхIил хIядурбиэс дигниличил. Илдани гьалаб ахирличи бикайчи хIяжликьянабала лугIи тамай балуси ахIенри. СенкIун визаби бегIлара гIергъиси яргаличи бикайчи хIядурдирутири, ва илди кьабулбирутани хIяж бирути мерани Минализир, Муздалифализир ва ГIярапализир чедетаахъили хIядурдарес бетаруси ахIенри. Гьанна сягIудитунани саби гIяхIил хIядурбиэс замана балтули саби.
Иличил бархбасахъи лебтазилра маслигIятбирулра 2024 ибил дуслизиб хIяж барес пикрибарибтани документуни дируцад жявли дедлугеная хIяжлизи дугьабиз заманаличиб бекIбарес багьандан.
Дурала улкала паспорт агартас ил барес гIягIнибиркур, Саудунала ГIярабияла пачалихъла тIалаб хIясибли – ил 10 дусла биометрический паспорт саби ва ил кайснила тяхIяр бахъхIи кавлуси саби 5 дусла паспортлаван ахIи».
«ДигIянати хIяжликьянаби»
«Марва – тур»-ла генеральный директорла гъай хIясибли, Саудияли кьасбарили саби дигIянали, закон буи башути хIяжликьянаби тIашаэс. Илдани мер-мусаличир техникала гIягIниахълуми диршути сари. Илкьяйдали Минализир, Муздалифализир ва ГIярапализир турникетуни кадилзахъути сари, абзурли хIяж барес виза хIясибли башути къелгIеббикес ва имцIати хIебиахъес багьандан.
Медицинала хIянчизарти барх башни
«Хасси пикри бяхIчииуси саби хIяж бирухIели хIяжликьянабала арадешличи. ИмцIатигъунти тяхIяр-кьяйда далдурцути сари Саудунала ГIярабияла пачалихъли, – бурули сай Б.Кьурбановли. – Илдала арадеш мяхIкамбирнила шайчир дахъал тIалабуни ва насихIятуни лерти сари. Ил тяхIярли чараагарси саби менингитличи къаршиси вакцина барни, сенкIун ил лебил дунъяличибад бахъал адамти цалабиркуси мер саби ва зягIипиркнила урехи дебали халаси саби. Хаслира гьаларти дусмазиб менингитли зягIипбикибти биубтири, ва ил багьандан иличи къаршиси прививка – Саудунала ГIярабияла арадеш мяхIкамбирнила шайчибси Министерствола бекIли-биубси тIалаб саби».
«Нушала шайчибад гьар дус хIяжликьянабачил барх тухтуртала кьукья бируси саби, – гьанбуршули сай Булат Кьурбановли, – илдачил дарх нушани гьала хили исути дармунтира дирути сари. ИмцIаливан илди бегI гьалабси кумек гIеббиахъес хIяжатти сари. Нушала медицинала бригадала бекIлибиубси мурад саби – цаибси кумек гIеббаахъес, консультация бедес, сенкIун хIяжатдеш акIалли, имцIасигъуна кумек Саудияли дурабуркIуси саби. Халаси ва биштIаси хIяжла бегIтас хIяжатти медициналичил дархдасунти харжани Саудунала ГIярабияла хIукуматли чучи чекайсути сари. Илди сари операция, ахтарди дурабуркIни ва илкьяйдали цархIилти далдуцуни».
Транспорт ва хIяжликьянаби гечбирни
«ХIяжликьянабани виза кайсухIели дедлугути арцлизи кадурхути сари транспортлис харжанира. Гъай сари хIяжликьянабас аэропортлизиб гьунибаили, Мадинализибси отельлизи аркниличила. ГIур биалли, Мадинализибад Маккализи, кIинайс Минализи, ГIярапализи ва Муздалифализи. Ил транспорт Саудунала ГIярабияла Пачалихъли гьалабирхьуси саби», – бурули сай «Марва – тур»-ла генеральный директорли.
ХIяжликьянабас хурег
«ХIяжликьянабала беркесила даража нушани мерличиб къелгIеббикуси саби, – бурули сай Булат Кьурбановли. – ВягIда билгьуси замана кухня декIарбируси саби хурег бихуси гостиницабази ва Минала, ГIярапала, Муздалифала палаткабазира бархли. Нушала вакилтани мераначиб ахтардибирути саби Саудунала ГIярабияла хурегла даража къелгIеббикути сиптакартачил бигьунси вягIда сегъуна даражаличиб таманбирулил.
Гьала хили жумягIлис берка кьадар кабилзахъуси саби, жура-журала хурег биэсли ва цагъуна тикрархIебиэсли. Хурег балкьарахъухIелира нушала хIянчизарти илаб бирути саби. Сен-биалра цацахIели суалти алкIули дирар баарила кьадар агнила яра гIяхIси даражала ва нушани тиладибарибси хурег бирарал. Илди масъултира мерличир ирзес чебиркули бирар.
Гидуни хIядурбирни
Дебали бахъал адамти леб хIяжликьянабачил гьуни чебиахъули бузес дигути. Илдани гьала хили дугьабизуни хIядурдирути сари гидуни бетаэс багьандан. ГIур илдала аттестация ва имтихIянти дурадуркIу. Сархибдешуначил декIарбухъунти-ургаб чеимцIаси хIянчи бетурхуси саби санигIятлашалси устадеш ахъбуцес бяхIчиаибси. БекIлидиубти тIалабуни сари: хIяжла кьанунти дални, адамтачил бузнила устадеш диъни, хIяжла рукнурти дурадуркIни, ва адамтала кьукьялис жавабкардеш дихни. ГIяраб мез дални чараагарси саби. Гьар дус аттестация къиянбикIули саби, ва иличил барх нушани гIяхIти хIясилтира чедиулра — гидунала даража ахъбикIули саби.
БехIсур бархбас
Нушани кьукьни акIахъубти сари мессенжертазир гьарил хIяжликьянабала кьукьни хIясибли, ва илдала руководительтачилра. ИлхIелира гьарил хIяжликьянала имкан лебси саби компаниеличил телефон хIясибли бархбас бузахъес. Амма, гIядатлибиубливан бекIлибиубси бархбас бузахъути гидуни саби, чулира хIяжликьянабачил бехIсур бархбас кабизахъурти ва компаниелизи биахъути.
Къурушуни ва долларти
Нушала багьни арбякьунси дусличил цугдуцалли, илцад-декIар дарсдиубли ахIен. Рейсани хIясибли циила декIардеш леб: комбинированный рейс — 4790 доллар бархьси рейс — 5490 доллар саби. Къурушунала багьа барсбикIуси саби арц бедлугуси бархIи кабилзуси долларла багьа хIясибли.
