ДугIахъарлан лачинна гьунарти
ИшхIелла манзиллизиб дурхIни бучIес хIейгути ва неш-дудешличира мугIяллимтачира лехIхIебилзути саби или бахъалгъунти бегIти паргъаткабирули саби. Илкьяйдали чула дурхIначи камси пикри бяхIчииули ва, илди бяркъличи бикахъес багьандан, къайгъни дакIухIедирухIели, илдала челябкьлара сегъуна бирарал белгили ахIен.
Илгъуна агиличил пайдалабиубли, дурхIнира телефонтала арилизи биркули саби. ГIе, чус дигуцад телефонтазирти хIяжаттира хIяжатли ахIентира видеобачи, кинобачи ва цархIилти секIайчи хIербикIули, халаси замана буркIули саби илдани.
Амма селичи-биалра дигичевси ва пайдаласи баркьудилизи ахъибси дурхIяли адам тамашавиахъести баркьудлуми дурадуркIули сари. Гьанна багьудлуми гьаладяхI дашахъес сегъунти-дигара кумекла далилтира камли ахIен кьалли. Хаслира бегIтани чула дурхIя бархьси гьунчи кайзахъалли ва ил гьалавяхI вашахъес кумек гIеббиахъалли, имцIати анцIбукьуназив илизивадли машгьурси адам ветарни чисалра дигIяндеш ахIен. Ил далиллис бикьридеш дируси анцIбукьличила саби иш белкIра. 9 дусличив хIяфиз ветаурси дугIахъарлан уршили сунела бегIти-тухумтицунра ахIи, шантира разибиахъуб. Ил МяхIяммадов Халид Рустамович сай. Ил сунела бегIтачил Турциялизив хIерирули сай ва МяхIячкъалализибти сунела хала бегIтачи мурталра шадив вашуси сай. Илала дудеш Рустам гIяхIси спортсмен сайливан, Дагъистайзивцунра ахIи, илала дуравра машгьуриубси сай. Исламла гьуни буцили, ил гIергъити дусмазив Турциялизив хIерируси сай.
Халид чеваибхIели дила уркIи пахрули бицIиб. СенахIенну ил гьарли-марси дубурланна къиликъуначи вегIиубси гIулухъа сайри. Залумси, серхурси, бажардичевси, дагьричевси ил сунела зилантазивадли арцанти-ургав къиргъуван декIарулхъулри. БиштIа-халатани илала сегъуна хIурматбирулрил чебаибхIели, илизивадли хIекьли машгьурси адам ветарниличи набзир умутуни имцIадиуб.
Иличил ихтилатрикIухIелира багьеслири, сирхIян уршилизир гъабзадешчебти сунела хала бегIтала хIи дургъули диъни. Илини бедибси суайс бусягIят жаваб лугулри. Сегъуналра къяна-шилтахъ барх агарти чедетаахъибти жавабти чардалтулри. Гап-чяхIла гъай аргъесра вирули ахIенри илизибадли. Бархьаначи бурасли, ил урши наб дебали гIяхIизур ва, ихтилат къябаэс хIейгули, иличи суалтала варачан бяхIчиаира. Дахъал гъай хIедарили, къантIси ва кагибси жаваб чарбалтнили иргъахъулри ил гъайлара уста виъни. Илкьяйда виштIали левай ва дурала мерличив хIерирули виалра, ил дурала улкалантала асарлиу викили ахIенри.
Ил пергер уршили Кьуръан руркънила ва уркIиличиб балнила чумра конкурслизир бутIакьяндеш дарили сай ва мурталра сунела дагьрила кагибдешличил гьалавяхI вашес даимиубли сай. Абзурли Кьуръан уркIиличиб балуси ил уршила халаси гьунар сабигу.
—Турциялизиб Кавказлизибадти дурхIни бучIуси белчIудила заведениелизив учIусира ну, — викIули сай Халид, — илабти мугIяллимтира кавказланти саби. Ца Египетлизивадси гIялим сай дурала улкалан. Гьанна ну 4-ибил класслизи дуравхъира. Илав ну ахIенси цалра урус мезличил гъайвикIуси агара. Илар исламла дурсри кадирхьули ва Кьуръан бучIахъули саби. Ишдус медреселизира вашескайилра.
Халидли ункъли Турцияла мез далули сай ва гIяраб мезличилра гъайвикIес вирули сай. Илизи дарган мез далулрив или хьарбаибхIели, илини буриб нуни илди бара сари далути, ункъли дяркъесра кьасбирис или.
— Нуни буцибси дякь даимбирес пикри саби, ва лерилра исламла гьунчирти ва Кьуръа бетуцуни руркъули, гьалавяхI вашес дигулра, — даимирули сай урши. — Дагъистайзи хала бегIтачи вакIибхIели дарган мезличил гъайвикIесра бурсивирус.
БегI гьалар Халидлис Кьуръа урегал жуз дяркъяхъес сунела дудешли кумекбариб. ГIур уршила пагьмула ва гIякьлула бетуцуни пикрилизи касили, ил Египетлизивадси гIялимличи учIахъес укиб. Кьуръа цархIилти жузира илини чедетаахъили дяркъур.
– Дила виштIалгъуна узи ГIябдуряхIманнира Кьуръа кIел жуз дяркъурли сай. Илра гIяхIил учIниличи вирхулра, — викIули сай Халид. – Ну гьар бархIи 8 сягIятличивадли 4 дикайчи учIусира. Даг белчIунси ишбархIи тикрарбирули ва ишбархIи белчIунси гIергъила бархIи тикрарбирули, Кьуръа жуз бяркъурлира. Акьуси замана спортлизи ихъули вирус.
ГIур се бирули вируда хIу Кьуръан руркъули ва спортлизи ахъили, азадухъунхIели или нуни бедибси суайсра илини къантIли жаваб чарбатур, дила гIур селра барес замана кавлули хIебирар или. Якьинни саби, илдигъунти пагьмучебти дурхIнала телефонтазирти ва компьютертазирти пайдаагарти секIайчи хIербикIес иштяхI агни.
Халид МяхIяммадовли (36 килограммла битIакIлизир) мурталра азадли мушулбашнила ва грэпплингла шайчирти абзаназир бутIакьяндеш дирули сай ва гьаларти мерани дурцули сай. Илини Турциялизир ва Россиялизир детерхурти декIар-декIарти абзаначир сархибти дахъал медальти ва грамотаби лер. Урши Европала чемпион вархли ветаурли сай.
ДугIахъарлан виштIал лачин, гIярабла гIилмулизир, декIар-декIарти мезани руркънилизир, илдала лугIилизир — даргалара, хIела лерилра пергерти пикруми гьардизаб, спортлизирра мурталра чедибдешуни дирахъули. Хабарла спортсмен ветааби. ХIела сархибдешунани нуша гьатIиралра разидирниличи рирхулра.
