Урунж ва галга
Урунж ва галга
ВацIализир урунж ва хурла галга акIуб. ДиштIахIели илди сари-ургар ихтилатдикIутири ва челябкьлаличи хьулдикIутири.
– Ну халабаили, бегIлара жагаси ва ахъси галга бетарус, – бикIулри хур.
– Ну вавалибирхъухIели набчи лебил вацIализирад мирхъи цаладиркур ва дила вавначибадси варъа бегIлара бизисили бетарар.
Урунжра хьулбикIулри:
– Ну биштIаси хIеркI бетарус, – бикIулри ил, ва халаси хIеркIлис бехIбихьудли бетарус. Нуни гамурби дикис, хутIла станция бузесиис. Ну дунъяличиб бегIлара халаси хIеркIличи шурбулхъас!
Амма гIямру дарсдикIути сари ва диштIахIели хьулдикIутигъунтили мурталра дирути ахIен. Хурлис якьинбиуб, халаси галга бетаэс багьандан дахъал дусмазиб гьар бархIи бузес ва халабикIес гIягIнили биъни. Ил секIал илис къиянбизур, ва ил шайчиб хIебузанбиуб. ЦархIилти галгуби иличир халадаиб, ва гьатIира берхIиличидяхI ахъдикIулри. Илдала мякьи ванзализи мурхьдикIулри ва чIумадикIулри. Хур усалбикиб, илала кIапIразир жан агартиванри. Урунжлизи ил бикIар:
– ХIязлис къайгъилизи маркуд, хIезибад халаси хIеркI бетхIерар. ХIела шин камли сари.
– Диаб гьатIи, – бикIар урунж, – гьарилра урунж хIеркI бетхIерар. БекIлибиубси илизиб ахIен, бекIлибиубси чяхIбикIни, хIербиъни саби…
– Селис гIягIниси чяхIбикIес? – шулдиубти кьялуби вяшдариб хурли. – Селис гIягIниси бегIлара гIергъити цIакьани илис харждирес. Нуни аргъира, ну ахъси галга бетхIерни ва халахIебикIулра.
Илкьяйда пикрибикIули дусла гIергъи ил тамай беруб.
ВацIала къарауй ил чебаили викIар:
– ХIу халабиули ахIенри, цархIилтас диргалабикIулри, – ил чеббяхъиб.
Урунжла гьала тIашизурли, илала къайгъи чебаили викIар:
– Къучакъ! Дигахъис гъирачебти. Мешебейли ил итмадан умубарили, мурхьбариб, алавла белшун. Гьанна иларад авлахъла хIянчизартани шин кайсули сари ва бегIлара дяргIибтази ва бизитази халдирули сари.
ЦацахIели урунжли сунела унраличила гьанбуршули бирар:
– ХIязлис, хур, хIу халабикIес кьабулхIебикири. ХIу вацIализиб бегIлара ахъси ва халаси галгали бетхIеадлира, мирхъили хIела вавначибад бучибси варъа бири. Нура хIеркI бетIхеурра – ил гьарил урунжлис биркуси ахIен. Амма ну мурхьси къуюгъуна урунж бетаурра, илра вайси ахIенгу. Адамтас дила шин гIяхIдилзули сари ва буцIарси манзил илдас берцудили детарули сари. ГIямрулизиб гьариллис биркуси ахIен бегIлара, бегIлара… бетаэс, амма пайдаласили ва багаласили виэс гьарил вирар.
ПатIимат МяхIяммадова
