Арцу яра кьасу?
Арцу яра кьасу? Арцу яра кьасу?
Ца адабчевси адамли аргъиб сунела шиличибад гьарахъли ахIи «дурхъаси» галга лебниличила, сунечира адамти булгес башуси.
Ил хIяжарси баркьуди агарбарес, галга кабяхъес кьасличил касили бардара сайра ватихьиб. Илала гьала шайтIан дурабухъи бикIар:
– Бати ил галга, нуни хIед багьа лугасну.
Адам кьабулхIейкиб ва къалмакъар детаурли, илди бяхIиб. Ахирра-ахир адамли шайтIан кабикахъили ванзаличи гъяжбариб.
– УркIецIибара, нуни хIед багьа лугасну, – бикIар шайтIан, – гьар савли хIу чеваргъибхIели гIянайуб мургьила къуруш бургид.
Адам кьабуликили сай, амма шайтIай ил виргIявиргиб. Гьаларти хIябал бархIи арц лерри, гIур аги. ГIясивиубли адам гIурра бардара касили галгаличивяхI гьайвиуб. ИлхIелира илис шайтIан гьалабизур ва илди кIинайсра бяхIиб. Амма иш гьакIлис шайтIан иличибад чедибикиб ва барда кебасиб.
Ил тамашавиубли викIар:
– Се бетаура? ГьалавкIун ну хIечивад чедивикира.
– Агьа! – бикIар шайтIан, – цаибил яргализиб хIела чIумаси кьас лебри галга агарбарес, кIинайс биалли хIу арц багьандан сайри вирхIуси! Ил багьандан удивикири.
