Житала дурхIни
Ца биштIаси тукейзи айцIуси дякьличиб багьахъни белкIири: "Дирцули сари житала дурхIни".
Ил белкIли мякьлаб хIербирути биштIатала хIер битIикIулри ва илдазивад ца урши тукейзи ацIиб. Тукенчис салам бедили, илини уруз-хIяцIли житала дурхIнала багьаличила хьарбаиб.
- 50 къурушличибад 150-йчи бикайчи, - буриб тукенчини.
Халаси гьигьра абатурли, уршили кисализи някъ къузбарили, - дибгIянти арц дурасили дейгIун.
- Дила вецIал къурушцун сари лерти, - пашманни иб уршили. Тилади саби, асубирару наб илдачи хIеризесалра, - бирхаудиличил бусравухъун ил.
Тукенчи пишяхъиб ва халаси тIакьализирад житала дурхIни дурасиб. Азаддеш бикибти житни мявдикIули дебшиб. Ца житала дурхIя биалли гIелаб калун, илини гIелабси кьяш хъусбирули башулри.
- Се биубли иш житала дурхIялис? - хьарбаиб уршили. Тукенчили буриб илала качIа акIубхIейчибад нукьсанси биъни. - Ил мурталралис ил тяхIярли кавлуси саби, - илкьяйдали ветеринарли буриб, - ил багьандан житала дурхIя гIярга саби, имцIабариб тукенчини.
ИлхIели уршили вачавархили иб:
- ХIера, ил набчи арбукес дигахъаси.
- СейкIусири хIу урши, дукаркIули хIейиши? ИлкIун зягIипси мицIираг саби, селис гIягIнили хIед ил? Эгер хIу илцад уркIецIила вегI виадли, матъал арбука гъари, нуни ил хIед ити лугас, - викIар тукенчи.
ИлхIели тукенчи тамашавиэсли урши викIар:
- Наб ил матъал арбукес хIейги, илисра цархIилтасван багьа бедес чебиркур. Нуни арц лерхис, - чIумали буриб уршили.
Тукенчи дадкайзурли, уршиличи хIерикIулри, илала уркIи тирхьбухъун.
- Урши, хIуни хIебалулри, ил халабаили жита бетаурхIелира цархIилтиван дуцIбикIес, хIязтали биркьес хIебирар...
ИлхIели уршили сунела алгъай кьяшличибси шалбарла кьяли гIегIбергурли, кьяш гьаргбариб, ва тамашавиубси тукенчини илала балкIси, мегьла мявабани буцибси кьяш чебаиб.
- Нура я гьанна, я гIурхIели дуцIикIес ва тIяхIикIес хIейрусира... Иш житала дурхIялисра къияндикибхIели, мякьлав кумекбареси гIягIниси сай.
Тукенчила хIулбазир нургъби лямцIдухъун. Ил бара пишвяхъили викIар:
- Урши, ну улгасра лерилра житала дурхIнала хIугъунти уркIецIичебти хIерудибиранти биахъес.
ХIякьикьатлизибкIун хIу чи сайрил ахIен бекIлибиубси. БегIлара мягIничебси саби чи-виалра ва сегъуна-виалра гьарли-марли кьиматлавирни, левси тяхIярли дигахъни ва кумекла някъ гьабалтни. Ил сай гьарли-марси юлдаш.
