Дудешла насихIятуни
Дудешла насихIятуни
Давлачевси дудешла ца урши леври.
Сай зягIипикибхIели, ур-ши сунечи живарили викIар:
- Нуни хIези хIябал насихIят дурис, хIуни илди лерилра гIямрулизир дирес гIягIнити сари: хIед гайчи хIуни гьалаб салам малугад, гьар дуги муриси букен, гьар бархIи сагати дабри челгьен.
Камси замана дикибхIели, дудеш вебкIиб. Уршили илала аманат таманбирули, гьалабикахъили салам бедлугули ахIенри, гьар дуги муриси букулри ва гьар бархIи сагати дабри челгьулри. Амма тамашала секIал бетаур: иличил шилизибти адамти гъайхIебикIанбиуб, муридешлис ва дабрилис арц харждиуб. ИлхIели ил нешличи вакIили викIар: - Неш, сен дудешли наб илдигъунти насихIятуни дурибти, ну илис душманрав?
Нешли жаваб чарбариб:
- Дудешли наб къадагъабарисири хIуни хьарбаайчи хIела баркьудлумази гъудурхIерикIахъес. Адамлис хIуни гьалаб салам малугад ибсила мягIна саби – хIу жявли айзурли авлахъличив узен, илхIели мякьлабад аркьутани хIед гьалаб салам луга. Гьар дуги муриси букахъес ибси саби – бархIи ахъайчи узухIели гьарил хурег мурисили бирухIели. Гьар бархIи сагати дабри челгьен ибси – мурул адамли сунела дабри ва палтар умули дихIули, кайхьес гьалав илди умудиралли, савли илди сагативан чедиу ибси мягIна саби.
ИлхIейчивад уршили нешли дурибти дирес вехIихьиб. Камси замана дикили гIергъи, ил давлачеввиуб, жагаси рурсиличи хъайчикайиб ва илди насихIятуни сунела дурхIназира дагьахъур.
