ПасихIкар мугIяллим ва мутагIяллимти
ПасихIкар мугIяллим ва мутагIяллимти
Ца пасихIкар мугIяллим сунела бучIантачил варх сапарличи дуравхъун. БархIи ахъибхIели бамсурли илдани дуги беркIес багьандан ца давлачевла хъули кьутIдяхъиб. Илини илди хIейгу-хIейгули абацIахъиб. Урчала дурхъя мура кадихьили, шинна хъаба ва берубси кьацIла кесек бедили, илаб дуги беркIахъес батур.
Савли мугIяллимли илдачи хъарбариб лерилра чула лерти арц дучили ил давлачевлис баркаллара багьахъурли дедахъес. Илдани тяп илкьяйдали бариб.
ГIергъила бархIи чула архIя таманбиубхIели, илдани мискинна биштIаси хъули кьутIдяхъили, дуги беркIес асубирарал хьарбаиб. Хъа вегI илдас разили гьуниваиб, бегIлара гIергъиси мазара белгьи илдас хурег бариб ва хъулиб лебси кьалтинра убушили илди хъули бусахъес кабаркьиб.
Савли-жявли мугIяллимли сунела бучIанти балхIехъун ва хъулрази цIадушиб. Хъа вегI ва илала хъалибаргра балхIехъи хъулибад дураиб. Мискинна урца биштIаси хъали итмадан цIали бигубли, палда-пухIличи шурбухъун. БучIанти чули пасихIкарлизи халируси мугIяллимличи аъбяхъили хIякбизур. Ил биалли селра хIейкIули, лехIкахъилри. МугIяллимли чула биштIаси биалра хъали агарли калунти, цIумбикIути хъалибарг паргъатбариб, гьар секIал – вайсира гIяхIсира Аллагьличирад (с.т.) диъни аргъахъиб. ГIур цIа тамай дишахъи гIергъи, бучIантира жибарили бигубси хъали алавси мер умубирес вехIихьиб. Илдачил хъалибаргра алавбакIиб. ИлхIели хьулчила мякьлаб хъа вегIли цIала буцIардешли бара пIякьбикахъибси хъаба баргиб. Ил мургьи-арцли бицIилри, разивиубдешли ил хъалибаргличи дуцIухъун…
Ил хIяйчиб илдира батурли, мугIяллим бучIантира арбукили арякьун. Илдала бирхауди бургъулри. Илди гъузгъалдибиубли вяв-чIярбикIулри, илдани иргъули ахIенри сен давлачевлис илдала дегIлара гIергъити арц дикибтил ва гIяхIси адамлис баркалла багьахъесила мерличиб хъали цIали бигубсил. Ахирра илдани мугIяллимлизи челукьути суалти хьардаиб.
Камти багьудлумачилтас халати багьудлумачилтала баркьуди аргъес къиянси саби, - викIар мугIяллим ва баянбариб:
- Давлачевлис нушала арц сарри хIедиути, арцличил бархбасунси бекIбяхъ хIянчи дураберкIес багьандан, гIелаб секIал кахIели мискинвируси.
Мискин биалли лерил гIямрулизив мургьи-арцла бекIаличив хIерирули калун, илдачилара хIебагьурли. Илди илала хала бегIтани укадатуртири ва чула дурхIнази бурес балкьхIеурли, бехIемцIлизиб алхунтири. Мискинни биалли, сунела хъали давлачевлис камси багьалис бицес аасубири ва илди арцра харждиубхIели, селра агарли калес.
