Палестина – нушала уркIбала децI
Палестина – нушала уркIбала децI
Журналистунани гьаман пайдаладирули дирар уктемти дугьбала цахIнабикуни, гIур дугьбала къалипуначи шурдулхъути ва мягIна бетихъахъути. Амма нушала белкIла у – ил чеимцIабарибси дугьбала цахIнабик ахIенну, гьарли-марси аги саби.
Гьар мурталра вегIгъунти гьар секIайзибад мяхIрумбарибти адамтала аги-кьяйдаличила пикриикIалли, тупала заблиуб гьар минутли сегъунти къиян-жапа чекасес чевкъулил пикрибаралли, авараагарсили калес бетарули ахIен. УркIи децIли бицIили баргбердес хIядурли саби.
Илгъуна хIял илди нушала динна узби сабхIелицун ахIен, дирхаирая хIуша, дунъяла цархIил мерличибра илгъуна кахси анцIбукь кабикалли, нушала уркIби тяп илкьяйдали игути сари. Ара-сагъси адамлис авараагарсили калес бетарули ахIен, биштIати, зягIипти, хьунул адамти уркIецIи-ряхIму агарли улхухIели. Лебилра адамдеш уркIецIиагрила гIятIбиълумау хIярибихьили саби.
ИшбархIила печатьлизир ва сайтаначир дурадулхъути белкIаначи хIеруди бируси цензура агара, ва илдани къалабали ва ахтардихIедарили дунъяличир кадиркути анцIбукьуни тIинтIдирули сари, илди-ургар Палестинала ванзаличир детарути кахдешунира къиян-жапара дархли.
Дила хьунул хIулбазиб нукьсандеш лебтала школа-интернатлизир рузуси сари ва иличи че, бурушларси рурсиличи хъулира рашуси сари. Гьар бархIи ил арадешлизибад нукьсанти биштIати – ургар рузули, илдала разидеш камти гIямру чедиули сари. Адамтас гьанбиркуси саби илдигъунти адамти бурсибиубли, чурхтили бетарути саби или, амма хIякьикьатлизиб илкьяйдали ахIен.
Социальный сетаназирти кахдешуни чедаили чумал дуги ил русаэс хIериубсири, дурхIни лебси больница тIутIу-кьякьябарили гIергъи калунти гъятIбиълуми чедаибхIели. Тяп илдигъунти паргъатагардеш нушанира дакIудирулра. Иларти анцIбукьуни чедиухIели сегъунтилра хIялани дакIухIедарили калес хIейрар.
Дяхъи лебхIели абзур кьаркьала изуси кьяйдали, лебил дунъяла инсаниятра децIлизиб саби. Илкьяйдали децIра гIязабра хIебалалли, сегъунти адамтира нуша?
Нушала уркIи изни декIар-декIарли чебиули саби. Някъбани селра бархьбарес барес имкан агарлив? ХIебиалли, зулмулиубти халкьлис кумекбарахъес, балагь-мусибат черардукахъес дугьбачил, ЧевяхIси Аллагьличи ﷻ балга – дугIяличил барес чебси саби.
Кьудратла ВегIличи балга – дугIя – ил бусурмантала ярагъ саби. БусягIят иличила дахъал дурули сари ва ил бархьсира саби. Гьанбушес чебиркур, иткьяйдалира балга – дугIя гIибадат бирни саби. Нуша тиладидикIулра, илизибад пайда биалли, нушани чехIебиуси мерлабадра бакIес асубируси саби. Нушани балга – дугIя дирухIели уркIи гьаргдешли ва гIяхIдешличи дирхнили ил гIямрулизиб бетерхахъес кумекбирниличи хьулдикIулра.
Бархьагардешлис, зулмулис ва вайдешлис танбихI адамтас бусягIятал чебаэс дигули бирар. Амма илкьяйдали бируси ахIен, сабурчевсилизи ва декIардарибти гIямрула дусми гIеркъасилизи ЧевяхIсини чебаахъес асубирар лебилра танбихIлабирути. ЧевяхIсини замана лугуси саби тавба кьабулбарес ва барибси хатIа ункъбарили гьунчибикахъес …
Нуша гIясидикIулра сабурбарахъес тиладибикIутачи ва зулмулис жавабли биахъубли вайдеш хIебарахъес гъайбикIутачи. Илдигъунти урухкIутази халбарес ва гIяйиблабарес гьамадси саби. Амма камси замана арбякьунхIели, нушани иргъулра хIяланас гIергъи хIебашутала гIяхIдешличибли, нушани хатIаби хIедарни. Нушаб гьанна къиянни саби. Нушазир децI, гIясидеш ва гьими руржули сари. Пикрумазир нуша итар сарра ва илабси бархьагардеш тIашаэс дигулра. Нушала балга – дугIя ЧевяхIсиличи дурхьулра жяв-жявли дургъби тIашаахъес тиладиличил. Лебил дунъяличиб даршудеш чебаэс дигулра, хаслира ит ванзала бутIаличиб.
