Редакциялизи суал

- Асубирусив хьунул адамлис гъез чедатурли духъяндиахъес?

- Ислам диннизиб гъез чедатурли духъяндиахъес адамла гъез яра хIяйвантала гъез пайдаладарили, чула диъ хуреглизи пайдалабарес асухIебирути, яра асубирути, амма исламла тяхIяр-кьяйда хIясибли хIеделгьунти къадагъабарибси саби. Шери хIерякьунсилис ва шерирсилисра (мура ихтияр агарли)къадагъабарибси саби гъез духъяндиахъес. Шери рякьунси хьунул адамлис мура ихтиярличибли асубируси саби синтетикала яра гIягIниси тяхIярли белгьунси хIяйва, амма адамла гъез асубируси ахIен.

Бурес чебиркур, гъез дурцахъуси клейли яра капсулали шин гачхIедиркахъули диалли, гъуслю гьарли-марсилизи халхIебиру. Эгер гъез гIеркъадирахънила тяхIяр шин гачдиркесли ва лерил гъез дирцес виэсли барили биалли, гъуслю халбируси саби.

- Асубирусив хьунул адамлис мискли тIемрикIули хъулирад дурарулхъес?

- Хьунул адамлис къадагъабарибси (хIярамси) саби хъулирад дурарулхъухIели мискIли тIемрикIули дурарулхъес, муруй ихтияр бедили биаллира, ил анцIбукьли мурул адамтала хьул алкIни балули риалли. Ил биалли халаси бунагь саби. Иличи таманси умут хIебиаллира, баралра илгъуна пикри алкIули биаллира бунагь (биштIаси) биули саби. Ил секIайчи ташмишрикIули риалли, илхIели хъулирад дурарухъни хIейгеси (карагьат) анцIбукьлизи халбируси саби, амма къадагъаласи ахIен.

(Ибну ХIаджар. Аз–Заваджир», «ТухIфат аль-МухIтаж»).

- Бусурмантас къянкъ, лихIби ва цархIилти кьаркьа биркIантази жагадешлис тIярхъуби дарили секIал даршес асубирару (пирсинг)?

- ЛихIбази тIярхъуби дарес кIел ва имцIа мераначи къадагъабарили саби.

Имам аш-ШафигIила мазгьаблизиб къянкъубази тIярхъуби дарес мурул адамтасра хьунул адамтасра къадагъабарили саби. Мурул адамтас лихIбази тIярхъуби даресра къадагъа саби, хьунул адамтас асубирули саби жагабиэс багьандан.

Иличила лукIули сай имам Ибн ХIажар аль-Гьайтамини «ТухIфат уль-МухIтаж» жузлизиб.

Авалра мазгьабла имцIати гIялимтани къянкълизи тIярхъи кабалтни къадагъабарибси саби. ЛихIбази биалли асубирар чIянкIли хьунул адамтасцун. Илкьяйдали асубируси ахIен кьаркьа цархIилти биркIантачира тIярхъуби далтес.

- Асубирусив хьунул адамтас нудби лутIес яра къантIдирес илдала куц жагабарес багьандан?

Имам ШафигIла мазгьаб хIясибли, нудби лутIни, лугIни, кьицIдирни хьунул адамтас къадагъабарибси саби шери бякьунтас ахIенси, илдас мура ихтияр хIясибли асубируси саби.

Илкьяйдали ил барес асубируси саби дяхIличир дебали цIахти дахъал гъез лертас, куцагардеш алкIахъути ва гьар бархIила гIямрулизир сунес диргала дулхъути.

Мура ихтиярличил нудби лутIути хьунул адамтани, илди хъулибад дурабулхъухIели, урхIла мурул адамти лебси мерлар, кьакьализир чараагарли дигIяндарес гIягIниси саби.

(«ТухIфат аль-МухIтаж»).

- Асубирусив ислам диннизиб къянкъубала жура ункъбируси пластическая операция бирес яра кIунтIби халадиахъути косметический журала далдуцуни дурадуркIес?

- АсухIебирар косметический яра пластический журала операцияби дирес чула мурад тIабигIятлизибси куц барсбарили, жагабиэсцун биалли, гьарли-марси дяхIличибси жагъал яра чулахъдеш убасес ахIи, бусурманти ахIентала гIядатунас яра модалис гIелабад башули.

Илдигъунти процедурабази халдирути сари дяхIла куц, къянкъубала, хIулбала ва лихIбала жура, кIунтIуби халадиахъни яра диштIадиахъни, вяхIла лига (скулы) ва цархIилтира дарсдарни.

Асубируси саби хIяжатси журала пластическая операция барес сунела мурад биалли:

а) акIубхIейчибадси жагъал яра нукьсандеш убасни, суненира адамла кьаркьайс багьесли зарал бирули биалли, мисаллис, мухIлилабси «заячья губа», кIатIа лихIби диалли, дебали балкIси къянкъ, камличирти дамкъни, имцIаси тIул, гумул яра цула, тIулби цахIнадикни – илдигъунти чулира адамла гIямрулизир арадешлис нукьсандешуни алкIахъути.

б) цIали дигубли, бехIемцIлизи яра цархIил журала балагьлизи бикили бетаурси жагъал яра нукьсандеш биалли, зIягIипдешли бетаахъурси, мисаллис, чархла кам барсбирухIели, балли яра байхъала михъири балбирни (ил чеббяхъили биалли), яра михъири биштIакалахъни (илала халадешли кьаркьайс зягIипдеш алкIахъули биалли, къакъ изахъули яра цархIил журала изала), гъез цархIил мерличи кадатни (трансплантация) хаслира хьунул адамтас.