Мубарак
Дагъистан Республикала муфтий, шайх ГIяхIмад-Апанди
Ассаламу гIялайкум ва ряхIматуллагьи ва баракатугьу, ЧевяхIсила уркIецIи ва даршудеш биаб хIушаб, хIурматла узби в рузби!
Мубаракдирулрая бусурмантала бегIлара бекIлибиубси ГIид уль - АдхIа - Кьурбан-Байрамличил!
Ил дурхъати мераначи дураберкIибси халаси хIяж таманбиъни чебиахъуси байрам саби. Илини лебилра бусурмантас имканти дедлугули сари гIибадат бирули, ЧевяхIсилизи нушаб гибти лигIматуни багьандан халаси баркалла багьахъес. Нушазивад гьарил ишди бурхIназив кьурбайс мас белгьи ЧевяхIсила уркIецIи ва разидеш сархес къайгъилизив сай.
Аллагьли ﷻ Кьуръайзиб буриб (мягIна): "ХIушани ЧевяхIсила разидеш сархес хIейрудая, Илала гьунчир хIушала лебдешлизибад хIушаб дигуси секIал харжбарайчи. ХIушани сецад харжбирадаллира, Аллагьли ﷻ иличила балуси саби ва хIушаб чеимцIали чарбиру" (сура ГIяли ГIимран", аят 92).
ЧевяхIсилис халаси шукру бирулра ишдуслизибра гьалаб кьяйдали миллионти бусурманти Маккала ва Мадинала баракатла мераначи баэс бирниличи, исламла динна мягIничерти рукнуби дурадеркIили, дурхъаси хIяж барес биънилис. Кьудратла ВегIли дурхъати хIяжликьянабала рукнуби, лебталалра кьурбунти ва гIяхIти баркьудлуми кьабулдараб. Амин.
ГIядатлибиубливан байрумтала бархIи дахъал гIяхIбаркьла далдуцуни детурхули дирар камси хайрила бегIти адамти: ятимти, гамъаби, мискинти, чулахъуни гIеббурцули. Кьудратла ВегIли гьарил гIяхIси баркьудилис шабагъат биру ва жамигIятлис гьатIира халаси пайда бихахъес, адамтачи уркIи изутили ва кумекбирутили биахъес гьуцIбиру.
ЧевяхIсилизи тиладибирулра нушала зягIипти ва бяхъибти сагъбарахъес, нушала жамигIят балагьуназибад ва анцIкьилизибад берцахъес. Тиладибирулра лерилра балгни, садакьа, кьурбунти, кьабулдарахъес, нушала бунагьуначивад чевверхахъес, нуша лебтасалра арадеш, талихI, гIяхIдеш ва бекIла чедиб даршуси зак кьадарбарахъес.
Мубаракдирулрая гIуррара ил дурхъаси байрамличил!
