Нешла мез мяхIкамдарес
Нешла мез мяхIкамдарес
Ишди бурхIназиб Дагъистанна Пачалихъла Университетла филологияла факультетлизиб нешла мезла БархIилис хасбарибси жагаси балбуц дураберкIиб. Ил къелгIеббикулри гIилмуртала доктор, Дагъистан Республикала багьудила рурибси хIянчизар профессор ХIясанова Узлипат ГIусмановнани. Илини цалабикибти нешла мезла БархIила байрамличил мубаракбариб.
Дарган мезла байрам ибхьули гъайухъун ДГУ-ла дагъистанна мезанала кафедрала профессор М.Р.БяхIяммадов. «Иш байрам лебил дунъяличибра нушачибра ЮНЕСКО-ли багьахъурси нешла мезла БархIила хIурматлис дурабуркIуси саби», - ца бутIаван буриб илини. Муса Расуловичли бурни хIясибли, илдигъунти далдуцунани даргала халкьла хазна – нешла мез руркънилизи, мяхIкамдирнилизи ва гьаладяхI аркнилизи мекелли халаси пай кабирхьули саби. Байрамла авид гьарзабариб филологияла факультетла цархIилти миллатунала преподавательтани ва бучIантанира бархли. Илкьяйдали ила бакIилри багьудила центрла хIянзизарти ва журналистуни. Илар жигарла бутIакьяндешдариб филологияла факультетла урусла-дагъистанна мезанала отделениела студентунани. Дарган мезла группала бучIанти байрамличи ункъли хIядурбиублири. Илдани шимазиб бузули лебалси, дудешла хъулирад цIикури аркнила дубурлантала гIядат чебаахъиб. ЦIикури хъулирад дурарулхъухIели, ил аркутала кьукьяличи кампетуни ва биринжла кьукьри игьуб. Уршбани, гIядат хIясибли, илдала гьуни буциб, ва гьуни абхьесли чус савгъат сасиб. Рурсби байрамласун палтарла бегIбиубли ва кIунби чедяхъили, жагабиублири. Илдани дарган мезличил далуйти, даргала поэтунала назмурти делчIун ва делхъ чедаахъиб. ГIядатли биубливан, илаб лебри даргала миллатла бизити берклумачил баршибси кьумурра. Балбуцла бутIакьянчиби, имцIати рурсби сабри. Илди гIяхIли бучIути студентуни биъни багьеслири. Ункъси белчIуди университетлизиб чеимцIаси стипендия бедили шабагъатлабируси саби, илди-ургаб леб кIикIел стипендия кайсутира. Бахъалгъунти бучIанти хIянчурби даргили бузули саби. Ил факультетлизи лерилрара-сера даргала районтала шимазибад багьуди касес, дарган мез ункъли дагьес пикриличил студентуни бакIилри. Дигеси саби, дарган мез ахъси даражаличир бучIантази далахъули, илдала багьудилис кьимат кабалтули, бярхъ бедлугули ва гIямрула гIибрат чебиахъули бузути дарган мугIялимти лебнира. Даргала лерилра лугъатунала вакилти цалабяхъибси университетла багьуди касес дигутас унза мурталра гьаргли сари. Дарган мез мяхIкамдируси байрам ахъси даражаличиб бетерхур. Ил гьайгьайрагу, нешла мез ахIердарили, илди гьаладяхI дашахънилис кумекли бетарар.
Н.ИСМЯГIИЛОВА
