ХIярамсилизирад мяхIкамли дуэная
ХIярамсилизирад мяхIкамли дуэная
ХIяж бируси манзил КягIбала мякьлав хIяжликьянани ца балга тикрарбирулри:
-Я Аллагь ﷻ , адабчебти лугърас кумекбируси ва илди мяхIкамбируси, хIярамсилизивад нура мяхIкамвараба! Ил бакьили, мякьлавсини хьарбаиб:
-ХIуни цархIилти балгни хIедалутив? Сен илцун бурусири? Илини аргъахъиб: - Чумал дус гьалаб дила арцла шайчибси тяхIяр дебали вайтIари. Бара хIилхIи арц дучили, ну хIяж барес вакIира. КягIба алавбирухIели, селизирил гIеввикили, къардухъунра. ХIерикIасли, арцличилси тавра. Илар азир динар (мургьила къуруш) лерри. Илбис ну хатIаикахъес, илди наб дарахъес гъазализи бикиб. Амма дила хIяяли валтхIелтулри, дила ахIенси набзи касахъес. ИлхIели, мякьлабси кьукьялизибад тIамала аргъира: «Адамти, дила азир динар деткахъили сари, илди даргибсилис нуни 30 динар савгъатдирис!» Илбисла макруличивад чедиикили, нуни кьасбарира илди чула вегIлис чардарес. Илди дедибхIели, илдала вегIли гъайлис къянахIейубли, наб 30 динар пешкешдариб.
ХIяжра дураберкIили, ВатIайзи чарулхъухIели, базарличи ваира. Илав жагаси ва жагьси лагъ вирцулри, илра асили нура хъули чарухъунра. ГIяхIцад замана арбякьи гIергъи, нушала шагьарлизи адамтала кьукья бакIиб. Гьачам илди дила лагълизи ихтилатбикIули чебаира. Ну чеибхIели, илди арбякьун. Нуни уршилизи хьарбаира илдала ихтилатличила. Илини селра дигIянхIебарили буриб: «Ну Эфиопияла вегIбекIла урши сайра, дергълизив ясируцибси. Ну, хIуни асайчи, базуртачи викули калунсири вицес. Илди адамти биалли, дила дудешла къуллукъчиби саби. Дудешли илдас ну варгили, хъули чарварахъес багьандан 50 азир динар дедили сари. Лебил иш манзил хIу набчил гIяхIли вирни багьандан, хIедра гIяхIдеш чарбарес дигулра. Илди хIечи лябкьян вачар барес багьандан, хIуни биалли, ну 50 азир динарлис вицаба ва иличиб камси багьалис кьабулмеркуд». Тяп илини бурибси барили, нуни ил 50 азир динарлис вицира.
Илдани ил чула ВIатIайзи, дудешличи арукиб. Наб дикибти арцлис нуни Багъдадлизиб халаси тукен асира ва вачар бузахъес вехIихьира. Гьачам дила юлдаш вакIили, сунени валуси давлачевси вачрукья вебкIниличила хабар буриб. Илала калунси жагьси рурсиличи ну хъайчикайахъес пикри гьалабихьиб. Нуни илкьяйда барира, нура жагьлири, рурсира гIяхIсири. Магьар дихьили, ил дила хъули кира. Дудешли рурсилис халаси масра батурлири ва гьариллизир азир динарличилти чумал таврара лерри. Ца таврализир биалли, 970 динарцун сарри лерти. Иличила дила хьунуйзи хьарбаибхIели, илини буриб, дудешла ил тавра хIяжлизиб беткахъили калниличила ва ца адабчевси уршили баргили, чарбарибхIели, иларад 30 динар илис савгъатдарниличила.
- ИлхIейчибад дудешли ил лебси кьяйда батурли, мяхIкамли бихIусири, ит баягъи хIярамсилизивад урухкIуси урши гьаниркахъули. Нуни рурсилизи набчил кадикибти анцIбукьуначила хабар бурира. Нуша кIелра хIяйрандиубра, ЧевяхIси Кьудратла ВегIла ахъриличи ва хIялалти арцла баракатличи. -ИтхIейчивад Аллагьличи ﷻ дугьаилзули ну викIусира: «Я Аллагь ﷻ , ХIуни акIахъубти адабчебти лугърас кумекбируси ва илди мяхIкамбируси, сабира хIярамсилизибад урухкIути». Аллагьли ﷻ лебтасалра икьалабараб хIярамси батурли, хIялалсицун пайдалабирахъес. Амин!
