Идбаглис ﷺ салават
Салават – бусурманти Аллагьличи ﷻ дугьабизурли, Идбаглис ﷺ дезни дирнила жура саби, Илис бегIлара дигуси Расул дурхъаварес багьандан. Салават бучIухIели, бусурманти уркIи-уркIилабад шукру бирули, ЧевяхIсиличи дугьабилзути саби, чус уркIецIили виахъубли ил вархьни багьандан ва илис баракат булгуси саби.
Дурхъаси Кьуръайзибси «Аль-АхIзаб» сурализиб бурили саби: «Марлира, Аллагьли ﷻ ва Илала малаикунани Идбаг ﷺ баракатлавирули салават бучIули саби. Ва дирханти! Салават бучIеная илис ва саламличил дугьадилзеная».
Илкьяйдали, Идбагли ﷺ бурибсири: «Сай левси мерлаб набчила гьанбушибхIели наб баракат хIебалгунсилис убяхIдеш гIеббиуси саби!» Ца салават белчIунси бусурмайс ЧевяхIсини вецIал чардирути сари. Салаватуни декIар-декIарти лерти сари ва илдазирад чумал хIушаб гьаладирхьулра.
1)«Аллагьумма салли гIяла МухIяммадан ва гIяла али МухIяммадан ва салим».
МягIна: «Я Аллагь ﷻ, нушала МухIяммадлис ва илала хъалибарглис баракат бара».
2)«Аллагьумма, салли гIаля МухIаммадин ва гIаля азваджигьи ва зуррийяати-гьи ка-ма салляйта гIаля али Ибрагьима ва барик гIаля МухIаммадин ва гIаля азваджи-гьи ва зуррийати-гьи ка-ма баракта аля али Ибрагьима, инна-кя ХIамидун, Мажидун!»
МягIна: «Ва, ЧевяхIси Аллагь ﷻ, баракат беда МухIяммадлис, илала наслулис ва хьунрас, ХIуни Ибрагьимла хъалибарглис баракат бедни кьяйда, бархьа МухIяммадлис баракат, илала наслулис ва илала хьунрас, ХIуни Ибрагьимла хъалибарглис бархьни кьяйда, марлира, ХIу – гапличи Лайикьсири, ЧевяхIсири!»
Салаватла дурхъадеш
1.Аллагьли ﷻ уркIеци биру бучIусиличи
2.Малаикуни Аллагьлизи ﷻ тиладидикIар ил адам багьандан
3.БучIусила бунагьуначивад чевурхар
- Даража ахъбурцу
5.БучIусиличи салам бурхьу
6.Баркьудлуми гIяхIдулхъахъу
7.ХатIабачибад чевурхар
8.Кири дебали ахъли кьиматлабиру
- ГIяхIти баркьудлуми имцIадиру
10.Салават бучIуси дунъялара ахиратлара мурадличи виахъу
11.Бунагьуни ицу ва лагъ акьуватурхIейчиб халаси ужра лукIа
12.Урехила секIайзивад мяхIкамвиру
13.Аллагьла Расул ﷺ илис шафагIятли вирар.
Салават бучIес гIяхIси саби:
Акбар белчIи гIергъи;
Икьаматлис гьалаб;
Мижитлизи айцIухIели ва дураулхъухIели;
Цаибил аттахIийяту белчIи гIергъи;
Жаназала дехIибайзиб, кIинайс «Аллагьу акбар» ибхIели, ва и. ц.
