МухIяммад Идбаг ﷺ акIубси базличил мубарак
Ассаламу гIялайкум ва ряхIматуЛлагьи ва баракатугьу!
АхIерти узби ва рузби! УркIи-уркIиларад мубаракдирулрая хIуша баракатла баз бехIбихьниличил, сунезибра гIергъиси Аллагьла Расул – МухIяммад Идбаг ﷺ акIубси.
Иш дурхъаси РабигIуль – Авваль базлизир нушани гьаман Аллагьла Расул ﷺ гьануршес къайгъилизирра, далдуцуни (мавлидуни) дурадуркIули чучирра илала гIямруличила бурути ва дезни зайдикIути.
Хаслира дигесли бирар дагъистанлантани Аллагьла Расулличи ﷺ диги дакIудирни имцIабикIухIели, илала биография руркъули, далдуцуназир бутIакьяндеш дирули, илала чевяхIдеш аргъес багьандан ва илис гIеларад дашес багьандан.
Аллагьла Расулличи ﷺ диги – Аллагьлизивад ﷻ урухкIнила бегIлара чебяхIси даража ва ЧевяхIсиличи диги дакIубирни саби.
ЧевяхIси Аллагьлизи ﷻ улгулра нушала уркIби Аллагьла Расулличи ﷺ дигили дицIахъес ва Илала адабчерти лугърала лугIилизир диахъес.
Кьуръайзиб бурили саби (мягIна): «Аллагьла Расул ﷺ - хIушаб бегIлара гIяхIси гIибрат сай. Аллагьличи ﷻ ва Кьиямала бархIиличи вирхусилис ва Аллагь ﷻ гьаман гьануршусилис» (сура «Аль-АхIсаб», аят 2I).
Дигуси Идбагла ﷺ гIибрат хIясибли нуша къияндешунала гьалар сабурчертили ва цIакьтили дирес бурсидирулра. Илала гIямрула гьуни бяркънили нушаб кумекбирули саби гIяхIдешла, уркIецIила гьунчирад дашахъес, фитнабазирад ва зулмулизирад дерцахъес.
Нуша дунъя акIахъубсилизи МухIяммад Идбагла ﷺ чевяхIдеш багьандан дулгулра, нушала ВатIан, Россия батахъес ва лебилра дунъяла адамти балагьуназибад ва къалмакъарлизибад мяхIкамбарахъес.
ЧевяхIсини нушаб лебилралис цIакь ва баракат габ, уркIби Сунела Расулличи ﷺ дигили дицIахъаб ва гьар шайчир илала гьунчирад дашахъес кумекбараб! Амин.
