Аллагьлизивад ﷻ урухкIусилис…
Мадинализив ца жагьил дурхIя леври, суненира Аллагь ﷻ багьандан, Аллагьличи ﷻ диги, Аллагьла ﷻ гьалаб урехи багьандан лерил дунъяла лаззатуни, тIягIямти датурси.
Ил мурталра мижитла ваши, асхIябтани дурути Идбагла ﷺ дурхъати хIядисуни дакьес багьандан. ГIумар асхIяб илала имайчи, гIяхIси хIял-тIабигIятличи гIяшикь-сири.
Ца бархIира гIядатли бетаурливан, мижитлар хъатIила дехIбалара дарили, хъули чарулхъули леври. Хъули чарулхъуси гьуни ца хьунул адамла хъулрала мякьлабад аркьусири, илра жагьил дурхIяла жагадешличи гIяшикьриубсири.
Гьачамра, ил мижитлавад хъули чарулхъухIели, ит хьунул адам иличи къаршили дурарухъи, малхIямти гъайли гъайрикIули ит сунечил варх хъули арукес кьасбариб. Илис гIелавад хъули аркьули левалли, дурхIялис Кьуръа аят гьанбикиб (мягIна):
«Марлира Аллагьлизибад ﷻ урехичебти адамтачиб шайтIа гьиръала цIакьдирухIели, илдас Аллагьла ﷻ гIязабра, дазу агарси кирира гьанбиркур, чулира тавба диру, сабира Аллагьличи ﷻ чарбулхъан».
Ит мерлав жагьил дурхIя къагъвиубли кайкиб, илхIели цалабикибти халкьли сунела ухъна дудешла хъули арукиб. Урши байдуги сайри чеваргъибси, чеваргъибхIелира илизи дудешли хьарбаиб:
- Я дила дурхIя, сегъуна аят сабри хIед гьанбикибси?
ДурхIяли гIурра ит аят белчIун ва гьатIира къагъвиуб. Цалабикибти гъамтани ил чеваргъахъес бирули лебри, амма ил дурхIя гьатIи чевхIергъеслин къагъвиублири, ил вебкIилри. Гъамтани ил вирцили, кафайзи уциб, жаназала дехIбала дарили ит дугилизивал хIяривихьиб.
Бетаурсиличила багьурхIели, ГIумар асхIяб къалабали дурхIяла ухъна дудешличи вакIиб, гIур дурхIяла хIябличи гъамвиубли, ахъли тIамадариб:
- Я дила юлдаш! Кьиямала бархIи Аллагьла ﷻ гьалав тIашизес урухкIусилис алжанала кIел анхъ лугниличила бурули саби.
ГIумар асхIяблира хIярбазибад жавабла аргъиб:
- Я ГIумар! Дила Аллагьли ﷻ наб алжанализир кIел анхъ гили сари.
Иш хабар бурули сай Ибну ГIясакирли, ва гьаннала заманала гIялим МухIяммад Садикь аль-Миншавини сунела «ГIумар асхIябла гIямрулизирад 101 хабар» бикIуси жузлизиб леб. Илдигъуна бири дурхъати салафуни ва табигIинти.
Аллагьли ﷻ нушабра тавфикь бараб илдала суннатличир даимдиахъес! Амин.
