Сулайбан Керимов – лебтасалра гIибрат
Гьанна чумал дус Европализибра бархли бегIлара халасилизи халбируси Дагъистаннизибси ГIиса Идбагла ﷺ уличилси Динна Центр тIашбалтули хIянчи детурхули сари. Ил гьарли-марли лебил Дагъистанна халкьли тIашбалтуси саби гьарилли чули бирусигъуна кумек гIеббиахъули.
ХIера, лебтанилра валуси меценат Сулайбан Керимовли ил Динна Центрлизибси МяхIяммад Идбагла ﷺ уличилси мижит тIашбалтнила хIянчи сунечи чеасили сай. Ил дебали мягIничебси анцIбукь саби Дагъистаннисцун ахIи лебил Россиялисра бархли.
Ил меценатли гIеббиахъуси дебали зурбаси кумек саби, илгъуна икьалабирнили лебталалра гьав ахъбурцу ва цархIилти кумекбарес дигуталара гъира ва иштяхI имцIадирар. Ил лебил Дагъистанлантани валуси сай сунела гIяхIбаркьла баркьудлумачивли. Сунела адабдешла къиликъунани, адамтачи уркIи изнили илини адамти-ургаб халаси хIурматра сархили сай. ГьанбуршехIе, Сулайбан ГIябусаидовичли Дагъистаннис чуйнара кумекбарибсири, илини дахъал дусмазиб хIяжлизи адамти бурхьули халаси кирила хIянчи дурабуркIусири.
Коронавирусла чейхъуси изала республикализиб тIинтIбиубси замана больницабази сагати техника, тухтуртас гIягIнити ваяхI, гьава сагабирути аппаратуни, дармунти ва цархIилтира дахъал хIяжатти секIал тIалабдарибтири. ЧебяхIси ВатIа дергъла бутIакьянчибас миллион къуруш арцла декIардарибсири. Илала дурабадра Кьурбан-Байрамла манзил садакьалис маза-мас дутIибтири. Илкьяйдали Сулайбан Керимовли Дербентлизибтас ва иларти районтазибти сунела цаванзалантасра бурес хIейэси кумек гIеббиахъули сай. Мисаллис буралли, илини адамтала миллионтачи адикибти чеблуми ахъиб. ГIуррара илини гIилмулизиб бузути жагьил гIялимти хъулрачил гIеббуциб. МяхIяммад Ярагъский хIервирули ва узули калунти мер-мусаличил бархбасунси туристунала маршрут абхьесра пикрибарили сай.
Иш сияхIлизир гьанхIедушили калунти дахъал илала гIяхIбаркьла баркьудлуми лерти сари. Илала гIямрула рархкья Фируза Керимованира сунела мурул гьарил баркьудилизив гIевурцуси сари. Илинира Дербентлизирти «Кырхляр» хIябри далдирахъули халаси хIяракат дураберкIиб. Ишдуслизив Дагъистанна шайчивадси сенатор, меценат Керимов Сулайбан ГIябусаидович 55 дус виубси сай. Сунела неш-ВатIайчи уркIи изуси, гьарли-марли адамти дигахъуси илис гIеркъати ва чIумаси арадешличилти гIямру дулгулра. Сунела уркIила мурадуни дааб ва пикруми-кьасани гIямрулизир детерхахъес ЧевяхIсини гIеввуцаб.
НАИДА ГЪУРУЕВА
