Баркалла багьахъур
МяхIячкъалала бекIлибиубси жумягIла мижитлизиб Дагъистанна муфтийла кумекчи МяхIяммадрасул Саадуевли Сулайбан Керимовлис баркалла багьахъур.
«Дагъистан Республикала муфтийла тилади хIясибли ну баркаллаличил дугьавилзулра сай муфтий шайх ГIяхIмад-апандила шайзивад ва баркалла багьахъес дигути лебилра адамтала шайзивадра.
ГIяхIбаркьлис баркалла багьахъни – бусурмантас хасси лишан саби. ЧевяхIси Аллагьлис ﷻ цализи ца ва Сунези баркалла балахъути дигахъуси сай. ЧевяхIси Аллагьли ﷻ баркалла кьабулхIебиру, нушани цалис цали баркалла багьахъайчи. ЧевяхIси Кьудратла ВегIли сегъуна-биалра лагъ сабабли ветарахъули сай, Сунела лигIматуни нушачи даахъес, нушаб сегъуна-биалра гIяхIдеш барахъес багьандан. ХIердизая сецадра дазу агарли халасил Аллагьла ﷻ нушачи уркIецIи. Баркаллагь баркьудиличилра, дугьбачилра. Набчи хъарбарибси бирули, С.Керимовла кумекличибли лебил хIяжлизи бархьибти хIяжликьянабала шайзибадра баркалла балахъулра. Нуни чедаира илдала талихIчерти дяхI, илди хьулбикIутира ахIенри чула гIямрулизиб хIяж барес бирниличи… Гьайгьайрагу, илдала дяхI чедаили биса тIашаэс къияннири, илди адамтани чараагарли дугIя барили бургар. Илцад халаси кьадрила баркьуди бирухIели лебилра бусурмантала шайзибад баркалла багьахъес дигулра. Марлира, хIуша-ургаб бахъал адамти бургар илини гIяхIдеш барибти. ГIяхIдешли саби бусурмантала узидеш ва сахаватдеш имцIадирути. ЧевяхIси Аллагьли ﷻ илис арадеш имцIабараб, гIямру гIеркъадараб, дунъяла ва ахиратла къияндешуназивад акьуватаб сайра сунела хъалибаргра.
Кьуръайзиб бурили саби: «ХIушаб гIяхIдеш баралли, къайгъибарая хIушанира гIяхIдеш чарбарес, ил барес хIедирадалли, илис дугIя барая». Муфтийли тиладибарни хIясибли, илис ва илала хъалибарглис арадаеш, сархибдешуни диахъес багьандан нушачил барх лерил мижитуназиб дугIя бируси саби.
Гьарилра бусурмай бутIакьяндеш дирули саби Аллагьла ﷻ хъали тIашбалтнилизиб. Ташмишдеш агарли, Аллагьли ﷻ мижит тIашбалтнилизи пай кабихьилис алжанализиб кIялгIя тIашбалтуси саби. Гьайгьайрагу, Дагъистаннизир тIашдалтути проектуни дахъал сари, илкьяйдали гьарил районнизирра шилизирра дархли. Ил багьандан илди адамтас кумекбирули ГIиса Идбагла уличилси Динна Центр тIашбалтнилизиб кумекбирни багьанданра хасси баркалла багьахъес дигулра Сулайбан Керимовлис.
Халкьли бируси хъараахъес багьандан Аллагьли ﷻ чеввикIили сай ил нушала узи. Аллагьли ﷻ чидил-биалра лагъ имцIали дигнила лишан саби, илини адамтала зугIлуми ва хIяжатуни детурхахъни. ЧевяхIсини гIяхIбаркьла баркьудлумазив, сахаватдешлизив ил лебтасалра гIибратли виахъубли сай. Кьиркьирдешра иманра цаличи ца къаршити сари. Илини сунела сахаватдеш чуйнара чедаахъибти сари, Аллагьла ﷻ ахъриличибли гIуррара чедиахъу.
Илбагьандан илдигъунти лигIматунас шукру бирес чебиркур. ЧевяхIси Аллагьли ﷻ буриб : «ХIушани шукру бирадалли, Нуни хIушаб чараагарли чеимцIабирис».
Шукру-баркалла дикIахъес нушаб ЧевяхIсини имканбараб. Амин!
