Исламла словарь

АльхIямдулиЛлагь

"Лебилра деза Аллагьлис ﷻ!"

Чили чи гапирули виаллира, ил деза Дурхъаси Аллагьличи ﷻ биуси саби. СенкIун лерилра кадиркути анцIбукьуни илизирад дигахъути сари. Илала разидеш агарли цалра анцIбукь кабикес бируси ахIен. Вирхуси адамли сегъуна-биалра сунела мурад сархибхIели "АльхIямдулиЛлагь" иру. Къиян-жапализивад верцибхIелира, балагь чебарбякьунхIелира, гIемчбушибхIелира илини "АльхIямдулиЛлагь" ирули вирар. ДехIибала дарибхIелира илкьяйда 33-йна ирули бирар. Лерилра илдигъунти анцIбукьуназиб илкьяйда ирахъес маслигIятбируси суннат саби. Дугьбала ил цахIнабиклис «тахIмид» бикIар.

СубхIянаЛлагь

"Аллагь ﷻ лерилра нукьсандешуназивад Умуси сай".

 Бусурман адамти сегъуна-биалра тамашала анцIбукь кабиркуси мерличиб къаршибикибхIели, илдани "СубхIянаЛлагь" ирули бирар. "СубхIянаЛлагь" – Аллагь ﷻ гьануршнила жура саби. ДехIибала дарили гIергъира илкьяйда 33-йна бучIахъес маслигIятбирули саби. Дугьбала ил цахIнабиклис «тасбихI» бикIар.

Аллагьу акбар

«Аллагь ﷻ селичивалра ЧевяхIси сай».

Ил ЧевяхIси сай нуша Сунечила пикридикIниличивлира, Иличила нушани селра имцIаси багьес дирути ахIенра. Ил цахIнабикра Аллагь ﷻ гьаниркахънила (зикрула) жура саби. ДехIибала дирухIелира илкьяйда ирес суннат саби. Илди дугьби дурули бирар бусурмантала байрумтала бурхIназирра, дехIибала дирес бехIбирхьухIелира, акбар бучIухIелира. ДехIибайс гIергъи 34 – йна ирахъес маслигIятбиру. Ил дугьбала цахIнабиклис «такбир» бикIар.

МяхIяммад Идбагли ﷺ буриб: «Чили гьар дехIибайс гIергъи «СубхIянаЛлагь» 33 – йна, «АльхIямдулиЛлагь» 33 – йна, «Аллагьу Акбар» 34 – йна делчIи, гIур «Ля илягьа илляЛлагьу вахIдагьу ля шарикалягьу, лягьу-ль- мульку ва лягьу-ль-хIамду ва гьува гIаля кулли шайгIин кьадир» белчIаллира, илала бунагьуни умудиру урхьула хьулухьмачир имцIали диаллира».

Ля илягьа иляЛлагь

«Ца Аллагь ﷻ ахIенси цархIил агара»

Илди дугьбала ахъси даражаличила дахъал хIядисуни ва динна гIялимтала далилти кес вирар. Илди дугьбас Алжанализи умхьу бикIар. Имам Муслимли баахъибси хIядислизиб бурили саби: «Ля илягьа иляЛлагь» ибти дугьбачил ахир сабаибси адам, Алжанализи айцIур». Ил бегIлара дебали умцанти декIдируси зикрула журализира халбируси саби. Аллагьла Расулли ﷺ бурибси хIядислизибад (мягIна): «Илди дугьби тикрардируси адамлис ЧевяхIси Аллагьли ﷻ жагьаннабла цIа къадагъадиру». Динна гIялимтала пикри хIясибли, гьарил адамли бурибси гъай малаикли саби ахъбурцуси, «Ля илягьа иляЛлагь» ибти дугьби биалли, ЧевяхIсиличи сари-сарил ахъдирути сари. ХIядис аль-Кьудсилизиб бурули саби: «Ля илягьа иляЛлагь» - дила къала саби, ила ацIибси мяхIкамвиру дила танбихIлизивад». Ил дугьбала цахIнабиклис «тагьлиль» бикIар.

АгIузубиЛлагьи мина-шшайтIани-р-ражим

«Ну Аллагьличи ﷻ дугьаилзулра лягIнатбакIла шайтIтайзибад берцуди баргахъес кумекбарахъес»

Бусурман адамли илди дугьби дурули вирар вайти пикрумазивад ва вайти баркьудлуми дурадуркIнилизивад Аллагьлизи ﷻ мяхIкамварахъес дигухIели, гIяхIти баркьудлуми дурадуркIнилис диргаладулхъути секIайзивад декIарикес дигули ахъибхIели, гIяхIти баркьудлуми дурадеркIес хьулухъунхIели. Илди дугьби дурули, бусурман адамли Аллагьлизибад ﷻ кумек биубли дигули сай, илала кумек агархIели, сай цIакьагарли виъниличила иргъахъули сай. Кьуръан бучIес вехIирхьухIели илкьяйда ирахъес маслигIятбируси саби (суннат). Кьуръайзибад се-биалра уркIиличиб бучIухIелира илкьяйда ирни гIяхIси саби. Илкьяйда ирахъес маслигIятбируси саби адам гIясиикIухIели, гьалакикIухIели паргъатиэс багьанданра, сенкIун шайтIай сай ил илдигъунтачи вяхIчииуси. Ил дугьбала цахIнабиклис «истигIяза» бикIуси саби.

МухIяммад МяхIяммадов