Хъалибарглизибси талихIла умхьу
Хъалибарглизибси талихIла умхьу
Гьарил адамлис талихIчебси хъалибарг белшес дигахъу. Илизиб саби гIямрула мягIнара, сенахIенну хъалибарг — ил адамли рухIлашал бамсриихъуси, адаб-хIяяла къиликъуни хьулчили дуцили акIахъубси институт саби. Хъалибаргла хьулчилизи диги, цабалгундеш, уржибдеш ва бекIлидиубтигъунти цархIилти къиликъуни кадихьес багьандан, мурул-хьунуйс цаличи ца лехIирхъес, цала ца пикруми, гьанбикуни хIисаблизи кайсес чебиркур. Кьабулдикирая, мурул-хьунуй цала цали барсур хIурматхIебиралли, илдала хъалибарг талихIчебси саби викIес хIейрар…
ГIергъити пасихIти хабуртазиб, чунира хъалибарглизиб талихIчебси аги алкIахъути, бекIлидиубтили сарти къиликъуни — цаличивад ца чевурхниличила ва сабурбирниличила бурули саби. Илди къиликъуни агарли талихIчебси хъалибарг белшес хIейрниличила балули дургудая хIушанира.
Хабурти Интернетлизирад касибти сари.
Цаличивад ца чевурхниличила
Ца шагьарлизир кIел хъалибарг хIердирули дуили сари. Илдала хъулрира цала ца унраличир сарри. Амма цабехIтала анкъи дигилира шалалира бицIилри, цархIилтала хъалибарглизир биалли, гьар бархIи къалмакъарра дявтира камхIедирулри. Мурулра хьунулра унрубала талихIчебдешличи тамашабирули бири. Гьачам муруй хIерэс кьасбарили сай, унрубала хъулир сен гьачамалра къалмакъар хIедирутил, иличи ургIебли илдала анкъи сен дигили бицIибсил.
Ил унрубачи вакIили, чехIейэси мерличи дигIяникили, хIерикIес вехIихьили сай. Хъа регIли юртлизиб умудеш бирули руили сари. Илини жагаси ва дурхъаси хъабаличирад хяса ушкухIели, телефоннизирад зянкъ дакIиб, хьунул адам телефон касили, хъулирад дурарухъун. Хъаба биалли, илини столла дубличи кабихьиб. Ил замана илала мурул хъули ацIиб ва столла дубличиб хъаба лебни хIясибхIебарили, шалгIевулхъухIели, ил кабикахъиб ва бячяхъун. Идачи хIерикIуси унра пикриухъун: гьанна се бетаэсара?
Хьунул хъули арацIиб, ва халаси гьигь абатурли, рикIар:
— АхIерси, чевверхи. Дила гIяйибличил саби хъаба бячунси. Дила черетхIеибдешли столла дубличиб хъаба бархькабатурра.
— Юх, се рикIулрив хIу, ахIерси! Набчиб саби гIяйиб. Къалабаикили, столла дубличибси хъаба хIясибхIебарира.
- Гьу, селра хIебирар. Нушала хъулиб ил бегIлара халаси балагьли бетааб.
… Унра сунени чебаибсила ва дакьибтала чевкад мурхьли пикриухъун. Ил хъули дебали пашманни чарухъун. Хьунул илизи рикIули сари:
— Сен вахъхIи калунри? Се лебри итаб?
— Илдала хъулиб лебилра гIяйибла бегIтири. Нушала биалли, лебилра бархьти саби.
«Сабурла лутIилизи мургьи укадиркути сари»
Мурул-хьунуй цахIнар дахъал гIямру деркIили сари. Илдани гьачамалра цализибад ца секIал дигIянхIебарили, уркIби цадарили хIеркабирули буили саби. ЧIянкIли хьуна ца дигIянадеш буили саби - халали ахIенси тIакьа, сабира илини гьачамалра муруйзи чехIебаахъибси.
Гьачам хьунуй сунени дигIянбируси тIакьа муруйзи чебаахъес кьасбарили сари. Муруй тIакьа абхьибхIели, илаб арцла бергараг ва кIел начи чедаили сай. Гьайгьайрагу, уркIухъунси муруй хьунуйзи иличила бурахъес тиладибарили сай.
Хьунуй буриб: «Ну хъарирухIели, дила хала нешли набзи хъалибарг талихIчебсили бетаахъес секьяйдали вирусил насихIят гIеббурибсири. Илини бурибсири: «ХIела муруйчи гIясириадли, иличил дявта риркьесила мерличиб ца начи бирен».
Мурулла хIулбазир нургъби дакIудухъун, тIакьализиркIун кIел начи сарри лерти. «Се арц сари илди?» — хьарбаиб муруй. Илала хьунуй жаваб чарбатур: «Илди арц нуни дарибти начурби дирцули, учидяхъибти сари…».
