201 къуббаличилси мижит
201 къуббаличилси мижит
Бангладешлизиб мижит тIашбатур, сабира лебил дунъяла бусурманталацун ахIи цархIилталара пикри сунечи битIакIеси. Ил тIашбалтухIели узули калунси уста Рафикуль Исламли бурни хIясибли, гьалаб илала ши балуси ахIенри. Гьанна биалли, ил чебаэс бахъал адамти башули саби, байрумтала манзил илдала лугIи 10 азирличи абиркули бирар. Мижитлис «201 къуббаличилси» ибси у бихьиб. Ил тIашбатурси саби Жхенна хIеркIла мякьлаб, Южная Патхалия бикIуси шилизиб. Ил Даккаличибад 140 километрла гьарахъли саби.
Мижитлизи 30 азир адам кабарцес мер леб. Ил тIашбалтнила хIянчи дехIдихьибтири 2013 ибил дуслизир, Рафикуль Исламли сай вегIси 2 гектарла ванза ил тIашбатахъес бедибхIели. ГIур илини гIяхIбаркьла фонд абхьили, 13 миллион доллар дучибтири ва илар пайдаладарибтири.
Мижит урхIмешуахIенсили бетаахъес багьандан, Рафикуль Исламли дунъяла машгьурти мижитунази ваили, илдала хасдешуни дяркъуртири ва архитектортази дурибтири. Мижит баркьнила жура тамашаласи саби. Ил дунъяличирти декIар-декIарти архитектурала: персияла, индияла, сирияла жураби пайдаладарили барили саби. Гиннесла уличилси жузли илала 140 метрла минараби бегIлара ахътази халдариб. Илдала ахъдеш 55 дерхIла юртлацад саби. Илала дурабадра мижитлизир 201 къубба лер, илдазибад бегIлара ахъси 24 метрла саби, цархIилти 13 метрла. Архитекторла гъай хIясибли, къуббаби мижитлизир имцIали шала ва сагаси гьава биэсли дарибти сари. Северла ва югла шайчир мижитла луцри агара. Ца лацличи баршибси язличиб биалли, цаибил сураличибад бехIбихьили, ахирличи бикайчи лебил Кьуръан белкIунси саби.
Туристунас кункдешлис мижитла мякьлаб вертолет кабируси мер леб. Челябкьлализиб биалли, илаб дурхIнала юрт, гьести гIямрула бегIтас хасбарибси юрт ва хьунул адамтала госпиталь тIашдатес кьас саби.
