Пайдалати гIявадешуни ва кислотаби, 3, 6, 9 Омегала пайдаличила
Жагаси кьаркьа куцличи хьулбикIутани гIявадеш чула душмайзи халбирули саби. ИмцIатигъунтани балули ахIен кьаркьала ара-сагъли бузахъес багьандан гIявадешуни диэс гIягIнити диъни, хаслира гIявати кислотаби яра Омега 3- 6 -9. Илкьяйдали дукути продуктунала даражара дебали мягIничебси саби.
ГIявадеш – адамла кьаркьайс чарарагарли хIяжатси секIал саби. Ил клеткабала мембранализи кабурхуси саби, гIявадеш агарли цалра кабиз бузес бируси ахIен. Илала дурабадра А, Д, Е, К кьукьнала витаминти гIявадешли сари дицIахъути. Ил агарли илди ашдирути ахIен.
ГIявадешунани беркала бацIахъес кумекбируси саби, даарила кьадар гормонти дурайути сари, кам, гъез ва никуби гIяхIси даражаличир дихIути сари. ГIявадешуни кьаркьайс пайдалатира ахIентира дирар, пайда хIелугути кьаркьайчи цIапIаки кавлути сари.
Духълумазирад дарибти гIявадешуни дебали дуцIардарибхIели, пайдалати секIал деткахъили концерагенти детарути сари. БегIлара вайти трансжируни сари. Илдани умхитIла удибси небшла, уркIила тумала ва беркала бицIахъуси кабизла бузери тIутIубируси саби.
ГIявати кислотаби – илдани сари гIявадешуни лушути. Илди хIедиалли кьаркьа духIнарти биркIанти ва кабизуни дузес дирути ахIен. Илди сари Омега кислотаби - Омега 3, 6 ва 9.
Илдани иммунитет чIумабируси саби, хаслира биштIатала. Ил баарила кьадар пайдалабирути биштIатала дагьрила даража ахъси бирар, багьудила программаби гIяхIил руркъу, нервабала ибкьдеш убису, секIал хъумхIертахъес кумекбиру.
Бахъли балуси ахIен гIявати кислотабани имцIаси битIакI убасес кумекбирниличила. Илдани кьаркьала гIяхIси холестеринничил гIеббурцу ва вайси холестерин камбиру. Иличибли беркала гIяхIил ашбируси саби ва кьаркьайзир гIявадешла запасуни хIедиру. Омегала кумекличибли камлиубси гIявадеш бицIуси саби дулекIлизибси гIявадешра бархли. Спортсментасра гIявати кислотаби чараагарти сари. Илдани кьуват имцIабиру, халаси гужличил бажардибиркахъес уркIилис кумекбиру ва уркIила гъяж гьунчибуршу. Арадеш бихIес багьандан хIябалра журала кислотаби Омега 3, 6 ва 9 гIягIнити сари, илди гьрилла асар декIарси биъни багьандан.
Омега – 3
Ил кислота чIянкIли хуреглизибадцун саби кайсуси, сенкIун адамла кьаркьайзиб ил бетаруси ахIен. Илизир лерти сари альфа-линоленовая; эйкозапентаеновая; докозагексаеновая кислотаби.
Омега 3 комплексли кьаркьа жигарчебдеш ахъбурцу, иммунитет цIакьбиру, кьаркьа чехIейсудеш убису, лигубала биркIантала бемдниличи къаршидеш диру, клеткабазибси вайси изайс гьалабилзан, камла, никубала ва гъезла тяхIяр ункъли бихIу, тумала зузбикIудеш кавлахъу, уркIиличи гIяхIси асар биру, хIулбала шала мяхIкамбиру, жявли ухънахIейахъу, хIила гъяж дурусбирахъу, дяхъурби жявли сагъдирахъу, илкьяйдали чимхъализирти ва рудазиртира дархли.
ГIявати кислотаби пашмандешла хIяйчи къаршили дузути сари, серотонин имцIали лебни багьандан, сабира «талихIла гормоннизи» халбируси. Омега – 3 биштIатас баибти хьунул адамтас чараагарси саби. Илди кислотабани виштIасила бекIла мехIеличира гIяхIлашал асарбиру. Гьести гIямрула бегIтала кьаркьайзиб кальций гьунчибуршу, остеопорозличи къаршили бузули.
Кьаркьайзир даарила кьадар Омега – 3 кислотаби диахъес багьандан гьаман гIявати журала бялихъуни дукни гIяхIси саби: тунец, скумбрия, сардина ва цархIилтира. ЦацадехIти баянти хIясибли, жумягIлис кIина урхьула бялихъла диъ пайдалабирниличибли инфарктуни ва инсультуни детарни камбирули саби. Илкьяйдали Омега – 3 гIергъити продуктуназибра лебси саби: урбеш, гидгури, хиви, кунжут, хIяжла хъара, анкIила чIи, сирмуг, шпинат, пастIан, миндаль, капуста, сояла хъара.
Омега – 3 кьаркьайзиб баарила кьадар хIебиалли дакIудулхъути сари: камличилти масъулти, жявли умсни, лигубала биркIанти изни, хIясиббирудеш камбиъни, михъири изни. Илди кислотабала хIебиудеш дебали халаси биалли шизофрения дакIубулхънила урехи алкIули саби.
(ахир бирар)
