Имбирь

ГIергъити чумал дус нушала базуртачиб ва тукентазиб дебали тIинтIбиуб имбирь бикIуси бухъала. Дунъяличиб биалли, ил хIябал азир дус гьалаб дарма биъниличила балусири.

Илала пайдаличила белкIун-сири машгьурти Авиценнани, Гиппократли ва дяхънушабани. Илини лебил кьаркьайчи гIяхIлашал халаси асарбируси саби, иммунитет ахъбурцу ва жура-журала излумас къаршидеш диру, хаслира грипп журала вирусуначи. Ил башуси саби Индиялизиб, Австралиялизиб, нушала улкализи биалли, ил имцIаливан Китайлизибад саби бихуси. Ил нушала анхълизиб башахъесра вирар, илис далдикибти шуртIри акIахъалли.

Имбирьлизир С, Е, К, В-кьукьяла витаминти, макроэлементуни — кальций, натрий, магний, фосфор, медь, селен, цинк, марганец лерти сари. ХIилис, нер¬вабас, гIемснас ва лигубас дебали пайдалати, холестерин гIяшбирути, вецIличир имцIали аминокислота лер: аргинин, гистидин, изолейцин, лизин, метионин, фенилаланин, треонин, триптофан ва валин. Илди аминокислотаби фармацевтунани дармунти дирухIелира пайдаладирути сари, микробуначи халаси асарбирни багьандан.

Беркала ашбирнилис кумекбирули илини рудала бемдри урису. Илизибси калийли хIила туми дягIудирули, хIила гъяж гIяшбиру. УркIи далкьухIелира имбирь кумекбирар: гьунчибтас, виштIасилис раибси хьунул адамлис, операцияла гIергъи ва химиотерапияла замана.

Имбирьли цацадехIти дебали цакьти микробуни ва бактерияби дубкIахъу, сарира дармунтани дебкIахъес хIедирути, хаслира кIинчIуби изухIели (пародонтит). Имбирь белкьунси тяхIярлира беркайзи бархиу ва чяй диру.

Амма сецад пайдалати асурти имцIали диаллира, имбирь гьариллис балбиркуси ахIен ва мяхIкамдешличил пайдалабарес чебиркур, чимхъа, дулекI изутас, хIила гъяжличил, хаслира уркIила тумачил дархдасунти, дахъхIи диубти излуми лертас.

14 ибил даршдусличибад бехIбихьили, ил дебали машгьурбиубсири ва кьявгала изала тIинтIбиубхIели, ил гьаман пайдалабирусири кьаркьа иммунитет ахъбуцес багьандан. ИшбархIила замана ил грипп журала вирусуначи къаршили чяйлизиб ва компотлизиб гьаман пайдалабиру.