Пагьмуртала урунж

ГIябдулманапова Аминат ГIябдулманаповна акIубси сари Дахадаевла районна Хъярбукла шилизир, 1946 ибил дуслизир.

Шила школа белчIи гIергъи, илини МяхIячкъалала ДГПУ таманбариб ва сари акIубси шилизир мугIяллимли рузиб.ГIур илини Москвала М.Горькийла уличилси Литературный институт шула кьиматуначил хъараахъур. Ил Дагъистанна телевидениелизир, «Гьалмагъдеш» журналла редакторли ва цархIилти мераначир рузули калун. Гьанна ил дурхIнас хасбарибси «Лачин» журналла редакторли рузули сари. А.ГIябдулманаповала 60–цад жуз дурадаухъун. Поэзия дигантас илала сагаси жузлизирад назмурти гьаладирхьулра.

Гардла далай

Усен, урши ахIерси,
Усен хIулбала шала,
Халакаи, жагькайи,
ГьарахъихIи ветаи.

Ихъид дахъал гьундури
Юртличирад гьарахъти,
ХIу чи ветаадлира
Хъуммартидра дубурти.

Каспи бусули саби,
ЧIигIя гьакIбиру дягIли,
Усен дила духуси
Усен, Камил ахIерси.

Ветаадли гIяхIгъабза
ГIевурцури ВатIайра,
ГIеббуцес ахъри барга
ХIял агарти хIунира.

Далцад хIуни хъумира
ХIял балад гIямрулара,
Рулгулра мадагьаби
Дунъяличир дургъбира.

Нешлис

Назикдиубти тIулба
СубхIянти кайсухIели,
ДяхIиван цIуба чурми
ДигIяй хIердирухIели,

Гьанбирки, неш, хIу сарри
Или кьуват агарси,
Аллагьлара I урхIлара
УркIецIиличи хъарси.

Гьанбирки, гIямзиларли,
ГIямру хIедалад или,
Гьалмагълара кIидехI дяхI
Дирни хIебалад или.

МягIна аргъира кьанни,
ХIу набчил агархIели,
Лерилра балагьуни
ЦахIнар чедакIибхIели,

Шилтахъуни шайтIунти
Дашес дехIдихьибхIели,
Бархьдеш бурни багьандан
ГIяндракIес хIядурхIели,

Саринти сарра или,
Къургъи къунздикIухIели,
ЧатIни дархахъес, къянби
Макрули диркьухIели.

Лигубачи, камличи
Хъарахъили чIукьаси,
Марли хIу руилригу
Илдас къарауйчирси.

СихIрула някъби

Балас сихIрула сари
Нешла сакIубти някъби,
Хамирван иш дунъяра
Саби журугбарибси.

Илдани хIебируси
ХIебалас нуни селра,
Таманбиру илхIяйзиб
Се барес ралризалра.

Ризкьи дегIесра бала,
Арши диршесра бала,
АрцIи-хъалта дирцIили,
Хъуми дерхахъес бала.

Мар анкIила лугнала
Чурми демхесра бала,
Каргьес забла мачнира,
ТIашдатес зурхIябтира.

СихIрула бехI тIулбани
ТIутIи луцIесра бала,
ЦIедешла мургьи шинни
Дужахъура нушара.

Нешли дариб чуднира
Дираргу дахъ бизити,
Детарар кьацIла рангра
БерхIиличи мешути.

Хъулирра хъа дурарра
Дузар мугьлатагарли,
ХутIли дузахъутиван
Я бамсри хIебалули.