ГIяхIбаркьла баркьуди

ГIяхIбаркьла баркьуди

16 дус виубси гIулухъали цIализибад 6 биштIати дурхIя берцахъиб. Ил анцIбукь кабикибсири дугели, лебил адамти бусухIели. Ил бетаурси саби Уралла ши Чатлыклизиб. Азбарлизи дуравхъунси уршили унрубала хъали цIализиб чебаиб. Лебил хъалчра цIализибри. Къалабали улкьай бячи, гавлизи гIелабикибси хъули ухIнахъиб ва бусути хIябал дурхIя балхIехъи, цацали улкьайлабад дуракасили паргъатбариб. Илдала бегIти хъулиб аги, гIур музабухъунти илди баркалла бикIес бумсули ахIенри. «БегI гьалав ну цIа дилшахъантачи дуцIулхъас или пикрибарира, гIур гьанбикиб хъулиб биштIати дурхIни лебни. Хъярхъли улкьай бячи илди дуракасира. Ну илдала арадешличила сайри пикриикIуси», - викIар Сергей Тетеревков. Ил хъулирад цIа цархIилти унрубала хъулрачира даили урдухъун.

Илабра нешра хIябал дурхIяра калири. Илдира балхIехъи, уршили хъулибад дураиб ва урехиагарси мерличи букили, къалабаси кумекла ва цIа дилшахъан машинаби дакIайчи илди ряхIятбариб. Илала нешли гьанбуршули сари 5 дус гьалаб секьяйда илини чула хъалибаргра цIализибад берцахъибсирил. «СягIят кIел дикибхIели, илини ну черсаргъахъира. ИлхIели бурха цIализи гIелабикили, кабикес хIядурлири. Нуша хIилхIи далкьаурра дурадухъес», - буриб илини. Уршили сунела баркьуди гIядатласи баркьудилизи халбирули сай ва сеналра игитдешлизи халбирули ахIен. Гьанна илди мер-мусала МЧСлизиб ил шабагъатлавирнила суал хIербирули саби. Илдигъунти гъабзадешла баркьудлуми, гьайгьайрагу, лебтасалра гIибратли урдулхъан.

НУШАЛА КОРР.